Pagpaniid sa Kalibotan
“Kapig katunga sa mga Russian naghunahuna nga ang paghiphip sa mga opisyales mao ang labing maayong paagi sa ‘pagsulbad sa mga problema.’”—REUTERS NEWS SERVICE, RUSSIA.
“Gipakita sa usa ka surbi nga 17.5 porsiyento sa hamtong nga mga Insek ang nag-antos sa mga mental disorder . . . Ang mga babaye mas dakog purohan nga mag-antos sa mga mood disorder ug anxiety disorder kay sa mga lalaki.”—CHINA DAILY, CHINA.
“Labing menos 28% sa tanang pagbanggaayg mga sakyanan sa U.S.—o 1.6 ka milyon matag tuig—ang gipahinabo sa mga drayber nga naggamit ug cell phone o nagpadala/nagbasag mga text message, sumala sa bag-ong mga kalkulasyon sa National Safety Council.”—UC BERKELEY WELLNESS LETTER, U.S.A.
“Makauulawng Kasaysayan”
“Ang Report of the Commission to Inquire Into Child Abuse nagpadayag sa usa ka makauulawng kasaysayan sa Ireland,” nag-ingon ang The Irish Times. Sumala sa mantalaan, kini nga taho nagyagyag sa kasaysayan nga namansahan sa pag-abusog mga bata diha sa relihiyosong institusyon sa mga Katoliko, nga naglakip sa “pagbunal sa mga bata tungod lang kay gikuto” ug pag-among-among kanila sulod sa taas nga panahon. Ang pag-abuso wala panumbalinga tungod sa sayop nga pag-unong “sa absolutong awtoridad sa Katolikong Simbahan,” nag-ingon ang mantalaan. “Nagpakaulaw Lang Mo, Gobyerno ug Simbahan,” nag-ingon ang ulohang balita sa Times, nga nagkutlo sa gisulti sa usa nga misimpatiya sa mga biktima.
Tubig sa Bulan
Ang mga siyentipiko nga nagpalupad ug roket ngadto sa bulan miingon nga ilang nadiskobrehan nga duna diay tubig diha sa mialibwag nga abog. Gisusi kana gamit ang spectrometer—instrumento nga mag-analisar sa materyal nga naglangkob sa abog pinaagi sa pag-ila sa wavelength sa kahayag nga masuhop o ibanaag niini. “Daghan kitag nasayran bahin sa bulan ug sa ingon daghan usab kitag nasayran bahin sa solar system,” miingon si Michael Wargo, pangunang lunar scientist sa hedkuwarter sa NASA sa Washington, D.C. Di pa dugay, ang pagsusi sa bulan nagpadayag nga dunay milyonmilyong tonelada nga tubig diha sa north pole niini.
Makapalit nag Bulawan sa Vending Machine
Sa daghang dapit sa kalibotan, ang binaretang bulawan nalakip na sa mga produkto nga mapalit diha sa mga vending machine. Pananglitan, ang usa ka hotel sa Abu Dhabi, sa United Arab Emirates, nagbutag makina nga nagbaligyag 320 ka produkto, lakip na ang binaretang bulawan nga may gibug-aton nga moabot ug 10 gramos ug pinatuyo nga mga sensilyong bulawan. Makita ang pag-usab-usab sa presyo sa bulawan matag diyes minutos diha sa kompiyuter nga konektado sa internasyonal nga mga merkado. Sa pagkakaron, ang makina modawat lamang ug kuwarta (local currency), apan dunay plano nga sa umaabot mahimo na kining gamitag credit card. Ang maong makina gibutang nianang mga dapita “tungod kay daghan ang gustong mopalit ug bulawan,” nag-ingon ang taho sa Reuters.