Pagkinabuhi nga May Kahadlok

SI Roxanaa mahadlok nga mosulti sa iyang bana nga gusto siyang motrabahog partaym. Sa dihang nangayo siyag kuwarta sa iyang bana aron iplete sa bus kay moduaw siya sa iyang inahan, gisumbag siya sa iyang bana mao nga kinahanglan siyang magpatambal. Si Roxana kanunayng nagkinabuhi diha sa kahadlok.

Gitugotan kaniadto ni Rolando ang iyang asawa nga mosakay sa depasaherong sakyanan inigpauli niya sa gabii, apan karon iya nang kuhaon ang iyang asawa ginamit ang ilang awto. Daghan na kaayong balita bahin sa kapintasan diha sa kasilinganan nga tungod niana nahadlok siya basig dunay mahitabo sa iyang asawa.

Si Haidé nagtrabaho diha sa sentro sa usa ka kaulohang siyudad. Kas-a sa dihang mopauli na unta siya, nataliwad-an siya sa mga demonstrador nga nagkagubot. Karon sa dihang makadungog siyag mga demonstrador nga molabay, makulbaan na siya. “Wala na ko mobating luwas,” matod pa niya. “Di na ko gustong motrabaho dinhi. Apan wala koy kapilian.”

Si Roxana, Rolando, ug Haidé naapektohan sa kahadlok​—ug dili lang sa dihang may wala-damhang panghitabo. Kini kanunayng nakaapektar kanila. Sa dihang ang mga tawo mapugos sa pagkinabuhi nga may kahadlok, hayan mobati silag kaluya. Ang kahadlok makawala sa ilang kalipay tungod kay mapugngan sila sa pagbuhat kon unsay ilang gusto. Ang kahadlok mao nay magpasulabi sa ilang hunahuna ug magpugong kanila sa pagsentro sa ilang pagtagad sa ubang mga butang.

Makapahigwaos gayod ang pagkinabuhi nga may kahadlok. Kini subsob nga moresulta sa depresyon ug makadaot sa kahimsog sa usa ka tawo. “Ang kapit-os makadaot sa sistema sa imyunidad ug maoy usa ka hinungdan nga motungha ang daghang sakit,” matod pa sa usa ka magasin bahin sa kahimsog. “Sa kadugayan madaot ang lawas, ilabina diha sa maapektohan nga mga organo. Mahimong motungha ang alta-presyon, sakit sa kasingkasing, sakit sa rinyon, sakit sa tiyan ug tinai, ulser, labad sa ulo, pagkadili-makatulog, depresyon, ug pagkabalaka. Maluya ka gayod kon dugaydugay ka nang nakasinati niining kahimtanga.”

Niining kalibotana karon, ordinaryo na lang para sa mga tawo ang pagkinabuhi nga may kahadlok. Makakita pa kaha kitag kalibotan diin ang mga tawo makatagamtam ug kinabuhi nga walay kahadlok?

[Footnote]