Mga Batan-on Nangutana . . .

Sa Unsang Paagi Makalikay Ako sa Pagpakigsekso Diha sa Eskuylahan?

“Kada adlaw, ang mga estudyante mag-estorya bahin sa sekso. Mga babaye pa gani ang moduol sa mga lalaki, ug makigsekso sila diha mismo sa eskuylahan.”​—Eileen, 16.

“Sa among eskuylahan, ang mga homoseksuwal mohimog imoral nga mga buhat nga makita sa ubang mga estudyante ug wala ra mag-isip niini nga sayop.”​—Michael, 15.a

ANG imo bang mga klasmet magsigeg estorya bahin sa sekso? Ang pipila ba kanila makigsekso pa gayod? Kon mao, imong gibati ang sama sa gibati sa usa ka tin-edyer nga babaye nga nagtandi sa iyang pagkaanaa sa eskuylahan ngadto sa “pagtrabaho diha sa usa ka estudio nga himoanan ug X-rated nga pelikula.” Ang tinuod mao nga sa eskuylahan ang mga batan-on adunay daghang kahigayonan sa paghisgot bahin sa sekso o sa pagpakigsekso pa gani.

Imo tingaling madunggan ang imong mga klasmet nga mag-estorya bahin sa “hooking up”​—usa ka termino nga nagkahulogan ug pagpakigsekso nga walay bisan unsang obligasyon. Sa pipila ka kahimtang, ang mga batan-on makigsekso uban sa dili kaayo nila kaila. Sa ubang mga kahimtang, sila makigkita aron makigsekso sa dili gayod nila kaila nga ilang nakaila lamang sa Internet. Nianang duha ka kahimtang, walay gugma nga nalangkit. “Kini nagpasabot lamang sa pagtagbaw sa ilang lawasnong mga kailibgon,” nag-ingon ang 19-anyos nga si Danielle.

Dili ikatingala nga ang pagpakigsekso nahimong sumsoman sa estorya diha sa daghang eskuylahan. “Human sa matag hinapos sa semana, ang mga pasilyo daw mapuno sa mga estudyante nga maikagong nag-estorya bahin sa kinaulahiang balita sa pagpakigsekso, diin ang bug-os nga mga detalye isugid nila sa ilang mga higala,” misulat ang 17-anyos nga babaye diha sa ilang mantalaan sa eskuylahan.

Kon naningkamot ka sa pagkinabuhi subay sa mga sukdanan sa Bibliya, mobati ka gayong nalahi kay gipalibotan ka sa mga tawo nga wala ray laing giestoryahan kondili sekso. Ug kon dili ka moduyog kanila, ila ka dayong biaybiayon. Sa usa ka sukod angay kining dahomon, kay ang Bibliya nag-ingon nga kon ang uban dili makasabot sa imong pagkinabuhi, sila lagmit ‘mosulti nga mapasipalahon kanimo.’ (1 Pedro 4:​3, 4) Bisan pa niana, walay ganahang biaybiayon. Busa sa unsang paagi makalikay ka sa pagpakigsekso diha sa eskuylahan ug mahuptan gihapon nimo ang hustong pagtamod bahin sa imong baroganan? Una, hinungdanon nga imong masabtan kon nganong kusganon kaayo ang seksuwal nga tentasyon.

Ilha ang Imong Kaugalingon

Panahon sa pagkatin-edyer, makasinati kag kusog nga kausaban, sa pisikal ug emosyonal. Samtang anaa ka sa maong kahimtang, makasinati kag kusganong agda sa sekso. Ayawg kabalaka kay normal lang kini. Kon duna kay gikaibgan sa inyong eskuylahan, ayaw kanag sabta nga daotan o nga wala kay katakos sa pagpabiling hinlo sa moral. Mahuptan nimo ang kaputli kon buot nimo!

Gawas pa sa pagpakigbisog sa imong galamhan nga maoy bahin sa pagkatin-edyer, duna pay laing butang nga angay nimong mahibaloan. Kay dili hingpit, ang tanang tawo nakiling sa paghimog daotan. Bisan si apostol Pablo miangkon: “Nakita ko sa akong mga sangkap ang laing balaod nga nakigbugno batok sa balaod sa akong hunahuna ug nagbihag kanako ngadto sa balaod sa sala nga ania sa akong mga sangkap.” Ang giingon ni Pablo mao nga ang iyang pagkadili-hingpit maoy nagpabati kaniya nga “alaot.” (Roma 7:​23, 24) Apan siya nakadaog sa maong pagpakigbisog, ug makadaog ka usab!

Sabta ang Imong mga Klasmet

Sama sa gihisgotan ganina, ang imong mga klasmet tingali kanunay na lang mag-estorya bahin sa sekso o manghambog pa gani nga nakasulay na kono sila. Pagbantay sa ilang dili maayong impluwensiya. (1 Corinto 15:33) Apan ayawg isipa ang imong mga klasmet nga imong mga kaaway. Ngano man?

Sila adunay mga tinguha nga sama sa imo. Sila usab nakiling sa pagbuhat ug daotan. Apan sila lahi kanimo kay ang pipila kanila lagmit “mga mahigugmaon sa kalipayan inay nga mga mahigugmaon sa Diyos.” O sila lagmit naggikan sa mga pamilya nga “walay kinaiyanhong pagbati” sa usag usa. (2 Timoteo 3:1-4) Ang pipila sa imong mga klasmet tingali kulag mahigugmaong disiplina ug moral nga pagbansay nga itagana sa mahigugmaong mga ginikanan.​—Efeso 6:4.

Kay walay mas taas nga tuboran sa kaalam nga dali ra nimong mabatonan​—ang Pulong sa Diyos, ang Bibliya​—ang imong mga klasmet lagmit wala mahibalo sa kadaot nga moresulta kon magpadaog sa unodnong tinguha. (Roma 1:​26, 27) Kini daw sama ra nga ang ilang mga ginikanan naghatag kanilag kusog-modagan nga awto ug gipadrayb sila sa haywey nga daghag sakyanan​—apan wala sila tudloi kon unsaon pagdrayb. Ang ilang pagdrayb daw nakapahinam kanila sa makadiyot, apan seguradong magsunod dayon ang disgrasya. Busa, unsay imong himoon kon ang imong mga klasmet magsugod sa pag-estorya bahin sa sekso nga anaa ka o mosulay sa pagpugos kanimo sa pagduyog kanila sa ilang imoral nga binuhatan?

Biyai ang Imoral nga Panag-estorya

Kon ang imong mga klasmet mosugod na sa pag-estorya ug imoral nga pakigsekso, lagmit matental ka sa pagpaminaw ug pagduyog sa panag-estorya​—aron dili ka konohay malahi. Apan palandonga kon unsay ilang hunahunaon bahin kanimo. Ang imo bang interes sa pagpaminaw sa ilang ginaestoryahan magpadayag sa imong tinuod nga pagkatawo o sa pagkatawo nga gusto nimong mailhan ka?

Nan, unsay angay nimong himoon kon ikaw nalangkit sa panag-estorya nga maghisgot nag imoral nga pakigsekso? Angay ka bang motindog ug mobiya? Angay gayod! (Efeso 5:​3, 4) Ang Bibliya nag-ingon: “Maalamon ang tawo nga nakakita sa katalagman ug nagtago sa iyang kaugalingon.” (Proverbio 22:3) Busa kon mobiya ka sa maong panag-estorya, ikaw wala magbinastos​—ikaw nagmaalamon.

Busa, ayawg kaulaw kon imong biyaan ang imoral nga panag-estorya. Seguradong aduna pay laing matang sa mga panaghisgot nga gusto nimong biyaan nga dili ka angayng maulaw, ilabina kon wala kay interes sa gihisgotan o kon dili ka gustong makigbahin niana. Pananglitan, ingnon ta nga ang usa ka grupo sa imong mga klasmet naghisgot ug pagpanulis. Magpabilin ka ba ug maminaw sa ilang plano? Kon magpabilin ka, isipon ka nga ilang kakunsabo. Busa, maalamon kon ikaw mobiya. Ingon usab niana ang buhata kon imoral nga pakigsekso na ang estoryahan. Kasagaran, makakita kag paagi sa pagbiya nga dili isipong nagpakamatarong sa kaugalingon ug nag-aghat sa pagbiaybiay.

Tinuod, dili ka tingali kanunayng makabiya sa usa ka situwasyon. Pananglitan, ang mga batan-on nga gipalingkod duol kanimo mosulay tingali sa pagpaapil kanimo sa ilang panag-estorya bahin sa sekso. Nianang kahimtanga, sultihi sila sa prangka ug matinahorong paagi nga dili ka nila apil-apilon. Kon kana dili mosaler, sulayi ang gihimo ni Brenda. “Mataktikanhon nakong gihangyo ang akong magtutudlo nga ibalhin akog laing lingkoranan,” siya miingon.

Magmasinaboton

Sa madugay o sa madali, ang pipila sa imong mga klasmet magpahayag sa ilang kaikag kon nganong dili ka moduyog kanila sa ilang law-ay nga mga panag-estorya. Kon mangutana sila bahin sa imong mga prinsipyo, tubaga sila sa masinaboton nga paagi. Tinuod, ang pipila mangutana lang aron sa pagbiaybiay kanimo imbes sabton ang imong panghunahuna. Apan kon ang motibo sa usa nga nangutana daw tininuod, mapasigarbohong isulti kaniya ang imong mga gituohan. Daghang batan-on naggamit sa librong Mga Pangutanang Gisukna sa mga Batan-on​—Mga Tubag nga Mosaler aron matabangan ang ilang mga klasmet nga makasabot sa mga kaayohan sa pagkinabuhi subay sa mga sukdanan sa Bibliya.b

Magmadeterminado

Unsay angayng nimong himoon kon ang imong isigkaestudyante mamugos gayod sa paghikap o paghalok kanimo? Kon imong tugotan siya sa paghimo niini, imo pa hinuong gidasig siya sa pagpadayon sa maong sayop nga buhat. Ang Bibliya naghisgot bahin sa usa ka batan-ong lalaki nga nagtugot sa usa ka imoral nga babaye sa paghawid ug paghalok kaniya. Gipaminaw sa batan-on ang iyang maulog-ulogong mga pangagda sa sekso. Unsay resulta? “Sa takulahaw lamang siya misunod kaniya, sama sa usa ka torong baka nga nagapadulong sa pagkaihaw.”​—Proverbio 7:13-23.

Sa kasukwahi, tagda kon unsay gihimo ni Jose sa susamang kahimtang. Ang asawa sa iyang agalon kanunayng naghaylo kaniya, apan siya hugot nga nagsalikway kaniya. Sa dihang sa ngadtongadto iyang gihawiran si Jose, siya mikalagiw dayon.​—Genesis 39:7-12.

Sama kang Jose, kinahanglan ka tingaling mohimog kusganong mga lakang kon ang imong klasmet o usa nga imong kaila mosulay sa paghikap kanimo sa dili-angay nga paagi. “Kon dunay lalaki nga mosulay paghikap kanako, ako siyang badlongon,” matod ni Eileen. “Kon dili siya magpatuo, ako siyang singkahan nga dili mohikap kanako.” Mahitungod sa mga batan-ong lalaki sa iyang eskuylahan, si Eileen midugang: “Dili ka nila tahoron gawas kon mohimo kag lakang aron sila motahod kanimo.”

Tahoron ka usab sa imong mga klasmet kon ikaw dili maminaw sa imoral nga mga panag-estorya, matinahorong magpatin-aw sa imong baroganan kon nahiangay, ug kon imong isalikway gayod ang imoral nga mga pangagda. Ang lain pang kaayohan mao nga malipay ka sa imong kaugalingon. Labaw sa tanan, malipay si Jehova kanimo!​—Proverbio 27:11.

[Mga footnote]

ANGAYNG HINUKTOKAN

◼ Unsay angay nimong isulti aron makabiya ka sa imoral nga panag-estorya?

◼ Unsay angay nimong isulti ug himoon kon ang imong klasmet magbirigbirig kanimo?

[Hulagway sa panid 27]

Kon ang estoryahan bahin na sa pagpakigsekso, biya dayon

[Hulagway sa panid 28]

Isalikway gayod ang imoral nga mga pangagda