Unsay Basehanan sa Pagtino sa Tinuod nga Relihiyon?

KLARONG gipakita ni Jesus nga ang ubang matang sa pagsimba dili dalawaton sa Diyos. Siya naghisgot bahin sa “mini nga mga manalagna,” nga nagtandi kanila sa usa ka kahoy nga namungag walay pulos nga bunga ug “pagaputlon ug igasalibay ngadto sa kalayo.” Siya miingon usab: “Dili ang matag usa nga magaingon kanako, ‘Ginoo, Ginoo,’ makasulod sa gingharian sa mga langit.”​—Mateo 7:15-22.

Gani, kini ang giingon ni Jesus bahin sa uban nga nangangkon nga iyang mga tinun-an: “Ako magaingon kanila: Wala gayod ako makaila kaninyo! Pahilayo gikan kanako, kamong mga mamumuhat sa kalapasan.” (Mateo 7:23) Dugang pa, sa dihang nakigsulti sa mga lider sa relihiyon sa iyang panahon, gipadapat ni Jesus kanila ang mga pulong sa Diyos ngadto sa apostatang Israel: “Kawang lamang nga sila nagpadayon sa pagsimba kanako, tungod kay sila nagtudlo sa mga sugo sa mga tawo ingon nga mga doktrina.”​—Marcos 7:6, 7.

Klaro nga dili tanang paagi sa pagsimba giuyonan sa Diyos o sa iyang Anak. Busa, dili tanang paagi sa pagsimba maoy tinuod nga pagsimba. Kini ba nagpasabot nga usa lang ka relihiyon ang nagtudlo sa kamatuoran? Dili kaha gigamit usab sa Diyos ang pipila ka relihiyon apan iyang gisalikway ang uban? O posible kaha nga gidawat o gisalikway sa Diyos ang pagsimba sa tagsa-tagsa ka membro bisag unsa pay ilang relihiyon?

Si apostol Pablo giinspirar sa Diyos sa pagsulat: “Karon ako magaawhag kaninyo, mga igsoon, pinaagi sa ngalan sa atong Ginoong Jesu-Kristo nga kamong tanan magasulti nga may panagkauyon, ug nga walay pagkabahinbahin diha kaninyo, kondili kamo unta bug-os nga magkahiusa sa samang kaisipan ug sa samang panghunahuna.” (1 Corinto 1:10) Ang Bibliya nag-awhag usab sa mga Kristohanon nga mahimong “managsama ug kaisipan ug may samang gugma, nga nahiusa diha sa kalag, nga magahupot sa usa ra ka hunahuna diha sa kaisipan.”​—Filipos 2:2.

Sa ato pa, kon adunay ingon niini nga panaghiusa, nan adunay usa ka relihiyon. Busa ang Bibliya nag-ingon nga adunay “usa ka Ginoo, usa ka pagtuo, usa ka bawtismo.”​—Efeso 4:4, 5.

Kon Unsay Gipakita sa Bibliya

Ang konklusyon sa ibabaw lig-ong gipamatud-an sa Bibliya. Pinaagi sa pagsusi sa Bibliya, imong masayran nga ang Diyos nakiglabot sa iyang katawhan pinaagi sa usa lang ka sistema sa pagsimba. Sa unang bahin sa kasaysayan sa tawo gigamit sa Diyos ang mga patriarka o mga ulo sa pamilya ingong iyang mga hawas. Pipila sa iladong mga patriarka mao si Noe, Abram (Abraham), Isaac, ug Jacob.​—Genesis 8:18-20; 12:1-3; 26:1-4; 28:10-15.

Ang mga kaliwat ni Jacob nahimong mga ulipon didto sa Ehipto. Bisag gidaogdaog pag-ayo, sila midaghan gihapon. Giluwas sila sa Diyos gikan sa pagkabinihag, nga milagrosong gipatabok sa Pulang Dagat. Dayon sila iyang gisagop ingong iyang katawhan, nga naghatag kanilag mga balaod pinaagi sa tigpataliwala nga si Moises. Sila nahimong nasod sa Israel, ang nasod sa Diyos, sa kanhiayng panahon.​—Exodo 14:21-28; 19:1-6; 20:1-17.

Matikdi nga ang Diyos wala mahimuot sa paagi sa pagsimba sa mga tawo nga nagpuyo sa mga nasod palibot sa Israel. Gani iyang gisilotan ang iyang katawhan sa dihang ilang gilapas ang iyang mga balaod ug sa dihang ilang gisunod ang pagsimba sa mga nasod sa ilang palibot.​—Levitico 18:21-30; Deuteronomio 18:9-12.

Unsay angayng himoon sa mga tawo sa ubang nasod nga buot mosimba sa matuod nga Diyos? Una, kinahanglang biyaan nila ang ilang bakak nga pagsimba ug dayon moduyog sa Israel sa pagsimba kang Jehova nga Diyos. Daghan kanila nakaangkon sa pag-uyon sa Diyos ug nahimong iyang maunongong mga alagad. Lakip kanila maoy mga babaye nga sama kang Rahab nga Canaanhon ug kang Ruth nga Moabihanon; mga lalaki nga sama kang Urias nga Hitihanon ug kang Ebed-melek nga Etiopianhon; ug grupo sa mga tawo nga sama sa mga Gabaonhon. Si Haring Solomon sa Israel kinasingkasing nga nag-ampo alang sa tanan kinsa, sama kanila, miduyog sa matuod nga pagsimba uban sa katawhan sa Diyos.a​—2 Cronicas 6:32, 33.

Sa Dinhi na si Jesus sa Yuta

Sa ulahi, sa dinhi na si Jesus sa yuta, ang matuod nga pagsimba natukod base sa iyang mga pagtulon-an, ug ang mga katuyoan sa Diyos napatin-aw ug maayo. Ang matuod nga mga magsisimba sa ngadto-ngadto gitawag ug “mga Kristohanon.” (Buhat 11:26) Busa, kinahanglang talikdan sa mga Hudiyo ang ilang karaang paagi sa pagsimba aron mahimuot ang Diyos kanila. Dili mahimong mopili sila ug paagi sa pagsimba sumala lang sa ilang gusto o mag-iyaiya sila sa pagsimba. Sumala sa atong nahibaloan gikan sa Pulong sa Diyos, ang matuod nga mga magsisimba nahiusa diha sa “usa ka pagtuo.”​—Efeso 4:4, 5.

Para sa uban morag dili makataronganon nga ang Diyos makiglabot sa mga tawo pinaagi lang sa usa ka relihiyon. Apan mao gayod kanay giingon sa Bibliya. Kaniadto, daghang tawo nga nagsimba sa Diyos sa ilang kaugalingong paagi nakasabot ug mituo niining giingon sa Bibliya. Sila miduyog sa matuod nga mga magsisimba ni Jehova, ug ang ilang pagduhaduha napulihan ug dagayang panalangin ug kalipay. Pananglitan, ang Bibliya nag-ingon nga sa dihang ang usa ka Etiopianhon midawat sa Kristohanong pagtulon-an ug gibawtismohan, “siya nagpadayon sa pagpanaw nga nagmaya.”​—Buhat 8:39.

Karon, ang si bisan kinsa nga modawat ug mosubay sa tinuod nga relihiyon makadawat usab ug samang mga panalangin. Apan, tungod sa kadaghan sa mga relihiyon nga kapilian, sa unsang paagi imong mailhan ang bugtong tinuod nga relihiyon?

[Footnote]

[Hulagway sa panid 5]

Unsay mahitabo sa relihiyon nga mamunga ug dili maayong bunga?