Pagpahimulos ug Maayo sa Usa ka Epektibong “Video”
SA DIHANG 12 anyos pa lang siya, si Tillie nagpahimulos sa usa ka higayon sa pagsangyaw sa eskuylahan. Ang klase nagtuon bahin sa Gubat sa Kalibotan II, ug mitungha ang ulohan bahin sa Holocaust. Gisultihan ni Tillie ang iyang magtutudlo nga dili lamang mga Hudiyo kondili ang mga Saksi ni Jehova usab gipaantos ug gipatay nianang makalilisang nga yugto sa panahon. Misugot ang magtutudlo nga dad-on ni Tillie sa klase ang video nga Purple Triangles. Una ipasalida ang video, ang magtutudlo miingon sa klase: “Tungod sa pagkadaghan sa mga Hudiyong gipatay panahon sa Holocaust, daghang uban nga gilutos nahikalimtan. Ang mga Saksi ni Jehova nahiapil sa maong mga pundok.”
Ang magtutudlo nakadayeg kaayo sa video nga iyang gipahulaman kana sa laing magtutudlo aron magamit sa iyang klase. Si Tillie nahinumdom nga ang igsoong lalaki sa iyang magtutudlo sa kuwarto grado gipatay sa mga Nazi panahon sa Holocaust. Iyang gidala ang video ngadto sa maong magtutudlo usab, ug iyang gitan-aw kana niadtong gabhiona mismo.
Tanantanan, kapig 60 ka tawo ang nakatan-aw sa Purple Triangles, ug napukaw ang dakong interes. Kining tanan nahitabo tungod kay ang usa ka batan-ong babaye nagbaton ug kaisog sa pagpahayag mahitungod sa iyang relihiyon.—Salmo 8:2.