Kon Nganong Angay Gayod Kining Pagahisgotan

“Ang puthaw makapahait ug puthaw. Ingon man ang usa ka tawo makapahait sa dagway sa lain.”—Proverbio 27:17, ang Bibliya.

ANG mga sulab dili mohait pinaagi sa pagsalsal niini. Ang pagpahait himoon sa mahinay kaayong paagi. Maingon man, adunay husto ug sayop nga mga paagi sa pagpahait sa hunahuna pinaagi sa panagkolokabildo, ilabina sa talandogong mga ulohan sama sa relihiyon.

Una sa tanan, kinahanglang tahoron nato ang dignidad sa laing tawo ug ipakita kana nga pagtahod diha sa atong mga pulong ug gawi. “Himoa ang inyong pamulong nga kanunay may pagkamadanihon, tinimplahan ug asin,” nag-ingon ang Bibliya. (Colosas 4:6) Ang matinahurong-pagkasulti ug tinimplahan nga sinultihan maoy dili dogmatiko ug tono, bisan pag nagtuo gayod ang nagsulti nga siya husto ug ang laing tawo ang sayop.

Ang pagkamatinahuron mapabanaag usab sa paagi sa atong pagpaminaw. Kita dili matinahurong nagapamati kon kita mosalga ug sulti o kon kita dili mamati tungod kay nangandam kita sa atong sunod nga argumento. Ang usa nga nagsulti lagmit makamatikod sa atong klarong kakulang sa kaikag sa iyang punto-de-bista ug tingali undangon ang panaghisgot. Lain pa, dili gayod nato angay pugson o dag-on sa kusog nga tingog ang lain aron bag-ohon ang iyang mga hunahuna. Total, ‘ang Diyos ang magpatubo sa binhi sa kamatuoran’ sa masanongong kasingkasing sa mamiminaw.—1 Corinto 3:6.

Kita adunay maayong panig-ingnan ni apostol Pablo, kinsa migamit ug “katarongan” ug “pangombinsir” sa iyang pag-alagad. (Buhat 17:17; 28:23, 24) Si Pablo nakighisgot ug relihiyon sa mga tawo bisag asa niya sila makita, sama diha sa mga tiyanggihan ug sa ilang kabalayan. (Buhat 17:2, 3; 20:20) Ang mga Saksi ni Jehova naningkamot sa pagsundog sa maong panig-ingnan pinaagi sa pag-adto bisag asang dapit nga makita ang mga tawo ug nangatarongan kanila gikan sa Kasulatan.

Paglikay nga Dili-Masaypan Pagsabot

Ang nasod sa Israel mao pay pagkapahiluna sa Yutang Saad sa dihang dihay sayop nga pagsabot labot sa usa ka halaran nga hapit mosangpot sa sibil nga gubat. Ang mga tawong nagpahimutang sa sidlakan sa Subang Jordan nagtukod ug usa ka halaran, apan ang ubang mga tribo nasayop sa paghunahuna nga halaran kadto alang sa bakak nga pagsimba. Busa, sila nangandam ug aksiyong militar aron sa pagpitol sa ilang mga igsoon. Apan ang pagkamaalamon nagpatigbabaw. Ang mga mag-atake-unta nagpadala una ug hawas sa pagsusi kon alang sa unsa ang halaran. Sa ilang dakong kahupayan, ilang nahibaloan nga kadto maoy usa lamang ka monumento—“usa ka saksi”—sa pagpahinumdom sa tanang tribo sa ilang panaghiusa atubangan kang Jehova nga Diyos. Ang panagsultihay nakasanta ug gubat—ug nakaluwas ug daghang kinabuhi!—Josue 22:9-34.

Sa susama, ang sayop nga mga pagsabot karon kasagarang mosangpot ug paglinay-anay ug pagpihig pa. Pananglitan, gilantaw sa pipila ka tawo ang mga Saksi ni Jehova ingong relihiyosong mga panatiko tungod sa mga taho bahin sa ilang pagdumili sa pagdawat ug mga pag-abonog dugo. Apan kadtong nakapangutana mismo sa mga Saksi bahin niining butanga sagad nakurat sa pagkahibalo nga adunay basehanan gikan sa Bibliya ang ilang baroganan ug nga adunay luwas, epektibong kapiliang mga pagtambal. (Levitico 17:13, 14; Buhat 15:28, 29) Sa pagkatinuod, tungod sa mga suliran bahin sa suplay sa dugo, ang usa ka kolumnista nagsulat: “Salamat sa Diyos nga nanguna ang mga Saksi ni Jehova sa pagpanukiduki ug mga kapuli sa dugo.”

Maingon man, ang uban dili makigsulti sa mga Saksi tungod kay sila gisultihan nga ang mga Saksi ni Jehova dili motuo kang Jesu-Kristo. Pagkalayo niini gikan sa tinuod! Sa pagkatinuod, ginapasiugda sa mga Saksi ang papel ni Jesus sa atong kaluwasan, nga nagpatin-aw nga siya mao ang Anak sa Diyos, nga maoy gipadala sa Diyos dinhi sa yuta sa paglukat sa mga tawo gikan sa sala ug kamatayon. Pinaagi sa pagpakigsulti sa mga Saksi niining butanga, ang sayop nga mga pagsabot sa mga tawo napatin-aw.—Mateo 16:16; 20:28; Juan 3:16; 14:28; 1 Juan 4:15.

Kamatuoran—Popular o Dili-Popular?

Tingali ang nakapatingala sa daghan mao nga kon bahin na sa relihiyon, ang popular nga paagi sagad mao ang sayop nga paagi. Si Jesu-Kristo mismo nagtudlo: “Sulod kamo agi sa sigpit nga ganghaan; tungod kay lapad ug luag ang dalan padulong ngadto sa kalaglagan, ug daghan ang mga nanagpanulod agi niini; samtang sigpit ang ganghaan ug hagip-ot ang dalan padulong ngadto sa kinabuhi, ug diyutay ra ang mga nakakaplag niini.”—Mateo 7:13, 14.

Sa mga adlaw ni Noe, walo lamang ka tawo ang nagsulti sa espirituwal nga kamatuoran—si Noe, iyang asawa, iyang tulo ka anak nga lalaki, ug ang mga asawa sa iyang mga anak. Ang ilang pasidaang mensahe ug ang ilang buluhaton sa pagtukod sa arka tino nga naghimo kanilang tumong sa mga pagyubit, bisan pag-abuso. Bisan pa niana si Noe ug ang iyang pamilya wala magpadala sa kahadlok; sila nagpadayon sa pagsangyaw ug pagtukod. (Genesis 6:13, 14; 7:21-24; 2 Pedro 2:5) Sa susama, tulo lamang ka tawo ang mituman sa sugo sa Diyos ug naluwas sa kalaglagan sa Sodoma ug Gomora.—Genesis 19:12-29; Lucas 17:28-30.

Komosta ang atong panahon? “Kon mobalik si Kristo sa unod karon, tingali patyon gihapon siya sa mga tawo pag-usab,” miingon ang usa ka tagbalay ngadto sa usa sa mga Saksi ni Jehova. Kining tawhana nagtuo nga ang mga pagtulon-an ug hataas nga moral nga mga sukdanan ni Jesus mahimong sama ka dili-popular karon maingon nga dili-popular kini sa 2,000 ka tuig nang milabay. Mouyon ka ba?

Kon mao, husto ka, kay si Jesus nagpasidaan sa iyang mga tinun-an: “Kamo mahimong mga dulumtanan sa tanang kanasoran gumikan sa akong ngalan”—usa ka tagna nga natinuod. (Mateo 24:9) Ang Hudiyohanong mga lider sa Roma miingon ngadto kang apostol Pablo mahitungod sa Kristiyanidad: “Mahitungod niini nga sekta . . . , sa bisan diin kini ginasultihan ug pagbatok.” (Buhat 28:22) Ang pagkadili-popular sa Kristiyanidad, hinunoa, wala magpahunong sa mga sumusunod ni Kristo sa pagpaambit sa ilang mga pagtuo ngadto sa uban. Ni nagpahunong kini sa matinud-anon-ug-kasingkasing nga mga tawo sa pagpakigsulti sa mga Kristohanon.—Buhat 13:43-49.

Karong adlawa ang mensahe ni Jesus mas hinungdanon sukad masukad. Ngano? Tungod kay ang mga kahimtang sa kalibotan nagpakita nga kita nagkinabuhi na sa “kataposang mga adlaw” niini nga sistema ug nga kining mga adlawa pagataposon sa paghinlo sa daotang-buhat gikan sa yuta. Gitandi ni Jesus ang atong panahon sa mga adlaw ni Noe. (2 Timoteo 3:1-5; Mateo 24:37-39) Busa dili kini ang panahon nga ibalewala nato ang atong mga pagtuo, kay ang kinabuhing walay kataposan ihatag lamang ngadto niadtong nakaila sa Diyos ug nga “mosimba [kaniya] pinaagi sa espiritu ug kamatuoran.”—Juan 4:24; 2 Tesalonica 1:6-9.

Kon Unsaon sa Pagkaplag sa Hustong Dalan

Si Francis Bacon, ika-17-siglong Ingles nga pilosopo, magsusulat, hurista, ug estadista, nagtambag sa mga tigpangita sa kamatuoran nga “magtimbangtimbang ug magpalandong.” Ug usa sa unang mga presidente sa T.B., si Thomas Jefferson, nag-ingon: “Ang katarongan ug ang may kagawasang pag-usisa mao lamang ang epektibong mga ahente batok sa sayop. . . . Kini mao ang kinaiyanhong mga kaaway sa sayop.” Busa kon kita tinuod gayod nga nagpangita sa kamatuoran, kita “magtimbangtimbang ug magpalandong” ug pangagpason ang “katarongan ug ang may kagawasang pag-usisa.”

Sa pag-ila kon nganong ang maong paagi hinungdanon, ang Britanikong siyentipikong si Sir Hermann Bondi nag-ingon: “Sanglit usa lamang ka tinuohan ang tinuod, nan posible gayod nga ang tawo magpakitag hugot nga pagtuo ug pagkamatinud-anon diha sa usa ka butang nga dili-tinuod sa natad sa gipadayag nga relihiyon. Tungod niini madahom nga moagak kini sa pipila sa pagpakitag igong pagkamapainubsanon, sa paghunahuna nga bisan pag unsa ka lalom ang pagtuo sa usa, ang usa lagmit nasayop sa pagtuo.”

Busa, sa unsang paagi ang tawo makatino kon siya tinuod ba gayod nga anaa sa ‘hiktin nga dalan padulong sa kinabuhi’? Si Jesus nagtudlo nga ang Diyos kinahanglang pagasimbahon ‘pinaagi sa kamatuoran.’ Busa ang katarongan magpugos sa usa sa paghinapos nga kon ang duha ka pagtulon-an nagkasumpaki sa usag usa, ang duha dili mahimong tinuod. Pananglitan, mahimong ang mga tawo adunay kalag nga magpabiling buhi inigkamatay o nga kini wala. Mahimong ang Diyos mosalga sa tawhanong kahikayan o mahimong dili. Mahimong ang Diyos maoy usa ka Trinidad o mahimong siya dili. Ang mga tigpangita sa kamatuoran buot ug tinuod nga mga tubag sa maong hinungdanong mga pangutana. Ang mga Saksi ni Jehova nagtuo nga ang Diyos naghatag kanato ug tubag diha sa iyang Pulong, ang Bibliya.a

Sanglit “ang tibuok Kasulatan inspirado sa Diyos,” ang pangunang paagi sa pagsulay sa nagkalainlaing mga pagtulon-an mao ang pagtandi niini batok sa Bibliya. (2 Timoteo 3:16) Sa paghimo niini, imong ‘gipamatud-an sa imong kaugalingon ang maayo ug dalawaton ug hingpit nga kabubut-on sa Diyos.’ (Roma 12:2) Ikaw ba ‘makapamatuod sa imong kaugalingon’ nga ang imong mga pagtulon-an nagagikan sa Bibliya? Ang pagpamatuod hinungdanon kaayo tungod kay dili buot ang Diyos nga ikaw mahisalaag uban sa “tibuok gipuy-ang yuta.”—Pinadayag 12:9.

Gikinahanglan ba ang mga Magtutudlo?

Wala tunoli ni Jesus ang iyang mga tinun-an ug pipila ka linukot nga mga basahon ug miingon: “Ang mga tubag sa inyong mga pangutana anaa tanan diha. Pamauli na kamo ug kamo na lay pangita.” Hinunoa, siya mapailobon ug malulotong nagtudlo kanila sa pulong sa Diyos. Sa baylo, kadtong midawat sa iyang mga pagtulon-an misagop sa iyang mga paagi sa dihang sila nanudlo usab sa uban. Tagda ang pananglitan sa tinun-ang si Felipe. Siya nakigsulti ngadto sa usa ka matinud-anon-ug-kasingkasing nga Etiopianhong opisyal nga sa sayosayo nakasinati sa Kasulatan gikan sa iyang pagpakiglabot sa mga Hudiyo. Apan ang tawo nagkinahanglan ug tabang. Busa si Felipe—usa ka hawas sa Kristohanong kongregasyon—gitudlo sa pagtabang kaniya. Kon kining maong opisyal dili pa andam sa pagpakighisgot sa relihiyon, dili unta niya mahibaloan ang papel ni Jesus diha sa katuyoan sa Diyos. Pagkamaayong panig-ingnan kining Etiopianhon ngadto sa tanang nagpangita sa kamatuoran!—Buhat 8:26-39.

Andam ka bang makighisgot sa imong mga pagtuo ug sa pagpangutana sama sa gihimo niining Etiopianhon? Daghan kag makuhang kaayohan sa paghimo niini. Ang mga Saksi ni Jehova malipay sa paghisgot sa Bibliya uban sa mga tawo nga sa pagkamatinud-anon gustong mahibalo kon unsay gipamulong niini. Ang mga Saksi dili magtanyag sa ilang kaugalingong mga opinyon. Hinunoa, sila naningkamot sa pagpakita sa mga tawo kon unsay giingon mismo sa Bibliya.

Ang Etiopianhong opisyal nakakat-on ug pipila ka talagsaong mga butang bahin kang Jesu-Kristo, sama sa kon sa unsang paagi gamiton siya sa Diyos labot sa atong kaluwasan. Karong adlawa, ang katumanan sa katuyoan sa Diyos mas duol na sa kataposan niini. Ang makapukawg-kahadlok, katingalahang mga butang hapit nang mahitabo dinhi mismo sa yuta. Ang sunod nga artikulo magpakita nga ang tanan dinhi sa yuta apektado. Sa pagkatinuod, kon sa unsang paagi kita apektado nagadepende sa atong tinamdan ug sa lihok nga atong himoon.

[Footnote]

[Hulagway sa panid 7]

Usa ka Etiopianhong opisyal midawat sa panaghisgot sa Bibliya