Kinsa Gayoy Nagpaluyo sa Espiritismo?

MAYLABOT sa atong Maglalalang, ang Bibliya nag-ingon: “Ang Diyos maoy kahayag ug diha kaniya wala gayoy kangitngit.” (1 Juan 1:5) Tinuod kana ilabina sa espirituwal nga diwa. Busa, posible ba nga ang matuod nga Diyos maoy nagpaluyo sa espiritismo? O adunay daotang puwersa nga nagpaluyo niana?

Ang labing komon sa espiritistikong mga buhat mao ang pagpanag-an, astrolohiya, numerolohiya, panghimalad, pagpamarang, pagpakigkomunikar sa “mga patay” ug pagpanglamat. Kini nga mga buhat dugay nang naglungtad ug ang kadaghanan niana nagsugod pa sa karaang Babilonya, nga ang kagun-oban makita karon sa Iraq. (Isaias 47:1, 12, 13) Gikan sa Babilonya, ang espiritistikong mga buhat mikaylap sa tibuok kalibotan ug kini migamot pag-ayo diha sa daghang kultura ug sibilisasyon.

Tagda ang usa ka hitabo sa siyudad sa Filipos sa karaang Macedonia. Didto, ang usa ka gamayng grupo sa Kristohanong mga ministro, nga naglakip kang apostol Pablo ug sa doktor nga si Lucas, nakahibalag ug babaye nga dunay espiritistikong gahom. Matikdi kon sa unsang paagi giyagyag sa magsusulat sa Bibliya nga si Lucas ang tinubdan sa gahom sa maong babaye. Siya misulat: “Dihay usa ka sulugoong babaye nga may espiritu, usa ka demonyo sa pagpanag-an, nga misugat kanamo. Siya nakahatag sa iyang mga agalon ug dakong kinitaan pinaagi sa pagpanag-an.”—Buhat 16:16-18.

Oo, ang gahom sa maong babaye wala maggikan sa matuod nga Diyos, si Jehova, kondili sa usa ka demonyo, usa ka daotang espiritu. Busa, si Pablo ug ang iyang mga kauban wala mamati kaniya. Tingali maghunahuna ka: ‘Kinsa ang mga demonyo? Diin sila gikan?’ Sa makausa pa, matikdi ang tubag sa Bibliya.

Kinsa ang mga Demonyo?

Sa wala pa lalanga ni Jehova ang tawo, iyang gilalang didto sa langit ang daghan kaayong intelihente nga espirituhanong ‘mga anak sa Diyos.’ (Job 38:4, 7) Sama sa mga tawo, sila dunay kagawasan sa pagpili, ug sulod sa dugayng panahon, sila nagmaunongon sa Diyos. Apan kalit nga nawala ang maong malipayong kahimtang. Ngano man?

Human lalanga sa Diyos ang tawo, usa ka espirituhanong linalang ang misugod pagtinguha sa usa ka butang nga dili angay kaniya—ang pagsimba. Samag usa ka ventriloquist nga naggamit ug kikokiko, kining daotang manulonda migamit ug bitin aron hayloon ang unang babaye, si Eva, sa pagsupak sa Maglalalang. (Genesis 3:1-6) Ang Bibliya nagtawag nianang rebelyosong manulonda ingong “ang orihinal nga halas, ang usa nga gitawag Yawa ug Satanas.” (Pinadayag 12:9) Si Jesus naghubit kaniya ingong “mamumuno” kinsa “wala mobarog nga lig-on diha sa kamatuoran,” ug siya midugang: “Inigsulti niya sa bakak, siya nagsulti sumala sa iyang kinaiya, tungod kay siya usa ka bakakon ug ang amahan sa bakak.”—Juan 8:44.

Sa ngadtongadto, ang ubang espirituhanong “mga anak sa matuod nga Diyos” miduyog kang Satanas sa pagrebelde. (Genesis 6:1, 2) Sa ulahi, sila gihubit ingong “mga manulonda nga nakasala” ug “mga manulonda nga wala magpadayon sa paghupot sa ilang orihinal nga pagkabutang apan mitalikod sa ilang nahiangay nga puloy-anang dapit,” o sa ilang tinudlo nga dapit sa langit. (2 Pedro 2:4; Judas 6) Sila gitawag nga mga demonyo. (Santiago 2:19) Dugang pa, sila determinadong patalikdon ang daghang tawo, kutob sa mahimo, gikan sa matuod nga pagsimba, sama sa ilang gihimo sa daghang Israelitas sa kapanahonan sa Bibliya. (Deuteronomio 32:16, 17) Sama kaniadto, si Satanas ug ang mga demonyo naggamit karon ug relihiyosong kabakakan aron limbongan ang mga tawo.—2 Corinto 11:14, 15.

Panalipdi ang Imong Kaugalingon!

Bisan tuod gamhanan ang daotang mga espiritu, kita, sa tabang sa Diyos, ‘makabarog batok kanila’ ug magmadaogon. (1 Pedro 5:9) Apan, aron atong mabatonan ang maong tabang, angay natong sayron ang mga kinahanglanon sa Diyos ug himoon kana. Maylabot sa mga Kristohanon sa iyang panahon, si apostol Pablo misulat: “Kami . . . wala mohunong sa pag-ampo alang kaninyo ug sa paghangyo nga kamo unta mapuno sa tukmang kahibalo sa iyang kabubut-on diha sa tanang kaalam ug espirituwal nga pagsabot, aron kamo magalakaw nga takos kang Jehova aron bug-os nga makapahimuot kaniya.”—Colosas 1:9, 10.

Lakip niadtong nakabaton ug “tukmang kahibalo” mao ang daghang salamangkero sa siyudad sa Efeso. Matikdi kon sa unsang paagi ang kahibalo sa kamatuoran nakaapektar kanila. Ang Bibliya nag-ingon: “Ubay-ubay niadtong nanaggamit ug mga kalaki sa salamangka nagtapok sa ilang mga basahon ug nagsunog niini atubangan sa tanan.” Ug ang maong mga basahon mibalor ug “kalim-an ka libo ka pirasong plata,” nga dako kaayong kantidad! (Buhat 19:17-19) Kini nga panig-ingnan sa pagkamaisogon gisulat alang sa atong kaayohan.—2 Timoteo 3:16.

Mga Prinsipyo nga Manalipod Kanato

Duna pa kitay laing mahimo aron mapanalipdan ang atong kaugalingon batok sa mga demonyo. Tagda ang mosunod nga mga prinsipyo sa Bibliya.

“Ayaw ninyo tuohi ang matag inspiradong pahayag, hinunoa sulayi ang inspiradong mga pahayag aron masuta kon kini nagagikan ba gayod sa Diyos.” (1 Juan 4:1) Tingali, tinuod ang pipila ka butang nga gipamulong sa mga astrologo, psychic, espiritista, ug mga tambalan. Pananglitan, ang gidemonyohang babaye sa Filipos nagsulti sa tinuod sa dihang siya miingon bahin kang Pablo ug sa mga kauban niini: “Kining mga tawhana maoy mga ulipon sa Labing Hataas nga Diyos, kinsa nagmantala kaninyo sa dalan sa kaluwasan.” (Buhat 16:17) Bisan pa niana, si Pablo ug ang iyang mga kauban wala mosugot nga siya mokuyog kanila. Hinunoa, gimandoan ni Pablo ang daotang espiritu sa paggula gikan kaniya. Sulayi ang relihiyosong mga pahayag pinaagi sa pagtandi niana sa giingon sa Bibliya.—Buhat 17:11.

“Busa, magpasakop kamo sa Diyos; apan sukli ang Yawa, ug siya mokalagiw gikan kaninyo.” (Santiago 4:7) Ang mga demonyo maoy kaaway sa Diyos ug kaaway usab nimo. Likayi bisan ang pag-ukit-ukit sa ilang daotang mga buhat. Hinunoa, magpasakop sa Diyos pinaagi sa pagsunod sa iyang mahigugmaong mga sugo, nga dili mabug-at. (1 Juan 5:3) Pananglitan, ang Diyos miingon sa karaang nasod sa Israel: “Walay makaplagan diha kanimo nga . . . bisan kinsa nga nagapanag-an, usa ka salamangkero o bisan kinsa nga nagapangitag mga tilimad-on o usa nga barangan, o usa nga tigpangdaot o bisan kinsa nga nagakonsultag espiritista o tigpanagna sa mga hitabo o bisan kinsa nga nagapakisayod sa mga patay. Kay bisan kinsa nga nagabuhat niining mga butanga dulumtanan kang Jehova.” (Deuteronomio 18:10-12) Ang panglantaw sa Diyos wala mausab.—Galacia 5:19, 20.

“Walay kalaki nga makadaot batok [sa mga alagad ni Jehova].” (Numeros 23:23) Ang tanan nga gustong mopahimuot sa Diyos dili angayng mahadlok sa mga demonyo. Sa pagkatinuod, ang maong daotang mga espiritu “nagapangurog” atubangan sa Diyos, sanglit nahibalo sila sa iyang dakong gahom, nga mao unyay iyang gamiton sa paglaglag kanila. (Santiago 2:19) “Ipakita [sa Diyos] ang iyang kusog alang niadtong kansang kasingkasing maoy bug-os alang kaniya,” ug “dili gayod niya itugot nga matarog ang matarong.”—2 Cronicas 16:9; Salmo 55:22.

“Ang mga buhi nasayod nga sila mamatay; apan bahin sa mga patay, sila walay nahibaloan nga bisan unsa.” (Ecclesiastes 9:5) Ang Pulong sa Diyos nagtudlo nga ang mga patay ingon gayod niana—patay! Sila dili angayng kahadlokan, kay dili sila makabuhat ug daotan kang bisan kinsa. (Isaias 26:14) Aron malimbongan ang mga tawo, usahay ang mga demonyo magpakaaron-ingnong espiritu sa mga patay, ug kanay hinungdan kon nganong ang “espiritu” sa usa ka kanhing buotan nga tawo lahi sa iyang tinuod nga personalidad.

“Dili kamo mahimong moambit sa ‘lamesa ni Jehova’ ug sa lamesa sa mga demonyo.” (1 Corinto 10:21, 22) Ang tanang tinuod nga nahigugma kang Jehova maglikay sa mga basahon, pelikula, ug mga dula sa kompiyuter nga gipasukad sa espiritismo o nagpasiugdag espiritistikong mga buhat ug pagtulon-an.a “Dili ko ibutang sa atubangan sa akong mga mata ang bisan unsang butang nga walay hinungdan,” nag-ingon ang Salmo 101:3. Dugang pa, ang espiritistikong mga kalingawan sagad naghimaya sa kapintasan ug imoralidad, nga isalikway sa “mga nahigugma kang Jehova.”—Salmo 97:10.

Ang mga demonyo kanunayng naningkamot sa pagtago sa ilang tinuod nga personalidad gikan sa mga tawo. Apan dili sila kanunayng molampos. Pinaagi sa Bibliya, si Jehova nagyagyag kon kinsa gayod sila—mga bakakon kaayo ug mapintas nga kaaway sa mga tawo. Pagkalahi gayod nila sa atong Maglalalang, si Jehova nga Diyos! Ingon sa ipakita sa sunod nga artikulo, siya nahigugma kanato, kanunayng nagsulti sa kamatuoran, ug nagtinguha nga kita mabuhi sa walay kataposan.—Juan 3:16; 17:17.

[Footnote]