Gidisenyo ba Kini?

Ang Bayanan sa Bakokang nga Cyphochilus

◼ Ang bayanan sa bakokang nga Cyphochilus dunay nagsapawayng mga himbis nga napulo ka pilo nga mas nipis kay sa buhok sa tawo. “Dihang akong gibutang kini diha sa mikroskopyo, morag nagtan-aw kog laing kalibotan,” miingon si Dr. Pete Vukusic sa Exeter University sa Britanya. “Talagsaon kaayo kini.”

Hunahunaa: Ang nadiskobrehan ni Dr. Vukusic mao ang hinungdan sa hayag nga pagkaputi sa bakokang, ug dili tungod sa pigment. Kini maoy tungod sa pinong mga buhok-buhok ug sa mga gintang-gintang niini nga mopasabwag sa kahayag. “Ang substansiya nga pangsapaw, sama nianang gigamit sa dekalidad nga papel, plastik ug mga pintura, kinahanglang duha ka pilo ka baga aron mahimong sama niini ka puti,” nag-ingon ang Science Daily.

Ang mga siyentipiko nagtuo nga ang puting bayanan sa Cyphochilus nakatabang aron kini moangay diha sa puting fungus diin kini kasagarang moipon. Apan mas interesado ang mga eksperto kon sa unsang paagi mapuslan sa tawo ang kolor niining giming nga bakokang—pananglitan, sa paggamag puti kaayong sintetikong mga materyales. Si Vukusic nag-ingon nga ang papel ug ang kolor sa atong ngipon mahimong mas moputi pa, ug bisan ang kahayag sa suga mas mosanag pa kon masundog ug mapadapat ang pagkadisenyo niini nga bakokang.

Unsay imong hunahuna? Sulagma lang bang mitungha ang puting bayanan sa bakokang nga Cyphochilus? O dunay nagdisenyo niini?

[Hulagway sa panid 24]

Ang bakokang nga “Cyphochilus” mas gamay pa kay sa tumoy sa imong tudlo (gipadak-ang letrato)

[Credit Line]

Department of Entomology, Kasetsart University, Bangkok