Gikan sa Among mga Magbabasa
Halloween Maylabot sa inyong artikulo nga “Popular nga mga Selebrasyon—Dili-Makadaot nga Kalingawan?” (Oktubre 8, 2001), naa lang koy gustong tin-awon. Gihisgotan ninyo ang “Guy Fawkes Night,” nga ilado usab ingong bonfire night sa Britanya. Ang Guy Fawkes Night maoy usa ka pista nga angay gayong likayan sa mga Kristohanon. Kini maoy usa ka politikanhong pista, nga naghimaya sa pagpatay sa usa ka tawo. Apan bisan pag ang petsa niining pistaha (Nobyembre 5) duol ra sa Halloween ug morag nag-abot ang bonfire night ug ang Halloween, ang bonfire night dili bahin sa espiritistikanhong pista sa Halloween.
P. B., Britanya
Ang “Pagmata!” nagtubag: Ang Halloween gipili ingong pananglitan sa usa ka popular nga kostumbre nga adunay ngil-ad nga sinugdanan. Ang Pista sa Parol sa Taiwan ug ang Guy Fawkes Night gihisgotan ingong mga selebrasyon nga “kaamgid” sa Halloween sa pipila ka bahin. Apan, wala mi magpasabot nga ang bisan hain niining mga selebrasyona maoy aktuwal nga bahin sa Halloween o nga kini adunay susamang sinugdanan. Bisan pa niana, tungod sa kasamahan niini sa Halloween—usa ka selebrasyon nga klarong adunay espiritistikanhong mga kahulogan—maalamong susihon sa mga magbabasa ang mga sinugdanan niining mga pistaha sa dihang modesisyon kon angay bang moapil sa maong mga selebrasyon o dili.
Salamat sa inyong pagpasabot kon sa unsang paagi nalangkit ang Halloween sa okulto. Ang mga tawo nag-isip niini nga dili-makadaot ug makalingaw, apan ang uban nasugamak sa grabeng suliran tungod niini. Ang mga bata nga nagsuroysuroy sa magabii makahatag ug kadaot sa ilang kaugalingon o mahatagag daot nga kendi. Usa ka batang babaye nga akong silingan kinahanglang dad-on sa ospital. Ang pipila ka batan-on mibati nga ang Halloween maoy panahon sa pagsuroysuroy diha sa kadalanan ug pagdaot sa mga balay sa mga tawo. Nakaplagan sa usa ka maayog-tuyong tagbalay nga dagayang nanghatag ug mga kendi nga ang iyang pagkamanggihatagon nahimong walay-pulos; usa ka batang lalaki namakak ug sayop nga nag-akusar kaniya nga nanghatag ug daot nga kendi. Bisan pa niining tanan, usa gihapon ka dakong selebrasyon ang Halloween sa akong kasilinganan. Nanghinaot ko nga basahon unta sa tanan nakong mga silingan ang inyong ekselenteng artikulo.
G. H., Tinipong Bansa
Mga Dulaan Salamat sa balita diha sa “Pagpaniid sa Kalibotan” nga nag-ulohang “Daghan ra Kaayong Dulaan.” (Oktubre 8, 2001) Aduna koy anak nga babaye nga 15-ka-bulan ang edad kinsa dunay upat ka kahong mga dulaan diha sa iyang lawak. Magkatag lang ang tanan niyang mga dulaan, ug dili na siya makahukom kon unsay iyang dulaan. Sa dihang gipunting sa akong amahan kining artikuloha sa Pagmata! gibasa dayon nako kini ug gibinlan na lang nako ang akong anak ug tunga sa kahong dulaan. Karon nalipay na usab ang akong anak sa pagduladula sa iyang mga dulaan.
P. G., Alemanya
Leif Eriksson Buot kong pasalamatan kamo sa artikulong “Si Leif Eriksson—Nakadiskobre sa Amerika?” (Septiyembre 22, 2001) Nagtuon kami bahin kang Columbus sa among mga leksiyon sa history. Sa dihang giingnan mi sa akong maestro nga si Columbus mao ang nakadiskobre sa Amerika, akong giisa ang akong kamot ug miingon nga akong nabasa nga si Leif Eriksson lagmit mao ang nakadiskobre sa Amerika 500 ka tuig nga sayosayo pa. Mihimo akog dugang panukiduki, nga nag-imprentag kopya sa ubang mga artikulo sa Pagmata! bahin kang Columbus. Gibasa kana sa akong magtutudlo ug nakadayeg siya sa tanan kong nakaplagang impormasyon.
M. D., Alemanya
Pagbasa sa Bibliya Salamat sa artikulo nga “Mga Batan-on Nangutana . . . Unsaon Nako Paghimo nga Mas Makalingaw ang Pagbasa sa Bibliya?” (Agosto 22, 2001) Gihunahuna ko gayod nga makalaay ang pagbasa sa Bibliya ug nga dili ko gayod mahurot pagbasa kanang baga nga libro. Apan sa dihang tungod niining artikuloha gisulayan nako pagbasa ang Bibliya, akong nakaplagan nga kini makalingaw kaayo. Karon regular na akong nagbasa sa Bibliya.
M. S., Alemanya