Nakalingkawas Sila sa Pag-atake sa mga Terorista sa Mumbai
TINAMPO SA MAGSUSULAT SA PAGMATA! SA INDIA
ANG siyudad sa Mumbai, nga kanhi nailhang Bombay, adunay dakong populasyon nga kapin sa 18 ka milyon. Matag adlaw, mga unom ngadto sa pito ka milyon sa mga molupyo niini mosakay sa paspas nga mga tren nga kanunayng nagbiyahean tali sa kanait nga mga lugar ug siyudad padulong sa ilang mga trabahoan, mga eskuylahan, mga dagkong tindahan, o sa makaiikag nga mga lugar. Sa mga oras nga daghang pasahero, ang kargado kaayong tren nga siyam ug bagon, nga makapalingkod lang unta ug 1,710, magpasakay ug mga 5,000 ka pasahero. Nianang mga orasa, niadtong Hulyo 11, 2006, giatake sa mga terorista ang mga tren sa Mumbai. Sulod sa wala pay 15 minutos, pito ka bomba ang mibuto diha sa nagkalainlaing tren nga nagbiyahe sa Western Railway, mao nga namatay ang kapin sa 200 ka tawo ug nangaangol ang lain pang kapin sa 800.
Daghang membro sa 22 ka kongregasyon sa mga Saksi ni Jehova sa Mumbai ug sa kanait nga mga lugar kanunayng mosakay sa mga tren ug sila nakasakay sa mga tren nga giatake. Salamat na lang, walay namatay kanila, apan dihay mga nasamdan. Si Anita misakay aron makapauli na gikan sa iyang trabaho. Naghuot ang mga tawo sa tren, mao nga siya nagbarog na lang duol sa pultahan sa first class nga lawak aron dali ra siyang makagawas. Samtang nagdagan ang tren, kalit lang nga may kusog kaayong buto, ug napunog itom nga aso ang iyang lawak. Sa dihang siya milili sa pultahan ug mitan-aw sa iyang tuo, iyang nakita nga nalangkat ang metal nga bungbong sa sunod nga lawak ug kini nagbitay sa kasko sa tren sa anggulo nga 45 grado. Nalisang pag-ayo siya sa pagkakitag mga lawas ug mga parte sa lawas sa tawo nga nanglupad paggawas sa lungag ug nanghagsa diha sa riles. Human sa daw taas kaayong panahon—nga sa pagkatinuod maoy pipila ra ka segundo—ang tren mihunong. Siya ug ang uban pang mga pasahero, nangambak ngadto sa riles ug nanagan pahilayo sa tren. Gamit ang iyang cellphone, gitawgan ni Anita ang iyang banang si John, ug maayo gani kay iya siyang nakontak. Sulod sa pipila ra ka minutos ang mga linya sa telepono sa siyudad napuliki na sa tawag sa daghan kaayong mabalak-ong mga tawo. Morag kalmado ra man siya sa sinugdan apan sa dihang nakigsulti na siya sa iyang bana, siya mihilak. Iyang gisuginlan ang iyang bana kon unsay nahitabo ug nagpakuha siya kaniya. Samtang naghulat siya sa iyang bana, mibundak ang ulan, nga nagbanlas sa daghang ebidensiya nga makatabang unta sa mga imbestigador.
Si Claudius, lain pang Saksi ni Jehova, mibiya sa iyang opisina nga mas sayo kay sa naandan. Misakay siya sa 5:18 s.h. nga biyahe sa tren sa Churchgate Station, ang kataposang terminal sa siyudad sa Western Railway, ug gipili niya ang first class nga lawak. Samtang nangita siyag kalingkoran alang sa iyang usa ka oras nga panaw ngadto sa estasyon sa Bhayandar, iyang nakita si Joseph, nga sakop sa usa ka haduol nga kongregasyon sa mga Saksi ni Jehova. Daling milabay ang oras samtang ang duha nagbalitaanay. Dayon, tungod kay gikapoy sa iyang trabaho nianang adlawa, si Joseph nahitagpilaw. Kay puno man kaayo ang tren, si Claudius mitindog na sa pag-abot niini sa usa ka estasyon una pa sa estasyon nga iyang kanaogan aron siya makagawas dayon. Samtang nagbarog didto si Claudius, si Joseph nahigmata ug miakbo sa likod sa lingkoranan aron manamilit kaniya. Si Claudius, nga migunit sa barandilya sa lingkoranan, mihirig aron makigsulti kaniya. Lagmit nga kadtoy nakaluwas sa iyang kinabuhi. Kalit nga nagkaguliyang. Ang lawak kusog nga nauyog, napunog aso, ug nangitngit pag-ayo. Nahilamba si Claudius sa salog sa tunga sa naglumbay nga mga lingkoranan ug morag nabungol siya ug ang iyang nabatian mao lang ang tinagingting sa sulod sa iyang dalunggan. May dako nang bangag sa iyang gitindogan di pa dugay. Ang mga pasahero nga nagbarog tupad niya tingali nahilabay sa riles o kaha nagbuy-od nang patay sa salog. Nakalingkawas siya sa ikalima sa pito ka pagbomba nga mitay-og sa mga tren niadtong mangilngig nga adlawng Martes.
Gidala si Claudius sa ospital, nga ang iyang besti nabulit sa dugo. Apan ang kadaghanan niadtong dugoa naggikan sa naalaot nga mga pasahero. Dili ra kaayo grabe ang iyang mga kadaot—nabuslot ang tambol sa iyang dalunggan, napaso ang usa niya ka kamot, ug nasunog ang iyang buhok. Iyang nakita didto sa ospital si Joseph ug ang asawa niini nga si Angela, nga didto diay nagsakay sa sunod nga lawak nga gireserba alang sa mga babaye ug maayo gani nga wala ra maunsa si Angela. Milagom ang tuong mata ni Joseph ug siya nabungol. Kining tulo ka Saksi nagpasalamat kang Jehova nga sila buhi. Si Claudius miingon nga ang una niyang nahunahunaan sa dihang naulian siyag buot mao, ‘Pagkaway-pulos ang pagpangagpas sa salapi ug materyal nga katigayonan niining sistemaha sa dihang ang kinabuhi mahimong kalit lang nga mahanaw!’ Siya nalipay nga ang iyang relasyon uban sa iyang Diyos, si Jehova, maoy gihimo niyang labing hinungdanong butang sa iyang kinabuhi!
Sulod sa mubo lang nga yugto, nakaagom ang siyudad sa Mumbai ug grabeng pagbaha, mga rayot, ug dayon ang pagpamomba. Bisan pa niana, ang kapin sa 1,700 ka Saksi didto adunay maayo, masibotong espiritu. Sila nagpaambit kanunay sa ilang mga silingan sa kahibulongang paglaom bahin sa usa ka bag-ong kalibotan, diin ang tanang kapintasan wala na unya.—Pinadayag 21:1-4.
[Blurb sa panid 23]
May dako nang bangag sa iyang gitindogan di pa dugay
[Hulagway sa panid 23]
Si Anita
[Hulagway sa panid 23]
Si Claudius
[Hulagway sa panid 23]
Si Joseph ug Angela
[Picture Credit Line sa panid 22]
Sebastian D’Souza/AFP/Getty Images