Kon sa Unsang Paagi ang Bibliya Makatabang sa mga Diabeteson
ANG pagpugong-sa-kaugalingon ug ang usa ka positibong panglantaw ilabinang hinungdanon sa kahimsog ug kaayohan sa mga tawong diabeteson. Apan aron maugmad ang maong mga hiyas, ang mga diabeteson nagkinahanglan ug padayong pagpaluyo. Busa ang mga membro sa pamilya ug mga higala dili angayng maghaylo sa tawong diabeteson sa pagkaon ug dili angayang pagkaon, nga tingali moingon, ‘Dili ka maunsa ini. Karon ra bitaw.’ “Maayo ang pagpaluyo kanako sa akong asawa,” miingon si Harry, kinsa dunay sakit sa kasingkasing ug Type 2 nga diabetes. “Dili siya magtenir ug pagkaon diha sa balay nga dili nako angayng kaonon. Apan ang uban dili makasabot, ug wala sila mahibalo kon unsa ka lisod usahay ang pagpugong kon makita nimo diha sa balay ang pagkaon nga gidili kanimo.”
Kon kanunay kang makig-uban sa usa ka tawong diabeteson, hinumdomi ang mosunod nga duha ka maanindot nga mga prinsipyo nga makita diha sa Bibliya: “Magpadayon pagpangita ang matag usa, dili sa iyang kaugalingong kaayohan, kondili nianang sa laing tawo,” ug “Ang gugma . . . dili mangita sa kaugalingong kaayohan niini.”—1 Corinto 10:24; 13:4, 5.
Ang tanan nga nabalaka sa ilang panglawas—may diabetes man sila o wala—kinahanglang magpakitag pagpugong labot sa pagkaon. Ang Bibliya makatabang niining bahina, kay nagpunting kini sa panginahanglan sa matag usa kanato sa pag-ugmad sa pagpugong-sa-kaugalingon. Nakahukom ka ba sa pag-ugmad niining hiyasa diha sa imong kinabuhi? (Galacia 5:22, 23) Ang dugang tabang mahimong maggikan sa mga panig-ingnan diha sa Bibliya, sama sa Kristohanong apostol nga si Pablo. “Siya may permanenteng tunok sa unod,” matod sa usa ka diabeteson, “bisan pa niana nag-alagad gihapon siya sa Diyos nga matinumanon ug sa bug-os nga paagi. Makahimo sab ko ana!”
Oo, gidawat ni Pablo ang kahimtang nga dili niya mausab ug nakapahimulos ug dakong kalamposan ingong misyonaryo. (2 Corinto 12:7-9) Si Dustin, 18 anyos, maoy buta sukad sa pagkatawo, ug diabeteson na sukad sa edad nga 12. Siya misulat: “Ako nahibalo nga walay tawo niining kalibotana nga nakabaton sa tanang gusto niya. Nagpaabot ako sa panahon didto sa bag-ong kalibotan sa Diyos diin wala na koy diabetes. Alang kanako, kini temporaryo lamang. Mas dugay tingali kining maayo kon itandi sa sip-on o trangkaso, apan sa ngadtongadto kini matapos.”
Sa pagsulti niana, gihunahuna ni Dustin ang pinasukad-sa-Bibliya nga paglaom sa hingpit nga panglawas diha sa usa ka paraisong yuta ilalom sa Gingharian sa Diyos. (Pinadayag 21:3, 4) Ang Pulong sa Diyos nagsaad nga ilalom nianang langitnong pagmando, “walay pumoluyo nga moingon: ‘Ako masakiton.’” (Isaias 33:24; Mateo 6:9, 10) Gusto ba nimong makakat-on ug dugang bahin niining pinasukad-sa-Bibliya nga saad? Kontaka ang mga Saksi ni Jehova sa imong dapit, o pagsulat sa mga magpapatik niining magasina sa nahiangay nga adres nga nalista sa panid 5.
[Hulagway sa panid 12]
Hinungdanon ang pagpugong-sa-kaugalingon ug ang positibong panglantaw