Naimpluwensiyahan ba sa mga Numero ang Imong Kinabuhi?

DUNA bay natagong kahulogan ang mga numero? “Siyempre!” moingon ang uban, nga maghisgot bahin sa usa ka talagsaong pananglitan​—ang pag-atake sa mga terorista niadtong Septiyembre 11, 2001.

“Pagkadungog nako sa balita,” matod sa usa ka numerologo o tighubad sa kahulogan sa mga numero, “namatikdan nako ang petsa: 9-11-2001.” Ang numero 11 kasagarang giisip sa mga numerologo ingong usa sa “yawing mga numero.” Busa ang mga maikagon sa numerolohiya naghimog listahan sa lainlaing mga butang nga nalangkit sa pag-atake sa mga terorista nga mopunting sa “yawing numero” nga 11. Kini maoy bahin lamang sa ilang nakaplagan:

▪ Ang trahedya nahitabo sa petsang 9/11. . . . 9 + 1 + 1 = 11.

▪ Ang Septiyembre 11 mao ang ika-254 nga adlaw sa tuig. . . . 2 + 5 + 4 = 11.

▪ Ang ayroplano nga mibangga sa north tower maoy Flight 11.

▪ Ang maong biyahe may 92 ka pasahero. . . . 9 + 2 = 11.

▪ Ang ayroplano nga mibangga sa south tower may 65 ka pasahero. . . .6 + 5 = 11.

▪ Ang Twin Towers morag numero 11 tan-awon.

▪ Sa Iningles ang ekspresyon nga “New York City” dunay 11 ka letra.

Ang numerolohiya​—diin gihatagan ug linaing kahulogan ang mga numero, mga kombinasyon niini, ug total niini​—kaylap nga ginahimo sa Aprika, Asia, ug sa kayutaan sa Amerika. Nganong daghang tawo ang nadani sa numerolohiya? Sumala sa usa ka Web site, ang pagsusi sa kahulogan sa mga letra sa alpabeto nga gigamit diha sa mga ngalan​—usa ka popular nga bahin sa numerolohiya​—“naghatag ug tukmang impormasyon bahin sa personalidad, kinaiya, mga hiyas ug mga kasaypanan sa usa ka tawo.” Sumala niining maong tinubdan, ang pagtuon sa atong “petsa sa pagkatawo magpadayag sa atong dalan sa kinabuhi, uban sa mga kalipay ug mga pagsulay niini.”

Tinuod ba kining maong mga pangangkon? O aduna bay natagong mga kapeligrohan sa metapisikong pagtuon sa mga numero?