Kan-anan sa mga Insekto

● Kuninitan dayon sa mga insekto ang pagkaon nga sayon pangitaon ug daghag kaloriya. Ang madalidali nila nga kakuhaag pagkaon mao ang bulak. Sama ra nga ang mga kan-anan makadani sa mga kustomer, madani ang mga insekto sa nindot nga mga kolor sa bulak. Inigtugdon sa mga insekto diha sa mga bulak, ilang kalingawan ug kaon ang pollen o kaha suyopon ang nektar.

Human sa usa ka mabugnawng kagabhion, ang mga insekto luya. Busa kinahanglang magpainit sila sa adlaw aron molagsik. Diha sa mga bulak, dunay daghang sustansiyadong pagkaon ug mahimo usab silang magpainit sa adlaw. Aniay usa ka pananglitan.

Ang bulak nga oxeye daisy sagad motubo sa Europe ug North America. Lagmit ordinaryo ra kini nga bulak, apan kon imo kining panid-an, mahingangha ka sa imong makita. Ang maong mga daisy sagad mao ang estambayanan sa mga insekto mabuntag. Suhopon sa puti nga mga petal ang kainit sa adlaw, ug ang dalag sa kinatung-an sa bulak nindot kaayo nga dapit diin ang mga insekto magpalagsik sa kainit sa adlaw.a

Ang nakanindot pa gyod kay ang kinatung-an sa bulak sa daisy abundag sustansiyadong pollen ug nektar nga kinaham sa mga insekto. Ang mga bulak nindot kaayo nga dapit diin ang insekto makapamahaw ug makapainit sa adlaw!

Maoy hinungdan nga klase-klaseng insekto ang magtapok sa oxeye daisy sa tibuok adlaw. Makakita kag mga bakukang, mga alibangbang nga nindot ug kolor, shield bug, saluksok, ug lainlaing matang sa langaw. Apan mamatikdan lang nimo kining tanan kon imong panid-an pag-ayo kining mga bulak nga maoy gihimong kombenyenteng kan-anan sa mga insekto.

Busa sa sunod higayon nga mosuroy ka sa hardin, gahinig panahon ang pagpaniid sa nagakahitabo diha sa usa ka bulak. Kon imo kanang himoon, mas maapresyar nimo ang Maglalalang nga maoy nagdisenyo nianang tanan.

[Footnote]