“Salamat Niini nga Serye!”
● Ang mga tawo gikan sa lainlaing dapit nagpasalamat sa serye sa Pagmata! nga “Repaso Alang sa Pamilya” nga makita sa panid 30 ug 31 sa matag gula niini. Ang mga hulagway ug pangutana nga magpalihok sa magbabasa sa pagpakigbahin, Bible card nga tigomon, hulagway nga ipapangita sa mga bata, ug ang seksiyon nga himoon sa pamilya matulon-anon ug makalingaw. Tagda ang mosunod nga mga komento:
“Akong gidumalahag pagtuon sa Bibliya ang akong duha ka 12-anyos nga apo pinaagig sulat. Gamit ang ‘Repaso Alang sa Pamilya,’ ako kanang patubagan nila ug ila kanang ipadalag balik nako. Ang akong mga apo malingaw kaayo sa among pagtuon, ug pinaagi sa among pagsinulatay akong mapatin-aw ang mga punto nga among gihisgotan. Salamat niini nga serye!”
V. C., United States
“Di pa dugay, ang akong singko-anyos nga anak mihangyo nga among tubagan ang seksiyong ‘Unsay Sayop Niini nga Hulagway?’ sa dili pa matulog. Nakakita kog usa ka kopya sa magasin, ug among gihisgotan ang hulagway. Ang akong anak namati pag-ayo samtang akong gibasa ang asoy sa Bibliya. Karon halos kada gabii gusto na niyang magtuon. Kami sa akong pamilya kinasingkasing nga nagpasalamat kaninyo sa pagtabang sa among mga anak nga malipay sa pagtuon sa Bibliya.”
M. F., France
“Akong nakaila si David, 12 anyos, ug si Jennifer, 6 anyos, diha sa usa ka terminal sa bus. Nakita sa ilang amahan nga nagtanyag kog Pagmata! sa mga biyahedor, busa gipaduol niya sila aron sa pagsusi. Samtang nagbasa sa mga magasin ang ilang amahan ug si David, kami ni Jennifer nagkalingawg tan-aw sa nindot nga mga ilustrasyon ug letrato sa mga langgam ug mananap. Nag-estorya mi bahin sa tanang matahom nga mga butang nga gihimo ni Jehova nga Diyos aron kita malipay. Pag-abot namo sa panid 31, among gisulayan pagpangita ang ‘Mga Hulagway nga Ipapangita sa mga Bata.’ Samtang gipangita nako ang unang hulagway, si Jennifer paspas kaayong nagpakli sa mga panid ug nakit-an niya kana sulod sa pipila ka segundos. Among gisulayan pagpangita ang ikaduha ug ikatulong hulagway, ug siya na usab ang nakauna. Gani, gusto ni Jennifer nga mopadayon mi hangtod nga among nahurot pagpangita ang mga hulagway diha sa napulo ka magasin! Dayon, nangayo pa si Jennifer ug duha ka kopya nga iyang dad-on sa iyang Papa ug igsoon. Pagbiya nako, silang tulo nagpasalamat tungod sa maayo kaayong publikasyon.”
M. C., Ecuador