Ang Pagpasakit ba sa Kaugalingon Makapasuod Kanimo sa Diyos?

Ang Hunahuna sa Bibliya

Ang Pagpasakit ba sa Kaugalingon Makapasuod Kanimo sa Diyos?

KADAGHANANG tawo dili makaangay sa ideya nga pasakitan ang kaugalingon. Bisan pa niana, ang mga magsisimba nga nagsakit sa ilang lawas pinaagi pananglitan sa pagbunal, sobrang pagpuasa, ug pagsul-ob ug sapnot nga mga besti aron pilasan ang panit, giisip ingong panig-ingnan sa mga mahinadlokon sa Diyos. Ang maong mga buhat wala lamang mahitabo sa karaang panahon. Sumala sa di pa dugayng mga balita, bisan ang inilang mga lider sa relihiyon karon nagsakit usab sa ilang kaugalingon pinaagig pagbunal.

Unsay nagtukmod sa mga tawo sa pagsimba nianang paagiha? Sumala sa tigpamaba sa usa ka organisasyon nga nag-angkong Kristohanon, “ang kinabubut-ong pagpasakit sa kaugalingon maoy paagi sa pagduyog kang Jesu-Kristo ug sa mga pag-antos nga kinabubut-on niyang gidawat aron tubson kita sa atong mga sala.” Apan, unsa may giingon sa Bibliya bahin niana?

Ampingi ang Imong Lawas

Ang Bibliya wala magsugo ni magtugot nga simbahon ang Diyos pinaagig pagpasakit sa kaugalingon. Gani, tin-aw kining nag-awhag sa mga tawong mahinadlokon sa Diyos nga ampingan ang ilang lawas. Susiha kon giunsa paghubit sa Bibliya ang pagmahal sa bana sa iyang asawa. Sa paghisgot sa paagi nga angayng trataron sa bana ang iyang lawas, kini nag-ingon: “Ang mga bana angay nga maghigugma sa ilang mga asawa sama sa ilang kaugalingong mga lawas . . . Wala gayoy tawo nga nagdumot sa iyang kaugalingong unod; kondili nagapakaon ug nagapangga niini, ingon sa ginahimo usab ni Kristo sa kongregasyon.”—Efeso 5:28, 29.

Duna bay pulos ang sugo nga higugmaon ang asawa sama sa kaugalingong lawas kon dagmalan sa usa ang iyang lawas panahon sa pagsimba? Dayag nga ang mga mahigugmaon sa prinsipyo sa Kasulatan gidahom nga ampingan ug higugmaon pa gani ang ilang lawas, ug kining makataronganong paghigugma sa kaugalingon angayng ipakita usab ngadto sa kapikas.

Nahiuyon niana, ang Bibliya adunay daghang prinsipyo nga motabang sa mga magbabasa niini sa pag-amping sa ilang lawas. Pananglitan, ang Bibliya nag-ingon nga mapuslanon ang kasarangang ehersisyo. (1 Timoteo 4:8) Kini naghisgot sa mga pagkaon nga makaayo sa lawas ug sa dili-maayong epekto sa sayop nga batasan sa pagkaon. (Proverbio 23:20, 21; 1 Timoteo 5:23) Ang Kasulatan nagdasig sa mga tawo sa pagpabiling himsog kay sa pagbuhat niana sila makapabiling aktibo kutob sa maarangan. (Ecclesiastes 9:4) Kon ang mga magbabasa sa Bibliya gidahom nga ampingan ang ilang panglawas niining paagiha, makataronganon ba nga daoton nila ang ilang lawas?—2 Corinto 7:1.

Sundogon ba sa mga Kristohanon ang Naagoman ni Jesus Kaniadto?

Bisan pa sa giingon sa Bibliya, ang pipila ka organisasyon karon sayop nga nag-awhag sa ilang mga membro sa pagsakit sa kaugalingon agig pagsundog sa pag-antos nga naagoman ni Jesus ug sa iyang unang mga sumusunod. Apan ang pag-antos nga gihubit sa mga alagad sa Diyos diha sa Bibliya dili kinabubut-ong gipahinabo sa kaugalingon. Sa dihang ang Kristohanong mga magsusulat sa Bibliya naghisgot sa mga pag-antos ni Kristo, gibuhat nila kana aron dasigon ang mga Kristohanon sa paglahutay sa mga paglutos, dili sa paglutos sa kaugalingon. Busa, kadtong nagsakit sa ilang lawas wala magsundog kang Jesu-Kristo.

Sa pag-ilustrar: Handurawa nga nakita nimo ang usa ka tinamod nga higala nga gibiaybiay ug gidagmalan sa masuk-anong panon sa katawhan. Imong namatikdan nga giantos sa imong higala ang maong pag-atake sa kalmado ug malinawong paagi, nga wala mobalos sa pagdagmal ug pagpanginsulto. Kon gusto nimong sundogon ang imong higala, bunalan ug insultohon ba usab nimo ang imong kaugalingon? Siyempre dili! Kon buhaton nimo kana, imong gisundog ang gihimo sa masuk-anong panon. Hinunoa, ang imo lang buhaton mao ang dili pagbalos kon makaagom ka usab sa maong pag-atake.

Nan, tin-aw nga ang mga sumusunod ni Kristo wala sugoa nga pasakitan ang kaugalingon nga daw kinahanglan nilang sundogon ang masuk-anong panon sa katawhan nga nagsakit ug nagtinguha sa pagpatay kang Jesus. (Juan 5:18; 7:1, 25; 8:40; 11:53) Hinunoa, sa dihang sila pagalutoson, ilang sundogon ang kalmado ug malinawong pag-antos ni Jesus sa kalisdanan.—Juan 15:20.

Dili-Kasulatanhong Buhat

Bisan sa wala pa ang Kristohanong panahon, ang Kasulatan nga naggiya sa kinabuhi ug pagsimba sa mga Hudiyo nagpugong kanila sa pagbuhat ug bisan unsa nga makadaot sa ilang lawas. Pananglitan, ang Balaod tin-awng nagdili sa mga Hudiyo sa pagsamad sa ilang kaugalingon, usa ka batasan nga komon diha sa dili-Hudiyong mga nasod. (Levitico 19:28; Deuteronomio 14:1) Kon dili gusto sa Diyos nga samaran nato ang atong lawas, dili usab niya gusto nga magkaulat-ulat kini tungod sa mga lapdos. Tin-aw ang sukdanan sa Bibliya—ang tinuyong pagdaot sa lawas sa bisan unsang paagi wala uyoni sa Diyos.

Maingon nga gusto sa usa ka eskultor nga pabilhan ang iyang kinulit, si Jehova nga Diyos, ang Maglalalang, gusto usab nga pabilhan ang lawas sa tawo nga iyang gilalang. (Salmo 139:14-16) Sa pagkatinuod, ang pagpasakit sa kaugalingon dili makapalig-on sa atong relasyon sa Diyos. Hinunoa, kini makapawalay-pulos ug magtuis sa mga pagtulon-an sa Ebanghelyo.

Si apostol Pablo giinspirar sa pagsulat bahin nianang makapabug-at, hinimo-sa-tawong mga doktrina: “Kadto mismong mga butanga, sa pagkatinuod, adunay dagway sa kaalam sa gisangon-sa-kaugalingong dagway sa pagsimba ug pakaaron-ingnon nga pagpaubos, sa grabeng pagsakit sa lawas; apan kini walay bili diha sa pagpakigbugno sa pagtagbaw sa unod.” (Colosas 2:20-23) Ang batasan sa pagpasakit sa kaugalingon dili gayod makatabang sa usa nga masuod sa Diyos. Apan, ang mga kinahanglanon sa matuod nga pagsimba makapalagsik, masayon, ug magaan.—Mateo 11:28-30.

NAKAPAMALANDONG KA BA?

● Unsay pag-isip sa Diyos sa lawas sa tawo?—Salmo 139:13-16.

● Ang pagpasakit ba sa imong lawas makatabang nimo sa pagbuntog sa sayop nga mga tinguha?—Colosas 2:20-23.

● Kinahanglan ba nga ang matuod nga pagsimba mabug-at o mapintas?—Mateo 11:28-30.

[Blurb sa panid 11]

Tin-aw ang sukdanan sa Bibliya—ang tinuyong pagdaot sa lawas sa bisan unsang paagi wala uyoni sa Diyos

[Hulagway sa panid 10]

Deboto nga nagluhod paingon sa simbahan

[Credit Line]