Ang Lisod Dakpon nga “Coelacanth”
TINAMPO SA MAGSUSULAT SA PAGMATA! SA KENYA
NIADTONG Abril 2001, usa ka baye nga coelacanth (litokon ug see-la-kanth) nadakpan sa lawod sa Kenya.a Ang isda maoy 1.7 metros ang gitas-on ug may gibug-atong 77 kilos. Ang coelacanth mailhan tungod sa tulo ka nagbawog nga siwilsiwil sa ikog ug sa asul nga kolor niini nga dunay puti nga puntikpuntik.
Gituohan kaniadto nga ang coelacanth dugay na kaayong napuo. Dayon niadtong 1938, usa ka coelacanth ang nadakpan sa lawod sa Habagatang Aprika. Ang pagkadiskobre niini maoy usa sa labing katingalahang mga kaplag sa zoolohiya sa ika-20ng siglo. Hangtod niadtong panahona, ang isda nailhan lamang gikan sa fossil nga mga rekord. Sukad nga unang nadakpan kini, dihay ubang mga coelacanth nga nakita duol sa Mozambique ug Madagascar. Daghan usab niini ang nakita diha sa Kapuloan sa Comoro.
Ang baye nga mga coelacanth dili mangitlog nga mapusa diha sa tubig. Hinunoa, sila maoy mga ovoviviparous—magpatunghag mga itlog nga motubo ug mapusa sulod sa lawas sa baye o human gilayon sa pagpagawas niini. Napulog-pito ka itlog—ang matag usa sama ka dako sa bola sa tenis—nakuha gikan sa baye nga nadakpan sa miaging tuig.
Ang mga linalang sa dagat sama sa coelacanth naghimaya sa panagkalidadis nga disenyo sa kalalangan ug sa kaalam sa Maglalalang niini, si Jehova nga Diyos.—Salmo 148:7.
[Footnote]
a Ang ngalang coelacanth gikuha gikan sa Gregong mga pulong nga koilos (bangagan) ug akantha (taludtod), nga naghubit sa may buho nga silik sa isda.
[Picture Credit Line sa panid 23]
Photo and drawings: Ichthyology Department/NATIONAL MUSEUMS OF KENYA