Malipayon nga Ako Usa ka Magbalantay
Sumala sa giasoy ni Alymbek Bekmanov
Sa edad nga tres anyos, ako nagsugod pagbantay ug mga karnero, ug ganahan kaayo kong moatiman nila. Pag-edad nakog 17, ako nahimong batid nga magbalantay sa karnero. Sa ulahi, akong nakat-onan ang laing matang sa pagkamagbalantay—usa ka espirituwal nga magbalantay. Pasaysaya ko kon nganong nakahatag kini kanako ug mas dakong kalipay.
NATAWO ako sa 1972. Ang among dako, Kirghiz nga pamilya nagpuyo sa balangay sa Chyrpykty, duol sa matahom nga Lake Issyk Kul. Ang dapit palibot sa lanaw popular kaayo sa mga turista nga mobisita sa Kyrgyzstan, nga kanhi usa ka republika sa Soviet Union. Sa pagkakaron, kami sa akong asawa nga si Gulmira nagpuyo sa Bishkek, ang kaulohan sa Kyrgyzstan, nga nahimutang mga 125 milyas (200 kilometros) gikan sa dapit diin ako nagdako.
Ang Magbalantay ug ang Karnero
Sa bata pa ko, among dad-on ang mga karnero sa mga sibsibanan sa bukid panahon sa tingpamulak. Sagad motungas kamig kapin sa 9,000 piye (3,000 metros), nga dangtag pipila ka adlaw. Ang ubang magbalantay mopilig mas mubo nga ruta ug mas daling makaabot sa mga sibsibanan. Apan moagi sila duol sa lawom nga mga lugot ug titip nga mga pangpang, ug ang mga karnero nga mahimulag sa panon masamdan usahay—o mamatay pa gani.
Sa maong mga agianan, ang mga lobo sagad mangatang o mangatake sa mga karnero, nga makapabulag sa pipila gikan sa panon, ug mopatay kanila. Busa si Tiyo mopilig agianan nga mas sayon ug dili kaayo peligroso, bisan tuod mogugol kanag laing usa ka adlaw o kapin pa. Usahay gusto nakong magdali, apan badlongon ko sa akong uyoan. “Alymbek,” moingon siya, “hunahunaa ang mga karnero, dili ang imong kaugalingon.”
Sa matahom nga mga sibsibanan sa bukid, ang magbalantay maghimog temporaryong mga toril aron maprotektahan ang mga karnero panahon sa kagabhion. Ang pipila ka magbalantay dili ganahang momatag sayo, busa taas na ang adlaw sa dihang magpasibsib sila sa mga karnero. Nianang panahona init na kaayo.
Sa dili madugay ang mga karnero magtapok nga magdungo, ug maglisod pagginhawa. Kay dili man mabusog, sila maluya ug magniwang. Sa kasukwahi, ang akong uyoan sayo kaayong momata—alas kuwatro pa lang sa kadlawon—ug pagsubang sa adlaw nanibsib na ang iyang mga karnero. Busa, ang mga karnero makapanibsib pag-ayo samtang bugnaw pa ang hangin sa kabuntagon. Ingon sa sagad nga isulti sa mga tawo, “Mailhan nimo ang magbalantay pinaagi sa pagtan-aw sa mga karnero.”
Maayong susihon ug tambalan ang mga karnero sa dihang sila nagpahulay human manibsib. Ang usa sa kinadak-ang mga problema nga naagoman sa among mga karnero mao ang pagpangitlog sa langaw diha sa pusod niini. Kon mahitabo kini, ang pusod mohubag. Kon dili dayon kini mamatikdan, ang karnero mag-antos sa hilabihang kasakit ug sila maglatagaw ug mamatay. Among susihon ang mga karnero halos kada adlaw aron amo silang matambalan. Nagkinahanglan kinig panahon ug paningkamot, apan dili ra kini makawang kay ang mga karnero himsog man ug malipayon.
Kada gabii, inigbalik namo sa toril, among iphon ang mga karnero. Sila mosulod sa toril agi sa sigpit nga pultahan—usahay tinagutlo o tinagup-at. Ang among mga karnero moabot ug gatosan, apan nahimo kaming batid kaayo niini nga makaihap kamig mga 800 ka karnero sulod sa 15 o 20 ka minutos. Nagkinahanglan kanag dugayng praktis, apan nahimo namo kana!
Kon dunay makulang sa mga karnero, pangitaon kana sa akong uyoan dala ang pusil ug baston—bisan pag ngitngit ug nag-ulan ug usa ra ka buok ang pangitaon. Siya motawag ug kusog. Ang iyang tingog makaabog sa ihalas nga mga mananap. Sa dihang madungog kana sa karnero, seguradong mobati kining luwas.
Among nganlan ang matag karnero, depende sa hitsura o kinaiya niini. Sa usa ka panon aduna gayoy gahian. Lisod silang pasundon. Usahay, ang ubang karnero mosunod sab sa masinupakon. Busa, bansayon ug disiplinahon una sa magbalantay ang mga gahian. Pananglitan, iyang ibilin sa toril ang karnero nga mag-inusara. Sa ngadtongadto, ang pipila mopatuo ug mosunod na sa magbalantay. Apan ang gahi gyod ug ulo among ihawon.
Lahi nga Matang sa Magbalantay
Niadtong 1989, ako nagtuon ug martial arts ug nahimong maayong laki niana. Pagkasunod tuig, ako nahimong sundalo sa Soviet. Samtang nagserbisyo sa Russia, ang akong kaubanan sa martial arts nagpormag ilang gang. Pagpauli nako sa Kyrgyzstan, ila kong giingnan nga kon moapil ko nila, akong mabatonan ang tanan. Apan nianang panahona, nahimamat nako ang mga Saksi ni Jehova.
Ilang gitubag ang mga pangutana nga naghasol kanako sukad sa bata pa ko, sama sa Nganong mamatay ang tawo? Sa among panaghisgot akong nasabtan nga ang kamatayon maoy resulta sa sala sa unang tawo nga si Adan. (Roma 5:12) Nakat-onan sab nako sa Bibliya nga si Jehova, ang matuod nga Diyos, nagpadala sa iyang Anak nga si Jesus ingong atong Manunubos ug pinaagi sa pagpasundayag ug pagtuo kang Jehova ug sa iyang Anak, mapasaylo ang atong napanunod nga sala. Pinaagi niini makabaton kitag paglaom nga mabuhi sa walay kataposan sa Paraiso sa yuta, nga nahiuyon sa orihinal nga katuyoan sa Diyos alang sa katawhan.—Salmo 37:11, 29; 83:18; Juan 3:16, 36; 17:1-5; Pinadayag 21:3, 4.
Ang tubag sa mga Saksi nga gipasukad sa Kasulatan tin-aw kaayo ug daling masabtan mao nga nakaingon ko, “Mao gyod ni ang husto!” Tungod niana, gusto na kong mobulag sa akong kanhing mga kauban. Daghang higayon nga ila kong agnihon nga mobalik sa ilang grupo. Apan dako kaayo ang akong tinguha nga mokat-on ug mopadapat sa kamatuoran sa Bibliya nga tungod niana, gibalibaran nako ang ilang tanyag ug sa ngadtongadto ako nahimong espirituwal nga magbalantay.
Nianang panahona, usa ka tambalan nga ilado sa among lugar ang mibisita sa akong inahan. Usa niana ka adlaw, pag-uli nako sa amo, ang maong babaye nakigkontak sa mga espiritu. Siya miingon nga duna koy talagsaong katakos ug gidasig ko niya sa pag-adto sa moske aron makadawat ug anting-anting kay makatabang kono ni nako. Hapit ko niyang makombinsir nga sa pagbuhat niini makapanambal sab ko.
Pagkaugma, miadto ko sa mga Saksi nga nagtuon nako sa Bibliya ug ako silang gisuginlan bahin niana. Ilang gipakita kanako sa Bibliya nga si Jehova supak sa tanang matang sa espiritismo, kay nalangkit kini sa daotang mga espiritu. (Deuteronomio 18:9-13) Sulod sa pipila ka gabii, wala koy maayong kinatulgan tungod sa impluwensiya sa mga demonyo. Sa dihang gitudloan ko sa mga Saksi kon unsaon pag-ampo uyon sa kabubut-on ni Jehova, wala na ko makasinatig ngil-ad nga mga damgo. Nakombinsir ko nga akong nakaplagan ang matuod nga Magbalantay, si Jehova.
Akong nahibaloan nga si David, ang magsusulat sa daghang salmo sa Bibliya, magbalantay usab ug karnero sa batan-on pa siya. Iyang gitawag si Jehova nga “akong Magbalantay,” ug gibati sab nako ang iyang gibati ngadto sa Diyos. (Salmo 23:1-6) Gusto nakong sundogon ang Anak ni Jehova nga si Jesus kinsa gitawag ug “magbalantay sa mga karnero.” (Hebreohanon 13:20) Sa usa ka asembliya nga gipahigayon sa Bishkek sa sayong bahin sa 1993, ako nagpabawtismo ingong simbolo sa akong pagpahinungod kang Jehova.
Usa ka Halandomong Panagtigom
Daghan sa akong mga paryente, maingon man sa mga silingan, ang nagtigom aron magtuon sa Bibliya. Mga 70 gikan sa among balangay ang nagtigom duol sa Lake Issyk Kul. Ang usa nako ka paryente, nga pangulo sa konseho sa balangay, interesado kaayo sa kamatuoran. Siya miingon nga iyang hikayon ang usa ka dakong panagtigom nga niana among ikapatin-aw ang among bag-ong pagtuo. Apan ang mga lider sa relihiyon sa among dapit naghulhog sa mga tawo sa pagsupak sa among pagsangyaw. Sila nagkunsabo nga gamiton kini nga panagtigom aron makontrahan mi sa mga tawo.
Sa adlawng gikasabotan, mga usa ka libo ang nagtigom, lakip na ang mga tawo gikan sa tulo ka sikbit nga mga balangay. Pipila lang ka Saksi ang presente, ug ang usa kanamo misugod pagsaysay sa among pinasukad-sa-Bibliya nga pagtulon-an. Wala dangtig lima ka minutos, dihay mitindog ug mipatunghag mahagitong mga pangutana. Sila nangakusar ug namahad kanamo. Tungod niana, ang mga tawo naglagot kanamo ug gusto na nila ming dagmalan.
Nianang tungora, usa sa akong magulang nga lalaki, nga bag-o lang nagsugod pagtuon sa Bibliya, ang mitindog sa pagdepensa kanamo. Siya gikahadlokan ug gilikayan tungod sa iyang pagkamaayong laki sa pagpakig-away. Maisogon siyang mipataliwala kanamo ug sa mga tawo, ug kami namiya nga wala maunsa. Sa misunod nga mga tuig, daghan niadtong presente sa maong panagtigom ang nanga-Saksi. Karon, kapin sa 50 gikan sa among balangay, nga may 1,000 ka molupyo, ang nahimong mga Saksi ni Jehova.
Anak nga Babaye sa Usa ka Magbalantay
Pipila ka bulan sa wala pa ang dakong kombensiyon sa mga Saksi ni Jehova sa Moscow, Russia, niadtong Agosto 1993, akong nahimamat si Gulmira, nga usa ka Saksi sa Kirghiz nga balangay. Ang iyang pamilya mga magbalantay sab ug karnero. Niadtong 1988, sa dihang gidili pa ang buluhaton sa mga Saksi sa Soviet Union, ang inahan ni Gulmira nagtuon sa Bibliya uban sa usa ka Saksi nga ginganlag Aksamy. Sa katuigan sa 1970, si Aksamy nahimong unang Kirghiz nga Saksi ni Jehova sa maong dapit.
Sa wala madugay, si Gulmira miduyog sa iyang inahan sa pagtuon sa Bibliya uban kang Aksamy. Pagka-1990 silang duha nabawtismohan. Sa wala madugay, ang kasingkasing ni Gulmira nagtukmod kaniya sa pagsulod sa bug-os-panahong ministeryo ingong payunir.
Panagsa ra nakong makita si Gulmira sulod sa misunod nga duha ka tuig, sanglit gatosan ka milya (160 kilometros) man ang gilay-on sa among balay gikan sa ilaha. Sa Marso 1995, gusto nako nga mas makaila pa siya, mao nga usa niana ka buntag miadto ko sa ilang balay. Nakurat ko sa pagkasayod nga molarga na diay siya pagkaugma aron moalagad sa sangang buhatan sa Russia, nga kapig 3,500 milyas (5,633 kilometros) ang gilay-on gikan sa ila!
Niadtong panahona nag-alagad na ko ingong bug-os-panahong ministro ug nagtuon sa Russian nga pinulongan, sanglit wala pa may literatura sa Kirghiz nga pinulongan. Sulod sa tulo ka tuig nagsinulatay mi ni Gulmira ug nagsabot mi nga parehas ang among basahon nga mga teksto sa Bibliya aron magkabayloay mig espirituwal nga hunahuna. Nianang panahona, nag-alagad ko sa unang Kirghiz-ug-pinulongang kongregasyon, sa lungsod sa Balikchi.
Pag-alagad Kang Jehova Uban Kang Gulmira
Niadtong 1998, si Gulmira mibakasyon sa Kyrgyzstan, ug kami nagpakasal. Human sa among kasal, ako gidapit nga moalagad uban kang Gulmira sa sangang buhatan sa Russia. Maayo na lang gyod nga nagtuon kog Russian! Sa ulahi, giasayn ko nga motrabaho uban sa Kirghiz nga translation team nga naghubad sa literatura sa Bibliya ngadto sa Kirghiz. Ako nag-ampo kang Jehova nga nangayog kaalam ug hataas nga pailob. Ug siyempre, ang akong kauban sa trabaho nga si Gulmira dako kaayog tabang nako.
Niadtong 2004 ang among translation team gibalhin sa Bishkek, diin ako gitudlo ingong membro sa komite nga nagdumala sa buluhaton sa mga Saksi ni Jehova sa Kyrgyzstan. Niadtong panahona, dihay pito ka Kirghiz-ug-pinulongang kongregasyon ug kapin sa 30 ka nagsultig-Russian nga kongregasyon sa among nasod. Karon duna nay kapin sa 20 ka Kirghiz nga kongregasyon ug daghang Kirghiz nga grupo, nga mga 40 porsiyento sa 4,800 ka Saksi sa Kyrgyzstan.
Kami ni Gulmira nakadesidir sa pagtuon ug Iningles, kay makatabang kana sa among pagsangyaw. Tungod niini, gidapit mi sa pag-adto sa tibuok-kalibotang hedkuwarter sa mga Saksi ni Jehova sa United States niadtong 2008. Didto mitambong ko sa usa ka linain nga tunghaan alang niadtong nanguna sa buluhatong pagsangyaw sa ilang tagsatagsa ka nasod.
Karon, among gibati ni Gulmira nga mas bug-os kaming makaalagad sa espirituwal nga intereses sa mga tawo sa Kyrgyzstan. Sa among naeksperyensiyahan among napamatud-an nga si Jehova mao gayoy mahigugmaong magbalantay. Akong nasinati mismo ang katumanan sa salmo sa Bibliya nga nag-ingon: “Si Jehova mao ang akong Magbalantay. Walay makulang kanako. Siya nagapahigda kanako sa mga sibsibanan nga malunhaw; siya nagatultol kanako sa daplin sa mga dapit-pahulayan nga maayong pagkatubig. Siya nagapabaskog sa akong kalag. Siya nagaagak kanako sa mga alagianan sa pagkamatarong tungod sa iyang ngalan.”—Salmo 23:1-3.
[Hulagway sa panid 23]
Nagpasibsib sa mga karnero
[Hulagway sa panid 23]
Among iphon ang mga karnero kada gabii sa pagseguro nga walay nawala
[Hulagway sa panid 24]
Uban kang Gulmira karon