Usa ka Batang Babaye nga Dunay Masanag nga Paglaom
ANG mga magpapatik sa Pagmata! nakadawat ug sulat gikan sa 12-anyos nga batang babaye nga ginganlag Stephanie. “Buot nakong sultihan kamo nga ang mga publikasyon dako kaayog natabang kanako sa eskuylahan,” siya misulat. “Di pa dugay, gihatagan kami ug proyekto nga may temang ‘Pagkadaiya sa Kultura.’ Ang akong pamilya ug ako nagtuki sa mga publikasyon, nga naggunting sa mga pulong ug mga hulagway nga mohaom sa tema. Dayon akong gipatapot ang mga pulong ug mga hulagway nga among nakaplagan ngadto sa usa ka poster.” Ang magtutudlo ni Stephanie naghatag ug instruksiyon sa klase sa pagpili sa ilang gihunahuna nga lima ka kinamaayohang mga proyekto. “Pagkasunod adlaw,” si Stephanie misulat, “akong nahibaloan nga ang akong proyekto nalakip sa nangunang lima nga napili.”
Usa sa mga reperensiya nga gipili ni Stephanie mao ang Oktubre 22, 1998, nga Pagmata! nga may ulohan sa hapin nga “Maghigugmaay pa Kaha ang Tanang Tawo sa Usag Usa?” Ingong usa sa mga Saksi ni Jehova, si Stephanie hugot nga nagtuo nga ang mga tawo gikan sa nagkadaiyang mga kultura mahimo nga magkaubang magkinabuhi nga malinawon. Sa pagkatinuod, siya maoy bahin sa usa ka internasyonal nga panag-igsoonay diin ang kanhing mga magkaaway—lakip ang mga Tutsi ug Hutu, Aleman ug Ruso, Armeniano ug Turko, Hapon ug Amerikano—nahiusa tungod sa kamatuoran sa Bibliya. Sila nahiusang naningkamot sa pagsundog sa ilang Maglalalang. Sa unsang paagi? Ang usa sa mga teksto sa Bibliya nga gigamit ni Stephanie sa iyang proyekto naghatag sa tubag: “Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” (Buhat 10:34, 35) Ang mga Saksi ni Jehova naningkamot gayod sa pagpasundayag sa samang pagkadili-mapihigon diha sa ilang mga pagpakiglabot sa uban.
Si Stephanie nagpaabot sa katumanan sa saad sa Bibliya nga sa dili madugay ang Gingharian sa Diyos magpatungha ug matarong nga mga kahimtang sa atong yuta. (Pinadayag 21:3, 4) Diha sa usa ka kalibotan diin daghang batan-on nag-atubang sa umaabot uban ang kahadlok ug kawalay-katinoan, siya nalahi ingong usa nga dunay masanag nga paglaom.