Gidisenyo ba Kini?

Balit-ad nga Retina

● Ang mata sa tawo adunay retina—usa ka tisyu nga may duolag 120 ka milyong selula nga gitawag ug mga photoreceptor, nga mosuhop ug kahayag ug maghimo nianang elektrikal nga mga signal. Kini nga mga signal hubaron sa imong utok ingong mga hulagway. Ang mga ebolusyonista nangangkon nga ang pagkabutang sa retina diha sa mata sa mga vertebrate, mga linalang nga adunay taludtod, nagpamatuod nga walay nagdisenyo sa mata.

Hunahunaa: Ang retina sa mga vertebrate balit-ad, busa ang mga photoreceptor anaa sa luyo sa retina. Aron makaabot niana ang kahayag, kinahanglan kining molapos sa pipila ka lut-od sa mga selula. Ang ebolusyonistang biologo nga si Kenneth Miller miingon nga “tungod niini ang kahayag masabwag, mao nga dili nato makita ang ubang detalye.”

Busa ang mga ebolusyonista nangangkon nga ang balit-ad nga retina dili kono maayong pagkadisenyo—sa pagkatinuod, walay disenyo. Miingon pa gani ang usa ka siyentipiko nga ang “balit-ad nga posisyon [sa retina] dili gayod haom sa obra niini.” Apan, ang dugang pagpanukiduki nagpakita nga ang mga photoreceptor sa balit-ad nga retina nahimutang tupad sa pigment epithelium—usa ka lut-od sa selula nga nagsuplayg oksiheno ug sustansiya nga gikinahanglan sa tin-aw nga panan-aw. “Kon ang pigment epithelium tissue nahimutang pa atubangan sa retina, grabeng maapektohan ang panan-aw,” misulat ang biologong si Jerry Bergman ug ang espesyalista sa mata nga si Joseph Calkins.

Ang balit-ad nga retina ilabinang mapuslanon sa mga vertebrate nga gagmayg mata. Si Propesor Ronald Kröger sa University of Lund, Sweden miingon: “Aron tin-awng makita ang hulagway, gikinahanglan ang igong distansiya tali sa lente sa mata ug sa mga photoreceptor. Sanglit kini nga espasyo [ang retina] puno mag selula sa nerbiyos, makadaginot ug luna ang mga vertebrate.”

Dugang pa, sanglit ang mga selula sa nerbiyos sa retina dasok kaayo ug nahimutang duol sa mga photoreceptor, paspas ug tukma nga maanalisar ang makita nga hulagway.

Unsay imong hunahuna? Ang balit-ad ba nga retina dili maayong pagkadisenyo, sulagmang mitungha? O kini ba gidisenyo?

[Diagram sa panid 15]

(Alang sa aktuwal nga pagkahan-ay, tan-awa ang publikasyon)

Photoreceptor

Kahayag

Pigment epithelium

Kahayag

Retina

Optic nerve