Mga Batan-on Nangutana

Angay ba Nakong Itug-an ang Akong Higala?

“Naglisod kaayo ko kay suod nako siyang higala.”​—James.a

“Sa primero, makapatensiyon kaayo ang situwasyon. Nasuko ang akong mga higala kanako kay mitug-an man ko.”​—Ann.

ANG Bibliya nag-ingon: “Adunay higala nga mounong labaw pa kay sa usa ka igsoon.” (Proverbio 18:24) Aduna ka bay higala nga sama niana? Kon mao, bulahan ka kay nakakita kag ingon niana nga higala.

Apan komosta kon ang imong higala nga nag-angkong Kristohanon nakasala? Pananglitan, unsa kon siya nakahimog imoralidad, nanabako, nag-inom-inom bisag menor de edad pa, nagdroga, o nakahimog uban pang bug-at nga mga sala? (1 Corinto 6:9, 10; 1 Timoteo 1:9, 10) Unsay imong himoon? Imo ba siyang sultihan nga nakahibalo ka sa iyang gihimo? Imo ba kining isulti ngadto sa imong ginikanan? Imo ba kining itug-an ngadto sa iyang ginikanan? Imo ba kining itug-an ngadto sa usa ka ansiyano sa kongregasyon?b Kon motug-an ka, unsay mahitabo sa inyong panaghigala? Maayo kahang magpakahilom ka na lang?

Motug-an Ka ba o Dili?

Kitang tanan masayop. Gani ang Bibliya nag-ingon: “Ang tanan nakasala ug wala makaabot sa himaya sa Diyos.” (Roma 3:23) Apan ang uban nakahimog bug-at nga mga sala. Ang uban “makahimog sayop nga lakang” nga kon dili matul-id mahimong mosangpot ug dugang nga mga problema. (Galacia 6:1) Tagda kining tinuod nga pananglitan.

◼ Nakit-an sa usa ka batan-ong Kristohanon nga ginganlag Susan ang iyang higala nga Kristohanon usab nga dunay Web page nga may law-ay nga mga hulagway ug mga musika nga bastos ug liriko.

Hunahunaa: Kon ikaw si Susan, unsay imong himoon? Moingon ka ba nga bahala na siya kon unsay iyang ibutang diha sa iyang Web page? Kon si Susan magpatambag nimo, unsay imong isulti niya?

․․․․․

Kon unsay gihimo ni Susan: Human sa pagpamalandong ug maayo, midesisyon si Susan sa pagpakigsulti sa mga ginikanan sa iyang amiga. “Nahadlok kong motug-an nila,” miingon siya, “kay sila suod usab nako. Mihilak ako kay naglisod ko sa pagtug-an kanila.”

Unsay imong hunahuna? Husto ba ang gibuhat ni Susan? O mas maayo ba nga nagpakahilom na lang siya?

Sa pagtabang kanimo sa pagpangatarongan, tagda kini:

Unsa gayoy himoon sa usa ka tinuod nga higala? Ang Proverbio 17:17 nag-ingon: “Ang tinuod nga higala mahigugma sa tanang panahon, ug maoy usa ka igsoon nga natawo alang sa panahon sa kasakit.” Kon ang usa nakalapas sa mga prinsipyo sa Bibliya, siya anaa sa “kasakit,” nahibalo man siya niana o wala. Tinuod nga dili maayong ‘magpalabi sa pagkamatarong’ pinaagi sa pagpadako sa gagmayng mga problema apan ang usa ka tinuod nga higala dili gayod magpakabuta sa sayop nga panggawi. (Ecclesiastes 7:16) Dili gayod mahimo nga imo lang kanang palabyon.​—Levitico 5:1.

Unsay imong himoon kon ikaw ang ginikanan? Pangutan-a ang imong kaugalingon: ‘Kon ako ang ginikanan ug ang akong anak dunay gibutang diha sa iyang Web page nga dili angay sa usa ka Kristohanon, gusto ba akong mahibalo niana? Unsay akong bation kon ang higala sa akong anak nahibalo bahin niini apan wala motug-an nako?’

Unsa man ang mga sukdanan sa Diyos? Dili gayod kini panahon sa paghilom. Hinunoa, kinahanglang imong sundon ang moral nga mga sukdanan sa Diyos diha sa Bibliya. Ang tinuod mao nga kon imong barogan ang husto, imong mapalipay ang kasingkasing sa imong Maglalalang. (Proverbio 27:11) Dugang pa, tawhay ang imong pamati kay nahibalo ka nga ang imong gihimo maoy alang sa kaayohan sa imong higala.​—Ezequiel 33:8.

“Panahon sa Pagsulti”

Ang Bibliya nag-ingon nga dunay “panahon sa paghilom ug panahon sa pagsulti.” (Ecclesiastes 3:7) Kasagaran ang mga bata wala mahibalo kon unsay angayng himoon sa usa ka partikular nga situwasyon. Kon ang usa ka higala makasala, sila mangatarongan: ‘Dili ko gusto nga magkaproblema ang akong higala’ o ‘dili ko gustong masuko ang akong higala kanako.’ Kon mao ra kanay imong hunahunaon, simple kaayo ang desisyon​—paghilom na lang.

Apan samtang magdako ka, hinamtong na ang imong paagi sa pag-atubang sa problema. Nahibalo ka nga may problema na ang imong higala ug nagkinahanglag tabang​—tabang nga tingali imong ikahatag kaniya. Apan unsay imong himoon kon makadungog ka nga ang imong higala nakalapas sa mga balaod o mga prinsipyo sa Bibliya?

Tinoa una kon tinuod ba ang imong nadunggan. Basig hulungihong lang kana. (Proverbio 14:15) Ang tin-edyer nga si Katie miingon: “Ang akong higala nanabi ug dili tinuod bahin kanako, ug ang mga tawo nga suod nako nagtuo nga tinuod ang iyang gipanulti. Nahadlok ko nga wala nay motuo nako!” Ang Bibliya nagtagna nga si Jesus dili ‘mobadlong sumala sa iyang madunggan’​—o segun sa pagkahubad sa Contemporary English Version, siya “dili . . . mamati sa mga hulungihong.” (Isaias 11:3) Unsay leksiyon niini? Ayaw dayon pagtuo nga husto ang tanan nimong madunggan. Susiha ang tinuod. Tagda kining tinuod nga kahimtang.

◼ Si James, nga gihisgotan sa sinugdanan niini nga artikulo, nakadungog nga ang iyang suod nga higala nagdroga diha sa usa ka parti.

Hunahunaa: Kon ikaw si James, unsay imong himoon? Unsaon nimo pagseguro nga tinuod ang imong nadunggan?

․․․․․

Kon unsay gihimo ni James. Sa sinugdan, si James nagpakaaron-ingon nga walay nadunggan ug nahibaloan. “Dayon ang akong konsensiya nagsugod sa paghasol kanako,” miingon siya. “Nahibalo ko nga kinahanglan gayod nakong pakigsultihan ang akong higala bahin niini.”

Unsay imong hunahuna? Unsay kaayohan kon imo unang pakigsultihan ang giakusar nga nakasala?

․․․․․

Kon maglisod ka sa pagpakigsulti bahin niini, unsay pwede nimong himoon?

․․․․․

Ang higala ni James miangkon nga siya nagdroga diha sa usa ka parti. Apan nagpakiluoy siya kang James nga dili kini itug-an kang bisan kinsa. Buot ni James nga mohimo sa kon unsay husto. Apan gusto niya nga ang iyang higala mohimo usab kon unsay husto. Busa iyang gipasidan-an ang iyang higala nga iya siyang hatagan ug usa ka semana sa pagtug-an niana sa mga ansiyano sa iyang kongregasyon. Ug kon dili niya kini himoon, si James na mismo ang motug-an niini sa mga ansiyano.

Makataronganon ba ang gihimo ni James? Ngano?

․․․․․

Ang higala ni James wala motug-an sa mga ansiyano, busa gitug-an kini ni James. Apan sa ulahi nakaamgo ang iyang higala sa iyang sayop nga nahimo. Gitabangan siya sa mga ansiyano sa pagsabot nga siya kinahanglang maghinulsol aron mapasig-uli ang iyang maayong relasyon kang Jehova.

Matawag Ka Bang Sumbongiro?

Bisan pa niana, makapangutana ka: ‘Dili ba kaha ako mahimong sumbongiro kon akong itug-an ang akong higala? Dili ba mas maayo nga magpakaaron-ingnong wala koy nahibaloan?’ Kon ikaw ang anaa sa maong situwasyon, unsay imong himoon?

Una, hunahunaa nga kasagaran ang kinasayonang butang nga himoon dili mahigugmaon ug ang mahigugmaong butang nga himoon kasagaran dili gayod sayon himoon. Nagkinahanglag kaisog ang pagtug-an sa sala nga nahimo sa imong higala. Nganong dili man nimo kini iampo ngadto sa Diyos? Pangayo kaniyag kaalam ug kaisog nga imong gikinahanglan. Ug iya kang tabangan.​—Filipos 4:6.

Ikaduha, hunahunaa ang kaayohan nga maangkon sa imong higala kon imong itug-an ang iyang sala. Sa pag-ilustrar, pananglit nanglakaw mo sa imong higala diha sa bakilid ug kalit lang nadakin-as siya ug nahulog sa ubos. Klaro kaayo nga nagkinahanglag tabang ang imong higala. Apan unsa kon tungod sa kaulaw sultihan ka niya nga dili siya magpatabang kay mokatkat lang siyag iya? Imo ba siyang pasagdan bisag nameligro ang iyang kinabuhi?

Ingon usab niini kon maligas ang imong higala gikan sa Kristohanong dalan. Tingali siya maghunahuna nga mapasig-uli ang iyang maayong relasyon uban sa Diyos nga dili kinahanglang tabangan. Apan sayop kana nga pangatarongan. Tingali ang imong higala mobatig kaulaw sa nahitabo. Apan ang imong pagtug-an sa iyang sala mahimong makaluwas sa iyang kinabuhi!​—Santiago 5:15.

Busa ayaw kahadlok sa pagtug-an sa sala nga nahimo sa imong higala. Pinaagi sa pagpangayog tabang alang kaniya, ikaw nagpakitag pagkamaunongon kang Jehova nga Diyos ug sa imong higala, kinsa sa ngadto-ngadto makaamgo sa iyang sayop ug magpasalamat kanimo sa imong mahigugmaong tabang.

Ang ubang mga artikulo gikan sa seryeng “Mga Batan-on Nangutana” makita diha sa Web site nga www.watchtower.org/​ype

[Mga footnote]

MGA BUTANG NGA ANGAY PALANDONGON

◼ Sa unsang paagi ang pagtug-an sa sala nga nahimo sa usa ka higala maoy pamatuod nga ikaw tinuod niyang higala?

◼ Kinsa sa Bibliya ang imong mahinumdoman nga nasulayan ang ilang pagkamaunongon ngadto sa ilang mga higala? Unsay imong makat-onan kanila?

[Hulagway sa panid 20]

Kon ang imong higala maligas gikan sa Kristohanong dalan, paneguroa nga siya matabangan