Bansaya ang Imong mga Anak sa Linghod pa Silag Edad
TINAMPO SA MAGSUSULAT SA PAGMATA! SA CANADA
◼ “Ang telebisyon mahimong usa ka mapuslanon kaayong gamit sa pagkat-on,” matod sa The New York Times. Apan “ang paglingkod atubangan sa telebisyon sulod sa daghang oras makadaot sa lawas ug hunahuna sa mga bata,” mao nga dili nila maugmad ang ilang mga katakos sa pagkamamugnaon, pagkat-on, ug pagpakiglabot sa uban.
Human sa pag-obserbar sa batasan sa 2,500 ka bata sa pagtan-awg TV, ang mga tigdukiduki sa Children’s Hospital sa Seattle, Washington, U.S.A., “nakadiskobre nga kon magsigeg tan-aw ug TV ang mga bata nga nag-edad ug usa ngadto sa tulo ka tuig, mahimong dili sila maayog konsentrasyon inig-edad nilag pito,” nag-ingon ang mantalaan. Dugang pa, kining mga bataa mas agresibo ug pungtanon. Ang usa ka eksperto bahin sa mga problema sa pag-eskuyla nga si Dra. Jane M. Healy nag-ingon nga “namatikdan sa daghang ginikanan nga miarang-arang ang konsentrasyon sa ilang mga anak dihang wala na sila patan-awa ug telebisyon.”
Unsay mahimo sa mga ginikanan aron mamenosan ang panahon nga gigugol sa ilang mga anak sa pagtan-awg telebisyon? Kini ang gisugyot sa report: Pagtakda ug balaod kon kanus-a ug kon unsa ka dugay motan-awg telebisyon ang imong anak kada adlaw. Ayaw himoang tigbantay ug bata ang telebisyon. Hinunoa, hatagig ginagmayng buluhaton ang imong anak diha sa balay kutob sa mahimo. Pilia lang ang mga programa nga mahimong tan-awon sa imong anak, ug patya ang telebisyon kon mahuman na kana. Kon mahimo, ubani pagtan-aw ang imong anak sa imong gipiling mga programa ug hisgoti uban sa imong anak kon unsay inyong nakita. Sa kataposan, limitahe ang imong pagtan-aw ug telebisyon.
Ang pag-ugmad sa pagkamamugnaon sa mga bata ug sa ilang pagpakiglabot sa uban nagkinahanglag panahon, determinasyon, ug disiplina sa kaugalingon. Apan malipay ka gayod sa maayong mga resulta sa imong paningkamot. Kini ang giingon sa usa ka karaang panultihon: “Bansaya ang bata subay sa dalan nga alang kaniya; bisan kon siya matigulang na dili siya motipas gikan niana.” (Proverbio 22:6) Ang usa ka hinungdanong bahin sa maong pagbansay mao ang pagtudlo sa mga bata sa hustong mga prinsipyo bahin sa moralidad.
Gigamit sa mga Saksi ni Jehova ang librong Pagkakat-on Gikan sa Dakong Magtutudlo sa pagtudlo sa ilang mga anak maylabot sa maayong pamatasan. Sa pagkatinuod, ang maayong komunikasyon ug mahigugmaong pagtagad sa mga ginikanan samtang gagmay pa ang ilang mga anak mapuslanon kaayo inigkahamtong nila. Makapalipay ug makapatagbaw gayod nga makita sa mga ginikanan ang ilang mga anak nga nagdako nga mahimong dalayegon ug responsableng mga hamtong.