Mga Batan-on Nangutana
Sa Unsang Paagi Mapauswag ang Akong Kompiyansa sa Kaugalingon?
OO DILI
Sa dihang manamin ka, ganahan ka ba ◯ ◯
sa imong hitsura?
Mobati ka ba nga duna kay maayong ◯ ◯
mga abilidad?
Makabarog ka ba sa pagpit-os sa imong ◯ ◯
isigkabatan-on?
Modawat ka bag mga sugyot? ◯ ◯
Maagwanta ba nimo kon ang uban mosultig ◯ ◯
daotan bahin kanimo?
Mobati ka ba nga dunay nagmahal kanimo? ◯ ◯
Mahunahunaon ka ba sa imong panglawas? ◯ ◯
Malipay ka ba kon ang uban magmalamposon? ◯ ◯
Mobati ka ba nga malamposon? ◯ ◯
Kon daghan kag tubag nga “dili,” lagmit wala nimo makita ang imong maayong mga hiyas tungod sa imong kakulag kompiyansa sa kaugalingon. Tabangan ka niini nga artikulo aron imong makita ang imong maayong mga hiyas!
KADAGHANANG batan-on dili ganahan sa ilang panagway ug dili bilib sa ilang kaugalingon. Kanunay silang mobati nga ang uban mas maayo kay kanila. Ingon ka ba usab niana? Kon mao, wala ka mag-inusara!
● “Maguol ko sa akong mga depekto. Grabe kaayo kong makasaway sa akong kaugalingon.”—Leticia.a
● “Bisag unsa ka pa ka gwapo o ka gwapa, duna gayoy molabaw pa kanimo.”—Haley.
● “Maulaw kaayo ko atubangan sa daghang tawo. Mahadlok kong maghunahuna sila nga wala koy pulos.”—Rachel.
Kon gibati nimo ang sama sa gihisgotan sa itaas, ayawg kabalaka. Imo kanang mabuntog. Tagda kining tulo ka sugyot nga makapataas sa imong kompiyansa sa kaugalingon.
1. Pangitag Maayong mga Higala
Tekstong makatabang. “Ang tinuod nga higala mahigugma sa tanang panahon, ug maoy usa ka igsoon nga natawo alang sa panahon sa kasakit.”—Proverbio 17:17.
Kahulogan niini. Ang maayong higala dako gayod nga tabang panahon sa kalisdanan. (1 Samuel 18:1; 19:2) Kon nahibalo ka nga dunay nabalaka kanimo, kana makapadasig kanimo. (1 Corinto 16:17, 18) Busa pakigsuod niadtong may maayong impluwensiya kanimo.
“Ang tinuod nga mga higala molig-on kanimo.”—Donnell.
“Usahay igo na ang pagkahibalo nga dunay kinasingkasing nga nahingawa kanimo. Mobati ka nga bililhon tungod niana.”—Heather.
Pasidaan: Pagpilig mga higala nga maayog impluwensiya kanimo. (Proverbio 13:20; 18:24; 1 Corinto 15:33) Kon dili maayo ang ilang impluwensiya kanimo, moresulta kanag kadaot.—Roma 6:21.
Sulayi kini. Isulat sa ubos ang ngalan sa imong higala nga makatabang aron motaas ang imong kompiyansa sa kaugalingon.
․․․․․
Maayo tingali kon mogahin kag panahon kauban sa maong higala nga imong gisulat. Matikdi: Ang maong higala pwede nga dili parehas nimog edad.
2. Paghimog Maayo Ngadto sa Uban
Tekstong makatabang. “Adunay labaw nga kalipay sa paghatag kay sa pagdawat.”—Buhat 20:35.
Kahulogan niini. Kon ikaw nagtabang sa uban, sama rag imong gitabangan ang imong kaugalingon. Ngano man? “Ang mahinatagon pagagantihan,” matod pa sa usa ka panultihon sa Bibliya. “Paghatag ug usa ka basong tubig, ug ikaw makadawat usab ug usa ka basong tubig.” (Proverbio 11:25, Contemporary English Version) Sa walay duhaduha, ang imong kompiyansa sa kaugalingon motaas sa dihang motabang ka sa uban!b
“Maghunahuna ko kon sa unsang paagi nako matabangan ang uban diha sa kongregasyon. Ang pagpakitag gugma ug pagtagad sa uban makapalipay kanako.”—Breanna.
“Ang Kristohanong ministeryo makatabang nga dili ka magsigeg hunahuna sa imong kaugalingon kondili sa uban.”—Javon.
Pasidaan: Kon motabang ka sa uban, ayaw paglaom nga duna kay makuha gikan kanila. (Mateo 6:2-4) Ang sayop nga motibo sa pagtabang dili makaayo kanimo ug mamatikdan kana sa ubang tawo!—1 Tesalonica 2:5, 6.
Sulayi kini. Paghunahuna ug usa ka tawo nga imong natabangan sa una. Kinsa siya, ug unsay imong natabang kaniya?
․․․․․
Unsay imong gibati human nimo siya tabangi?
․․․․․
Paghunahunag laing tawo nga imong matabangan ug isulat kon unsay imong ikatabang.
․․․․․
3. Ayawg Surender Kon Masayop Ka
Tekstong makatabang. “Ang tanan nakasala ug wala makaabot sa himaya sa Diyos.”—Roma 3:23.
Kahulogan niini. Dawata ang kamatuoran nga ikaw dili hingpit. Kana nagpasabot nga may mga panahon nga masayop ka sa imong isulti o himoon. (Roma 7:21-23; Santiago 3:2) Dili kalikayan nga masayop ka, apan makontrolar nimo ang imong reaksiyon. Ang Bibliya nag-ingon: “Ang tawong matarong mahimong matumba sa makapito, ug siya mobangon gayod.”—Proverbio 24:16.
“Usahay mawad-an kitag kompiyansa sa kaugalingon kon atong itandi ang atong kahuyangan ngadto sa maayong hiyas sa uban.”—Kevin.
“Kitang tanan may maayo ug daotang kinaiya. Angay natong pabilhan ang atong maayong kinaiya ug paningkamotang mausab kadtong dili maayo.”—Lauren.
Pasidaan: Ayaw himoang pasangil ang pagkadili-hingpit aron sa paghimog sala. (Galacia 5:13) Kon ikaw tinuyo nga magpakasala, madaot na hinuon ang imong relasyon kang Jehova nga Diyos!—Roma 1:24, 28.
Sulayi kini. Isulat sa ubos ang hiyas nga gusto nimong pauswagon.
․․․․․
Isulat tapad sa hiyas nga imong gilista ang petsa karon. Panukiduki kon sa unsang paagi imo kanang mapauswag, ug susiha ang imong pag-uswag sulod sa usa ka bulan.
Ikaw Bililhon Gayod
Ang Bibliya nag-ingon nga “ang Diyos mas labaw kay sa atong mga kasingkasing.” (1 Juan 3:20) Kana nagpasabot nga makita niya ang imong tinuod nga bili nga wala nimo makita sa imong kaugalingon. Mausab ba ang panglantaw sa Diyos kanimo tungod sa imong pagkadili-hingpit? Handurawa nga ang imong ₱100 nga papel dunay gamayng gisi. Imo ba kanang ilabay o isipong walay bili tungod lang sa maong gisi? Dili gayod! Wala mausab ang bili niana.
Ingon niana ang panglantaw sa Diyos kanimo. Pabilhan niya ang imong mga paningkamot sa pagpahimuot kaniya, bisan pag unsa kana ka gamay! Sa pagkatinuod, ang Bibliya nagpasalig kanato nga “ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan.”—Hebreohanon 6:10.
Ang ubang artikulo gikan sa seryeng “Young People Ask” makita diha sa Web site nga www.watchtower.org/ype
[Mga footnote]
a Ang ubang ngalan giilisan.
b Kon ikaw Saksi ni Jehova, hunahunaa ang imong kalipay sa dihang imong ipaambit ang mensahe sa Gingharian ngadto sa uban.—Isaias 52:7.
ANGAYNG PALANDONGON
Unsay imong himoon kon ikaw maguol tungod kay
● Ang imong mga isigkabatan-on manaway kanimo?
● Mobati ka nga sila mas maayo kay kanimo?
● Ang imo rang makita mao ang imong mga kahuyangan?
[Blurb sa panid 27]
“Bisan pag hitsuraan ang usa ka tawo mahimo siyang mobati nga maot siyag panagway. O ang tawo nga ordinaryo rag panagway mahimong mobati nga siya ang kinamaayohag hitsura. Nagdepende kana sa imong tinamdan.”—Alyssa
[Kahon/Mga hulagway sa panid 27]
ANG GISULTI SA UBANG BATAN-ON
“Bisan ang kinalig-onang bilding kinahanglan gihapong palig-onon o reperon usahay. Sagad ang mahigugmaong mga pulong, pahiyom, ug halog sa usa ka higala makapalig-on kanako.”
“Imbes moubos ang atong panglantaw sa kaugalingon tungod sa mga hiyas sa uban nga wala kanato, kita makabenepisyo sa ilang maayong mga hiyas ug sila makabenepisyo usab kanato.”
[Mga hulagway]
Aubrey
Lauren
[Hulagway sa panid 28]
Ang bili sa kuwarta dili moubos tungod lang kay kana dunay gisi. Sa susama, ang imong bili atubangan sa Diyos dili moubos tungod sa imong pagkadili-hingpit