Nakaeskapar Sila sa Pagbaha!

Tinampo sa magsusulat sa Pagmata! sa Switzerland

SA Oktubre 2000, ang mga taho sa pagbaha nadungog gikan sa lainlaing mga dapit sa kalibotan. Tungod sa pagbunok sa ulan nabasa pag-ayo ang mga bakilid ug midahili ang yuta apil na ang tanang matang sa mga anod ug bisan tibuok mga kahoy!

Ang maong katalagman nahitabo sa estado sa Valais sa habagatang Switzerland. Kining maong luna gibahin nga pinabuyon sa Rhône, usa ka suba nga nag-agos pakasadpan gikan sa Rhône glacier sa Central Alps paingon sa Lake Geneva​—nga may gilay-ong mga 170 kilometros. Ang tubig sa ulan gikan sa mga kutay sa kabukiran sa masigkatampi sa suba moagos ngadto sa suba pinaagi sa daghan kaayong sapasapa nga lainlaig gidak-on. Kasagaran, kining maong agosanan hapsay nga nagaobra. Apan sa dihang ang sobrang ulan mosanap sa enterong dapit, subsob nga mahitabo ang kalamidad.

Mao kiniy nahitabo sa Gondo, sa utlanan sa Italya. Kining maong balangay sa bukid nga adunay 150 ka molupyo nakaagom sa pagdahili sa lapok ug mga bato nga nakagun-ob sa dakong bahin sa maong balangay. Sa wala madugay ang ubang mga dapit sa Valais gilunopan tungod sa sigeng pagbunok sa ulan. Ang mga dalan ug mga riles naalihan, ug ang kabalayan nasudlag lapok ug mga bato. Diha sa pipila ka dapit ang lapok miabot ug upat ka metros ang gihabogon. Ang usa ka babaye nakakita sa dihang midahili ang lapok nga kapin sa 30 metros ang gihabogon dala ang dagkong mga bato ug nagbarog nga mga kahoy paingon gayod sa iyang balangay!

Ang magtiayong Markus ug Tabitha nagpuyo sa Mörel sa panahon sa maong katalagman. “Nakamata mig pasado alas 6:00 s.b. tungod sa lagubo ug pag-uyog,” nahinumdom si Markus. “Migawas ko nga nagdalag plaslayt aron sa pagsusi, ug nakurat ko sa akong nakita. Ang mga balay ug mga taytayan nangaguba tungod sa dagkong mga bato, ug ang usa ka awto nahandos ngadto sa balay sa usa ka silingan. Sa unahan, nakaplagan nako ang usa ka silingan ug ang iyang asawa nga natanggong sa ilang balay. Gitabangan nako sila sa paggawas agi sa bentana. Pagpauli nako, si Tabitha ug ako igo na lang nakapanghipos ug pipila ka mga butang.”

Si Markus ug Tabitha maoy mga Saksi ni Jehova, ug sila midangop sa mga isigkamagtutuo nga layo sa peligro ang nahimutangan. “Bisan tuod nakaeskapar mi,” matod ni Markus, “wala maulii si Tabitha sa iyang gibati sa maong hitabo sulod sa pipila ka adlaw.” Unsay nakatabang kaniya sa paglahutay niining malisod nga kasinatian? “Ang pagpakig-uban ug ang pagpaluyo sa among mga igsoong lalaki ug babaye sa pagtuo,” tubag ni Tabitha, nga midugang: “Mao man usab ang kaikag nga gipakita sa daghan diha sa among silinganan.”

Tungod niini nahinumdoman ni Markus ug Tabitha ang Proverbio 18:​24, nga nag-ingon nga adunay “higala nga mounong labaw pa kay sa usa ka igsoon.” Sa panahon sa katalagman, pagkabililhon sa maong mga higala!

[Mapa sa panid 20]

(Alang sa aktuwal nga pagkahan-ay, tan-awa ang publikasyon)

Lugar nga naapektahan

Gondo

[Hulagway sa panid 20]

Si Markus ug Tabitha

[Picture Credit Line sa panid 20]

Mise à disposition par www.crealp.ch