Pagpaniid sa Kalibotan

Wala pay 25 porsiyento sa mga German ubos sa 40 anyos ang pabor sa adlaw-adlawng pag-ampo uban sa mga anak. Ug sa mga membro sa simbahan, 4 lang sa 10 ang nag-isip niini nga hinungdanon.—APOTHEKEN UMSCHAU, GERMANY.

Ang usa ka tigdonar ug binhi nga dunay wala-mamatikding henetikong mutasyon nga nalangkit sa sakit sa kasingkasing nagpasa sa maong abnormalidad ngadto sa 9 sa 24 ka bata nga nasayrang iyang anak. Usa niini ang namatay tungod sa sakit sa kasingkasing sa edad nga dos anyos.—JAMA, U.S.A.

“Kapin sa 50% sa mga Russian ang nagtuo nga ang korapsiyon maoy dili malikayan ug permanenteng bahin sa kinabuhi.”—RIA NOVOSTI, RUSSIA.

Diyutay rag Tinuod nga Higala

“Ang ordinaryong molupyo sa Britanya dunay tulo lamang ka tinuod nga higala nga masaligan,” nag-ingon ang Daily Telegraph sa London. Sumala sa usa ka pagtuon, lakip sa mga hinungdan kon nganong ang usa wala nay komunikasyon “sa kapin kon kulang 36 ka higala latas sa katuigan” mao ang “kapuliki,” ‘pagbugnaw sa relasyon’ ug, sa kahimtang sa 43 porsiyento niadtong gisurbi, ang “pag-away . . . ug pagbungolay.” Halos 20 porsiyento ang mosugid na lang sa problema ngadto sa ilang kauban sa trabaho kay “wala na silay laing kadangpan.” Ang usa ka tigpamaba sa maong surbi miingon: “Kinahanglan ang dakong paningkamot aron masaligan.”

Samag-Submarino nga Kargahanag Droga

Nag-anam kamoderno ang pamaagi sa mga tigbaligyag droga sa Colombia sa pagpayuhot ug cocaine ngadto sa Central America, Mexico, ug United States. Sukad sa 1993, labing menos 42 ka samag-submarino nga kargahanag droga ang nasakpan ug naembargo sa mga polis sa Colombia. Nadiskobrehan usab ang pipila ka asembolanan niini. Bisan tuod kining gipaandar-ug-krudo nga mga barko dili makatidlom, kini lisod matiktikan sa radar. Ang pipila niini modagan ug 2,000 milyas (3,200 kilometros) una mahutdag krudo, makargahag unom ngadto sa napulo ka toneladang cocaine, ug lagmit mobalor ug $1 ka milyon (U.S.).

Benepisyo sa Pagdungan ug Kaon sa Pamilya

Diha sa usa ka bag-ong surbi, halos katunga lang sa giinterbiyong mga batan-on sa Finland, nga nag-edad ug 14 ngadto sa 16, ang modungag kaon sa pamilya. Gipakita sa maong surbi nga sa daghang panimalay, walay gidalit nga pagkaon. Apan, ang mga batan-on nangandoy niining regular, relaks nga panahon uban sa pamilya. Sa dihang gipangutana kon unsay gusto nila gikan sa ilang ginikanan, sila miingon: “Init nga pagkaon, pagdungag kaon ingong pamilya, ug dunay mamati ug mogugol ug panahon kanimo,” nagtaho ang mantalaang Helsingin Sanomat. Ang pagdungag kaon sa pamilya maayog epekto sa mental nga kahimsog sa batan-on. Sumala sa maong artikulo, “ang mga batan-on nga modungag kaon sa pamilya sagad maayo sa klase, panagsa rang manigarilyo, moinom, o magdroga, ug dili kaayo makaagom ug depresyon.”