Kaalam Alang sa Pagkinabuhi Diha sa Komplikadong Kalibotan

“Ang Diyos nagahatag ug kaalam ug kahibalo ug kalipay ngadto sa tawo nga makapahimuot kaniya.”​—ECCLESIASTES 2:26, THE NEW ENGLISH BIBLE.

DILI sayon ang paghimog maalamon, subay sa prinsipyo nga mga desisyon diha sa kalibotan sa medisina ug teknolohiya nga nagkaanam ka komplikado. Tagda ang pipila ka bag-ong mga kaugmaran nga nakapukaw ug panaglantugi. Mahimo nang taposon karon sa mga babaye ang wala-kinahanglanang pagmabdos pinaagi lamang sa pagtomar sa “pildora sa pagkabuntag.” Gibungkag sa mga siyentipiko ang babag sa gene, nga tungod niini mabag-o na nila ang mga tanom ug mananap. Ang mga laboratoryo nag-indigay sa pagbaton ug pertilisadong mga binhi sa tawo aron makakuha sa bililhong mga stem cell, nga gilaoman sa daghang tawo nga makapahinabog kausaban sa natad sa medisina.

Tungod sa maong mga paningkamot sa pagmaniobra sa kinaiyahan daghang tawo ang nahadlok ug, mas hinungdanon pa, nalibog maylabot sa moralidad ug prinsipyo. Kining maong mga epekto nagpahinumdom kanato sa giingon sa Bibliya: “Dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Oo, maingon nga ang mga bata nagkinahanglag giya gikan sa mga ginikanan, ang tanang tawo nagkinahanglag tabang gikan sa atong langitnong Amahan aron makalakaw nga maalamon.​—Proverbio 1:33.

Kaalam nga Mabatonan Pinaagi sa Pagpamati sa Diyos

Kita mamati sa Diyos pinaagi sa pagbasa ug pagpadapat sa iyang sinulat nga Pulong. Tinuod, ang Bibliya dili espesipikong naghisgot sa tanang komplikadong medikal ug siyentipikanhon nga mga isyu nga giatubang nato karon. Bisan pa niana, ang mga prinsipyo niini, nga magpabilin hangtod sa hangtod, makatabang kanato sa pagkab-ot sa hustong mga konklusyon.​—1 Pedro 1:25.

Pananglitan, tagda ang debate maylabot sa mga human embryonic stem cell. Sa nakita na nato, kini gikuha pinaagi sa pagpatay sa pertilisadong binhi. Mahitungod sa gipatungha niining panagbangi maylabot sa prinsipyo, si Francis Collins, direktor sa National Human Genome Research Institute sa Tinipong Bansa, nag-ingon: “Kana maoy usa ka kasagarang pananglitan sa panagbangi tali sa duha ka hinungdanong mga prinsipyo. Ang usa mao ang pagkabalaan sa kinabuhi sa tawo ug ang lain mao ang atong obligasyon ingong mga tawo nga hupayon ang pag-antos ug tambalan ang grabeng mga sakit . . . Daghang tawo ang mibati, sa akong hunahuna nga dunay maayong rason, nga kining matanga sa panukiduki naglapas sa ideya sa pagkabalaan sa kinabuhi sa tawo, pinaagi sa pagmaniobra sa mga selula nga gikuha gikan sa pertilisadong binhi sa tawo.”

Ang Bibliya motabang kanato labot niining komplikadong isyu pinaagi sa pagpadayag sa panglantaw sa Diyos sa wala pa matawong bata. Sa karaang Israel kon ang usa ka babayeng mabdos nasamdan sa laing tawo ug siya o kaha ang iyang gimabdos namatay tungod niini, giisip sa Diyos ang maong tawo ingong mamumuno. Kanang tawhana kinahanglang magbayad ug “kalag alang sa kalag.”a (Exodo 21:​22, 23) Busa, makahinapos kita nga alang sa Maglalalang ang tanang kinabuhi sa tawo balaan, lakip na nianang sa wala pa matawong bata. Gani, ang kaikag sa Diyos kanato nagsugod sa dihang kita anaa pa sa tagoangkan, sumala sa gipadayag sa salmista: “Ang imong mga mata nakakita bisan sa binhi pa ako sa tagoangkan, ug ang tanan nga bahin niini nahisulat diha sa imong basahon.”​—Salmo 139:16.

Bisan pa sa dakong pag-uswag sa teknolohiya nga nahimo sa mga tawo, ang Bibliya nagtabang kanato sa pagbaton ug timbang, realistikanhon nga tinamdan ngadto sa mga tawo ug sa ilang mga kalamposan. Kini nag-ingon: “Ayaw pagsalig sa mga prinsipe, ni kang bisan kinsang tawo, nga walay gahom sa pagluwas. Siya mabugtoan sa iyang gininhawa, siya mobalik sa abog; ug nianang taknaa ang tanan niyang hunahuna mahanaw.” (Salmo 146:​3, 4, New English Bible) Alang sa pipila, kining maong pahayag morag nagpakitag kawalay-paglaom. Apan nagpakita ba gayod kinig kawalay-paglaom? Dili ba kana maoy madayganon lamang nga pagpahayag sa kamatuoran? Mao gayod, kay bisan ang labing episyenteng tawo dili makapugong sa iyang pagtigulang, pagkasakit, ug sa ngadtongadto pagkamatay​—labi na gayong dili makapugong sa uban sa pagkaagom niana.

Apan, ang Maglalalang walay mga limitasyon nga sama kanato. Gawas pa, siya adunay “gahom sa pagluwas” ug tinguha sa pagbuhat niana. Si Jesus miingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Aron hatagan kita ug pasukaranan sa ‘pagpasundayag ug pagtuo,’ sa dinhi pa si Jesus sa yuta iyang giayo ang mga masakiton ug mga baldado nga miduol kaniya. Aw, gibanhaw pa gani niya ang mga patay!​—Lucas 7:​21, 22.

Ang gibuhat ni Jesus nagsilbing pasiuna sa dakong programa sa Diyos sa pagpang-ayo, nga magsugod sa dihang ang iyang Gingharian bug-os na nga magmando sa yuta. Mao kiniy gipangayo sa mga tawo sa dihang sila nag-ampo sa kasagarang gitawag nga Pag-ampo sa Ginoo. Sa pagkatinuod, pinaagi lamang sa Gingharian sa Diyos​—ang langitnong kagamhanan sa Diyos diha sa mga kamot ni Jesu-Kristo​—nga matuman ang kabubut-on sa Diyos dinhi sa yuta.​—Daniel 2:44; Mateo 6:​9, 10.

Wala ka ba matugob sa paglaom niining mga saara? Ug buot ba nimong buhaton ang imong kinamaayohan aron sa pagpahimuot sa Diyos karon pinaagi sa pagsusi sa iyang mga panglantaw bahin sa daghang lisod nga mga isyu nga giatubang nato? Kon mao, gidasig ka namo sa pagpamati ug pagsunod sa Pulong sa Diyos. Sa pagkatinuod kini maoy kaalam alang sa pagkinabuhi​—oo, alang sa walay-kataposang kinabuhi.​—Juan 17:3; 2 Timoteo 3:16.

[Footnote]

[Mga hulagway sa panid 10]

Ang Bibliya naghatag ug giya karon ug usa ka seguradong paglaom sa hingpit nga kinabuhi sa umaabot