Ang Imong Panit—Samag Usa ka “Paril sa Siyudad”
Ang mga molupyo sa karaang mga siyudad magtukod ug mga paril agig panalipod aron dili makasulod ang mga manunulong. Ang paril sa siyudad nagsilbing panagang batok sa mga kaaway ug ingong kuta nga pinaagi niana mapanalipdan sa mga tigdepensa ang siyudad. Ang imong lawas nasangkapan usab ug “paril” agig panalipod—ang imong panit. Sa unsang paagi mapanalipdan ka sa imong panit batok sa mga manunulong?
Ang ibabawng bahin sa imong panit punog mga bakterya ug uban pang gigming nga mga organismo, nga ang pipila niini maoy hinungdan sa impeksiyon ug sakit. Dayag nga ang imong panit dili lang kay panagang nga walay laing silbi. Mopatim-aw nga masanta niini ang mga manunulong pinaagi sa pagpatungha ug kontra-mikrobyo nga mga protina, o mga peptide, nga maoy magsilbing mga tigdepensa. Ang pipila niini kanunayng nagbantay. Ang uban motungha kon ang panit masamad.
Ang unang duha ka grupo sa kontra-mikrobyong mga peptide nga nadiskobrehan, nga gitawag ug mga defensin ug cathelicidin, maoy mga tigdepensa nga molihok kon kini gikinahanglan. Kining duha ka grupo ipatungha sa mga selula diha sa ibabawng bahin sa panit kon kini masamad o mohubag. Ilang patyon ang mga manunulong pinaagi sa pagtusok sa nipis nga hapin sa mga selula niini.
Sa 2001 ang tem sa mga tigpanukiduki sa University of Tübingen, Alemanya, nakadiskobre ug laing matang sa kontra-mikrobyo nga protina, nga gitawag ug dermicidin, nga aktibo sa tanang panahon. Dili sama sa laing duha ka grupo, ang dermicidin ipatungha sa himsog nga panit, diha sa mga glandula sa singot. Wala pa masayri kon sa unsang paagi moobra kining maong protina. Apan tungod kay ang singot motabang sa pagpakig-away batok sa sakit, mao tingali kini ang rason kon nganong ang mga tawong sobra ka hingaligo mas daling mataptan ug mga impeksiyon ug hubaghubag sa panit.
Sama sa usa ka paril sa karaang siyudad, ang atong panit maoy usa ka panalipod batok sa manunulong nga mga kaaway. Seguradong mouyon ka sa salmista kinsa miingon: “Pagkadaghan sa imong mga buhat, Oh Jehova! Sa kaalam gibuhat mo silang tanan.”—Salmo 104:24.