Malipayon Kaayo ang Akong Kinabuhi

Sumala sa giasoy ni Herawati Neuhardt

Natawo ako sa Cirebon, Indonesia, usa ka siyudad nga gibantog tungod sa maanindot nga mga panaptong batik, nga adunay mabulokon, gikinamot-pagdibuhong mga disenyo. Sa pipila ka paagi, ang akong kinabuhi ingong misyonaryo nahisama nianang panaptona—dagaya sa mabulokong kasinatian uban sa lainlaing kultura sa Southeast Asia ug South Pacific. Paasoya ko sa akong kaagi.

NIADTONG 1962, sa dihang ako diyes anyos, ang akong inahan nagtuon sa Bibliya uban sa mga Saksi ni Jehova. Sa ngadtongadto, siya ug ang akong amahan, nga parehong Insek nga natawo sa Indonesia, maingon man ang lima sa ilang mga anak, lakip nako, nahimong mga Saksi.

Ang among balay bukas kanunay alang sa mga misyonaryo ug nagapanawng mga ministro nga moduaw sa among kongregasyon aron sa paghatag ug espirituwal nga pagdasig. Ang ilang maayong panig-ingnan ug makapadasig nga mga pulong dako kaayog epekto kanako. Sa dihang nag-edad kog 19, ako nakadesisyon sa pagsulod sa bug-os-panahong Kristohanong ministeryo. Mga usa ka tuig sa ulahi, ako naminyo kang Josef Neuhardt, usa ka German nga misyonaryo nga naasayn sa Indonesia niadtong 1968. Human sa among hanimon, kami mibalhin sa Sumatra, ang ikaduha sa kinadak-an sa kapig 17,000 ka isla. Didto, miduyog ko kang Josef sa iyang buluhaton ingong nagapanawng ministro, nga naglangkit ug pagduaw sa mga kongregasyon sa mga Saksi ni Jehova.

Pagsangyaw sa Sumatra

Ang among sirkito, o lugar diin kami giasayn, naglakip sa mainit, puliki nga siyudad sa Padang, sa West Sumatra, ug sa maanindot nga Lake Toba, usa ka dako nga bolkanikong lanaw nga nahimutang sa kabukiran sa North Sumatra. Sa ulahi, giasayn kami sa habagatang bahin sa isla. Kanunay kaming magbiyahe sakay sa among karaang Volkswagen, nga moagi sa libaongong mga dalan sa lasang, motabok sa huyang nga mga taytayan nga gama sa punoan sa lubi, ug mamidpid sa tiilan sa nagbuntaog nga mga bolkan—ang pipila aktibo ug ang uban dili. Sa gabii mangatulog mi sa salog sa mga payag nga walay koryente, gripo, o banyo. Kami manglaba ug mangaligo diha sa mga lanaw ug suba. Simple lang kadto nga kinabuhi, ug gimahal namo ang mga tawo. Sila mainitong nag-abiabi ug nagdalit kanamog pagkaon, ug daghan ang interesado sa Bibliya.

Sa Padang, ang mga Minangkabau, nga kadaghanan kanila mga Muslim, natingala apan nalipay sa dihang among gipakita kanila sa Bibliya nga ang Diyos usa ra—dili Trinidad, sumala sa gitudlo sa mga relihiyon sa Kakristiyanohan. (Deuteronomio 6:4) Daghan ang nalipay sa pagdawat sa mga magasing Bantayanang Torre ug Pagmata!, ug ang pipila ka interesado miuswag sa espirituwal. Sa Lake Toba, ang mga Batak, nga kadaghanan nag-angkong Kristohanon, nahibalo sa ngalan sa Diyos, nga Jehova, kay nakita nila kana sa ilang Batak nga Bibliya. (Salmo 83:18) Bisan pa niana, sila nagkinahanglag mas tin-awng pagsabot bahin sa Diyos ug sa iyang katuyoan alang sa katawhan. Daghan kanila ang nagtuon sa Bibliya ug nahimong masibotong Kristohanong mga tig-ebanghelyo.

Pagpaambit sa Maayong Balita sa Java

Niadtong 1973, kami ni Josef naasayn sa Java, usa ka isla nga katunga sa gidak-on sa Great Britain, nga may kapin sa 80 ka milyong molupyo.a Among gipaambit ang maayong balita sa mga Javanese, Sundanese, ug mga Insek.

Tungod sa akong Insek-Indonesian nga kagikan, ako makasultig daghang pinulongan, lakip na ang Javanese, Sundanese, ug Indonesian, maingon man ang Iningles. Busa, daghan kog makaiikag nga mga panaghisgot sa Bibliya uban sa mga tawo diha sa ilang kaugalingong pinulongan.

Sa kaulohan sa Indonesia, ang Jakarta, nga nahimutang sa Java, akong gipaambit ang paglaom sa walay-kataposang kinabuhi sa Paraisong yuta uban sa usa ka masulob-ong 19-anyos nga dalaga. Samtang gibasa nako ang Bibliya, siya mihilak. “Salamat kaayo Nang sa imong pagsulti nako niining mga butanga,” miingon siya. Siya midugang: “Ugma magkinahanglan kog dugang 1.5 ka milyong rupiah [$160, U.S.] aron ibayad sa akong pag-eskuyla sa unibersidad, ug naghunahuna ko nga akong ibaligya ang akong pagkababaye. Sa wala ka pa moabot nag-ampo ko. Karon gitubag kana. Nakadesisyon ko nga dili lang una moeskuyla ug magpabiling hinlo sa moral.” Ang dalaga nalipay sa pagkat-on ug dugang bahin sa Bibliya.

Sukad niadto, daghan pang Javanese, Sundanese, ug Insek ang nagpahiuyon sa ilang kinabuhi sa matarong nga mga sukdanan sa Pulong sa Diyos. Kini nakahatag kanilag tinuod nga kalipay ug kalinaw sa hunahuna, ingon sa gisaad sa Diyos.—Isaias 48:17, 18.

Kalimantan—Pinuy-anan sa mga Dayak

Gikan sa Java, kami ni Josef namalhin sa Kalimantan, usa ka Indonesian nga probinsiya sa Borneo, ang ikatulo nga kinadak-ang isla sa kalibotan (sunod sa Greenland ug New Guinea). Ang Borneo adunay baga nga kalasangan, batoong kabukiran, ug dagkong suba. Ang mga molupyo didto naglakip sa mga Insek, Muslim Malay, ug mga Dayak—mga lumad nga sagad mamuyo sa tampi sa suba, kinsa mga tigpamunggot ug ulo kaniadto.

Aron makaabot sa hilit nga mga baryo sa Dayak, sagad mosakay mig bangka agi sa mga suba sa kalasangan. Makakita mig dagkong buaya nga magpabulad diha sa tampi, mga unggoy nga manan-aw kanamo gikan sa kakahoyan, ug mga langgam nga magpaibog sa ilang mabulokong mga balhibo. Oo, nindot gayod nga kasinatian ang pagkahimong misyonaryo didto!

Kadaghanan sa mga Dayak nagpuyo sa tag-as-ug-haliging mga balay nga gama sa kahoy ug kogon. Ang pipila ka puy-anan gagmay; ang uban maoy nagtaas nga mga balay nga gipuy-ag daghang pamilya. Daghan ang wala pa gayod makakitag taga-Europe, busa gusto nilang makita si Josef. Ang mga bata magdagan ug manawag, “Pastor! Pastor!” Dayon, magtapok ang tanan aron mamati sa isulti sa puti nga ministro. Ang isulti ni Josef hubaron sa mga Saksi didto, nga maoy mohikay ug mga pagtuon sa Bibliya uban sa mga interesado.

Giasayn Kami sa Papua New Guinea

Kay gisigeag hulhog sa relihiyosong mga magsusupak ang gobyerno, ang mga Saksi ni Jehova gidili sa Indonesia niadtong Disyembre 1976. Busa, kami ni Josef giasayn sa Papua New Guinea.

Sa didto na mi sa Port Moresby, ang kaulohan, among gikompleto ang duha ka bulang pagtuon ug Hiri Motu, ang pinulongan nga gigamit sa negosyo. Dayon mibalhin kami sa Daru, usa ka gamayng isla sa usa ka hilit nga probinsiya sa kasadpan. Didto akong nahimamat si Eunice, usa ka dako, kusgan, ug buotang babaye, kansang mga ngipon nangitom tungod sa pagmamag bunga sulod sa daghang katuigan. Sa dihang nasayran ni Eunice nga buot sa Diyos nga ang Iyang mga alagad magmahinlo sa pisikal, moral, ug espirituwal, iyang giundang ang iyang bisyo ug nahimo siyang matinumanong Kristohanon. (2 Corinto 7:1) Sa matag higayon nga makita namo ang mapaubsanong mga indibiduwal nga nagpadapat sa kamatuoran sa Bibliya, makaingon kami nga tinuod gayod ang giingon sa Salmo 34:8: “Tilawi ug tan-awa ninyo nga si Jehova maayo.”

Sa ngadtongadto, si Josef nag-alagad na usab ingong nagapanawng ministro, ug among giduaw ang halos tanang dapit sa Papua New Guinea, usa ka nasod nga nagsultig 820 ka pinulongan. Aron among makaestorya ang mga tawo, nagtuon mig Tok Pisin, nga mao ang nasodnong pinulongan. Among duawon ang lainlaing lungsod ug baryo nga magbaktas, magsakay sa kotse, barko, baroto, ug gagmayng ayroplano. Kinahanglan namong antoson ang naglagiting nga kainit, mga lamok, ug ang kanunayng pagsugmat sa malarya.

Dayon, pagka 1985, nakadawat mig laing asaynment—sa Solomon Islands, nga sidlakan sa Papua New Guinea. Didto, kami nagtrabaho sa sangang buhatan sa mga Saksi ni Jehova ug nagduaw usab sa lainlaing dapit sa nasod aron sa pagdasig sa mga kongregasyon ug pagtambong ug mga asembliya. Sa makausa pa, kinahanglan na usab kaming magtuon ug bag-ong pinulongan—ang Solomon Islands Pidgin. Apan, makalilipay gayod ang pagpakigsulti sa mahigugmaon-sa-Bibliya nga mga molupyo didto!

Ang Akong Kinalisdang Panaw

Niadtong 2001, natapos ang pagdili sa mga Saksi ni Jehova sa Indonesia, ug namalik mi ni Josef sa Jakarta. Apan wala madugay human niadto, ang akong minahal nga bana nadayagnos nga dunay malignant melanoma, usa ka grabeng matang sa kanser sa panit. Mibiyahe mi paingon sa Germany aron sa pagpatambal. Apan, ikasubo nga sa 2005, sa among ika-33 nga anibersaryo sa kasal, siya natulog sa kamatayon, nga nagpaabot nga banhawon sa Paraiso. (Juan 11:11-14) Siya 62 anyos ug nakagugol ug 40 ka tuig diha sa bug-os-panahong ministeryo.

Ako nagpabilin sa Jakarta, diin ako nag-alagad gihapon ingong misyonarya. Gimingaw kaayo ko sa akong bana. Apan ang pagtudlo sa uban bahin sa bililhong kamatuoran nga makita diha sa Pulong sa Diyos nakatabang kanako sa pagsagubang, kay ang ministeryo nakahatag kanakog dakong kalipay ug katuyoan sa kinabuhi. Oo, kombinsido ako nga si Jehova naghatag kanakog labing mabulokon ug makalilipayng kinabuhi.

[Footnote]

[Mapa sa panid 25]

(Alang sa aktuwal nga pagkahan-ay, tan-awa ang publikasyon)

INDONESIA

Java

JAKARTA

Cirebon

Sumatra

Padang

Lake Toba

Borneo

PAPUA NEW GUINEA

PORT MORESBY

Daru

SOLOMON ISLANDS

[Hulagway sa panid 26]

Si Herawati uban sa iyang ginatun-an ug Bibliya sa Solomon Islands

[Hulagway sa panid 26]

Uban kang Josef sa Holland, una pa sa iyang kamatayon niadtong 2005