Makabaton Kag Mas Maayong Panglawas
Rustam
SI Rustam, nga nagpuyo sa Russia, puliki kaayo. Kaniadto, diha siyay mga batasan nga makadaot sa panglawas, apan sa ulahi iyang naamgohan nga iya kanang giani. Siya mihunong sa pagpanigarilyo ug sa pagpalabig inom. Bisan pa niana, ang taas nga oras sa pagtrabaho atubangan sa kompiyuter nakapaluya kaniya.
Si Rustam magsugod ug trabaho sa alas otso sa buntag, apan ayha pa mawala ang iyang duka inigkaalas diyes, ug pirme siyang masakit. Busa mihimo siyag kausaban sa iyang rutina. Unsay resulta? “Sa milabayng pito ka tuig, duha ra ka adlaw ang akong palta sa trabaho matag tuig tungod sa sakit,” siya miingon. “Maayo kaayo ang akong pamati—lagsik ug malipayon!”
Si Ram, iyang asawa, ug ang ilang duha ka anak, nagpuyo sa Nepal. Sa ilang dapit, walay maayong sanitasyon ug daghan kaayog lamok ug langaw. Kaniadto, si Ram ug ang iyang pamilya pirmeng mag-antos sa mga sakit sa respiratoryo ug sa mga impeksiyon sa mata. Sila mihimo usab ug mga kausaban nga nakahatag kanilag mas maayong panglawas.
Duna Kay Mahimo!
Dato man o pobre, daghan ang wala makaamgo nga ang ilang batasan dunay epekto sa ilang panglawas. Tingali naghunahuna sila nga ang maayong panglawas sulagma lang nga mabatonan ug wala kaayo silay mahimo niini. Ang maong negatibong panghunahuna nagpugong sa daghan nga mohimog paagi nga mabatonan ang mas maayong panglawas ug mas mabungahong kinabuhi.
Sa pagkatinuod, bisan unsa pay imong kahimtang, dunay pipila ka sugyot nga imong mahimo aron maampingan ug mabatonan nimo ug sa imong pamilya ang mas maayong panglawas. Dili ba kawang ang maong paningkamot? Dili gayod! Makahimo ka sa pagpauswag sa kalidad sa imong kinabuhi ug makalikay sa ahat nga kamatayon.
Si Ram ug ang iyang pamilya nagkalos ug limpiyong tubig nga imnonon
Pinaagi sa pulong ug buhat, ang mga ginikanan makatudlo sa ilang mga anak sa pag-ugmad ug maayong mga batasan, nga moresulta sa mas maayong panglawas. Ang ekstrang panahon ug salapi nga magamit dili ra makawang kay mamenosan unya ang pag-antos, ang panahon nga mausik tungod sa sakit, ug ang gasto sa pagpatambal. Sama sa giingon sa usa ka panultihon, Ang panagana mas maayo kay sa tambal.
Sa mosunod nga mga artikulo, atong hisgotan ang lima ka sugyot nga nakatabang kang Rustam, Ram, ug sa uban pa. Kini nga mga sugyot makatabang usab kanimo!