Kapeligrohan Diha sa Habog Kaayong Bukid Pagtambal sa Acute Mountain Sickness

“Didto sa Peru dunay habog kaayong bukid nga ginganlag Pariacaca . . . Sa dihang mikatkat ko sa Staircases, nga kinahabogang bahin sa bukid, kalit lang milain ang akong panimati nga mora kog kakuyapon. . . . Dayon naglain ang akong ginhawa ug nagsuka-suka ko nga abi nakog [mamatay] na ko. Nakaingon ko nga kon magpadayon kining akong gibati mamatay gyod ko, apan miabot lag tulo o upat ka oras kadtong akong gibati hangtod nga nakakanaog kami sa ubos-ubos nga bahin sa bukid ug nakaabot sa gihabogon nga akong maagwanta.”—José de Acosta, kinutlo gikan sa librong Natural and Moral History of the Indies.

KINI ang naagoman sa Katsila nga paring Heswita nga si José de Acosta dihang mitungas siya sa Pariacaca sa Peruvian Andes niadtong hinapos sa katuigan sa 1500. Niadtong panahona, ang mga simtoma nga gihisgotan sa ibabaw gituohan nga maoy resulta sa makahilo nga mga gas nga hinungaw sa mga minerales sa bukid o sa gininhawa sa daotang mga diyos. Apan sumala sa among nahibaloan karon, si Acosta dunay simtoma sa soroche—acute mountain sickness (AMS).

Ang AMS maoy reaksiyon sa lawas sa kakulag oksiheno diha sa habog kaayong mga lugar. Didto ang presyur sa hangin moubos nga tungod niini ang baga makulangan ug oksiheno.a

Ang mga simtoma sa AMS sagad motungha mga upat ka oras human makaabot ang tawo sa habog na kaayong dapit ug mahimong mabati gihapon ang simtoma gikan sa usa ngadto sa upat ka adlaw. Niining yugtoa, ang kakulag oksiheno diha sa dugo mopadaghan sa pula nga selula sa dugo, nga sa ngadto-ngadto motabang sa sistema sa sirkulatoryo sa pagsuplay ug dugang oksiheno.

Apan kon ang tawo mosaka dayon sa habog nga lugar o magpasobrag paghago nga wala pa maanad ang lawas nianang gihabogona, ang mga pluwido mahimong mopondo sa baga o sa palibot sa utok. Kon pasagdan, kini mahimong makamatay.

Kon Unsaon Pagsanta sa AMS

Ang mga tawong tigsuroy ug mga tigkatkat ug bukid nakasulay ug mga paagi sa pagsanta o pagtambal sa AMS. Lakip niini nga mga paagi mao:

● Ayaw pag-adtog habog kaayong lugar kon duna kay sakit sa respiratoryo o anemya.

● Ang mga tambal nga magpakusog sa pag-ihi, pangontra sa pagpanghupong, o ubang mga medisina sagad maoy ginarekomendar sa pagtambal o pagsanta sa mga simtoma sa AMS. Konsultaha ang imong doktor.

● Ang labing maayong paagi sa pagsanta sa AMS mao ang pagkanaog sa ubos-ubos nga bahin sa bukid. Kon mahimo, dihang manaog proteksiyoni ang lawas batok sa katugnaw ug pahulay inig-abot.

Ang ubang nindot kaayong talan-awon makita diha sa habog kaayong mga bukid sa kalibotan. (Salmo 148:9, 13) Kon mag-amping ka dihang mobiyahe, makapabilin kang himsog samtang magtan-aw sa katahom sa kalalangan.

[Footnote]

[Blurb sa panid 20]

Ang mga simtoma sa AMS sagad motungha mga upat ka oras human makaabot ang tawo sa habog na kaayong dapit ug mahimong mabati gihapon ang simtoma gikan sa usa ngadto sa upat ka adlaw

[Blurb sa panid 20]

Ang labing maayong tambal sa AMS mao ang pagkanaog sa ubos-ubos nga bahin sa bukid