Gikan sa Among mga Magbabasa

Sa Dihang ang Sakit Mawala Na! (Enero 2007) Sa nag-ingon kamo nga ang pipila ka tawo “nag-usik ug salapi ug panahon sa mga terapiya ug mga tambal nga dili epektibo o makadaot pa gani,” morag ang inyong gipasabot mao ang alternatibong mga paagi sa pagtambal, kay ang artikulo nagkuwestiyon man kon epektibo ba ug luwas ang alternatibong mga paagi sa pagtambal. Nagpasabot ba kini nga ang Pagmata! nagrekomendar sa naandang paagi sa pagpanambal o pagpadoktor ingong mas luwas ug mas epektibo? Sumala sa General Accounting Office sa Tinipong Bansa, adunay daghang pamatuod nga ang usa makatuo nga kana dili mas luwas ug epektibo.

G. C., Tinipong Bansa

Ang “Pagmata!” nagtubag: May ubay-ubayng kaylap nga gidawat nga mga paagi sa pagtambal nga sa usa ka panahon giisip nga luwas ug epektibo apan sa ulahi napamatud-ang dili diay luwas. Kini ang nahitabo diha sa natad sa naandang paagi sa pagpanambal o pagpadoktor ug sa alternatibong paagi sa pagtambal. Maalamon nga imo gayong mahibaloan ang posibleng mga kaayohan ug mga kapeligrohan sa pagtambal nga imong gihunahuna, kon kana ba naandang paagi sa pagpadoktor o alternatibo, ug sa pagseguro nga kini dili supak sa mga prinsipyo sa Bibliya. Personal kini nga pagadesisyonan. Sama sa sublisubli namong gipahayag, ang “Pagmata!” wala magrekomendar ug bisan unsang paagi sa pagtambal. Ug ang mga Kristohanon dili maghukom o magsaway sa pagtambal nga pilion sa uban. Sa pagkatinuod, sumala sa gihisgotan sa mga artikulo, dili alternatibong paagi sa pagtambal ni naandang paagi sa pagpadoktor ang makaayo sa tanang sakit sa tawo. Pinaagi lamang sa Gingharian sa Diyos nga moabot ang panahon nga ang tanang sakit mawala na.—Pinadayag 21:3, 4.

Ako ‘Mosaka Ingon sa Laking Osa’ (Agosto 2006) Ang pagkamapailobon ug pagkamapaubsanon ni Francesco Abbatemarco nakapahinuklog gayod kanako. Ang iyang pagkabaldado wala gayod makapugong kaniya sa pag-alagad kang Jehova ug naningkamot usab siya pag-ayo sa pagbuntog sa iyang negatibong mga pagbati. Ang iyang kasinatian nakatabang kanako sa paghinumdom nga bisag unsa pay mga kahimtang nga atong atubangon, kita makaalagad kang Jehova kutob sa atong maarangan. Nadasig usab ako sa pagkahibalo nga ang pagpadapat sa Pulong sa Diyos nakatabang kaniya sa paghimog dagkong mga kausaban sa iyang kinabuhi.

N. G., Cambodia

Daghan kaayong babag ang gisagubang ni Francesco. Apan sa dihang nakaplagan niya ang kamatuoran, andam niya kining giatubang. Siya usa gayod ka talagsaong panig-ingnan tungod sa iyang determinasyon! Nadasig gayod ako sa iyang sugilanon ug hinaot nga makadasig usab kini sa uban.

M. D., Habagatang Aprika

Giganahan gayod ako niining artikuloha! Hinaot personal kong masultihan si Francesco Abbatemarco nga iya gayod akong nadasig nga maningkamot sa pagpauswag sa akong pag-alagad kang Jehova.

J. B., Tinipong Bansa

Francesco, salamat kaayo sa imong talagsaong panig-ingnan sa kasibot ug paglahutay. Segurado ako nga sa bag-ong sistema ikaw molukso sama sa osa. Hinumdomi nga aduna kay mga igsoon sa pagtuo nga nahigugma gayod kanimo ug nag-ampo alang kanimo.

S. G., Rusya