Ang Hunahuna sa Bibliya

Gipaluyohan ba sa Diyos ang mga Gubat Karon?

MAHITUNGOD sa iyang papel ingong manggugubat, si Haring David sa karaang Israel miingon: “[Ang Diyos] nagatudlo sa akong mga kamot sa pagpakiggubat, ug ang akong mga bukton nagbawog sa busogan nga tumbaga.”—Salmo 18:34.

Maylabot sa mga Kristohanon, si apostol Pablo misulat: “Bisan tuod kami naglakaw diha sa unod, kami wala makiggubat sumala sa kon unsa kami diha sa unod. Kay ang mga hinagiban sa among pagpakiggubat dili unodnon.”—2 Corinto 10:3, 4.

Nagkasumpaki ba kining duha ka teksto? O duna bay lig-ong katarongan kon nganong gitugotan sa Diyos ang pagpakiggubat sa karaang Israel ug kon nganong gidid-an ang mga Kristohanon sa pagbuhat niana? Nausab ba ang panglantaw sa Diyos bahin sa pagpakiggubat? Atong masayran ang tubag kon atong hisgotan ang tulo ka pangunang kalainan tali sa Israel ug sa matuod nga Kristohanong kongregasyon.

Tulo ka Pangunang Kalainan

1. Ang karaang Israel usa ka nasod diin ang Diyos maoy nagtakda sa mga utlanan, ug kini gilibotan sa mga nasod nga sagad makiggubat kanila. Busa, ang Diyos nagsugo sa iyang katawhan sa pagpanalipod sa ilang yuta, nga naghatag pa gani kanilag kadaogan batok sa ilang mga kaaway. (Maghuhukom 11:32, 33) Sa laing bahin, ang Kristohanong kongregasyon walay utlanan ug ang mga membro niini anaa sa tanang kayutaan. Busa, kon ang mga sumusunod ni Kristo sa usa ka nasod makiggubat sa laing nasod, sila makig-away sa ilang mga igsoon sa pagtuo nga angay unta nilang higugmaon ug pakamatyan, kon gikinahanglan.—Mateo 5:44; Juan 15:12, 13.

2. Ang karaang Israel dunay tawhanong hari kansang trono nahimutang sa Jerusalem. Apan ang matuod nga mga Kristohanon gimandoan ni Jesu-Kristo nga karon usa na ka gamhanan nga espiritung linalang kansang trono atua sa langit. (Daniel 7:13, 14) Si Jesus mismo miingon: “Ang akong gingharian dili bahin niining kalibotana. Kon ang akong gingharian bahin pa niining kalibotana, ang akong mga alagad makig-away na unta aron dili ako ikatugyan ngadto sa mga Hudiyo. Apan, sa pagkatinuod, ang akong gingharian dili gikan niini nga tinubdan.” (Juan 18:36) Busa, walay politikal nga gingharian, o pagmando, dinhi sa yuta ang makaangkon nga iya ni Kristo. Nganong hinungdanon kini sa “mga alagad,” o sumusunod ni Jesus? Ang ikatulong punto nagpatin-aw niana.

3. Ang karaang Israel, sama sa ubang nasod, sagad magpadalag mga mensahero, o kanang gitawag karon ug mga embahador o mga sinugo. (2 Hari 18:13-15; Lucas 19:12-14) Si Kristo naghimo usab niana, apan dunay duha ka pangunang kalainan. Una, ang tanan niyang sumusunod nag-alagad ingong mga embahador o kaha mga sinugo. Tungod niana, si apostol Pablo makasulat bahin kaniya ug sa iyang isigka-Kristohanon: “Kami mga embahador kapuli ni Kristo.” (2 Corinto 5:20) Ingong makigdaitong mga embahador, sila dili magsundalo. Ikaduha, ang mga sumusunod ni Jesus mosangyaw sa tanan nga mamati sa ilang mensahe. Si Jesus miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran.” (Mateo 24:14) Siya miingon usab: “Busa panglakaw kamo ug paghimog mga tinun-an sa katawhan sa tanang kanasoran, . . . nga magatudlo kanila sa pagtuman sa tanang butang nga akong gisugo kaninyo.”—Mateo 28:19, 20.

Ikasubo nga dili tanan ang modawat sa mensahe sa mga alagad ni Kristo. Tungod niini, si Pablo misulat sa Kristohanong tig-ebanghelyo nga si Timoteo: “Ingon nga maayong sundalo ni Kristo Jesus dawata ang imong bahin sa pag-antos sa daotan.” (2 Timoteo 2:3) Siyempre, ang mga hinagiban ni Timoteo maoy espirituwal ug kini naglakip sa sinulat nga Pulong sa Diyos, nga gitawag ug “espada sa espiritu.”—Efeso 6:11-17.

Nganong ang Israel Gipulihan sa Kristohanong Kongregasyon?

Sa duolag 1,500 ka tuig, ang nasod sa Israel nakabatog espesyal nga relasyon sa Diyos, nga gibase sa usa ka pakigsaad, o kontrata. (Exodo 19:5) Ang maong pakigsaad, nga si Moises ang tigpataliwala, naglakip sa Napulo ka Sugo ug sa ubang balaod, nga ang tanan nagpalambo sa matuod nga pagsimba ug sa hataas nga moral nga mga sukdanan. (Exodo 19:3, 7, 9; 20:1-17) Apan, ikasubo nga ang nasod sa Israel wala magmatinumanon sa Diyos, ug gipatay pa gani nila ang iyang mga propeta.—2 Cronicas 36:15, 16; Lucas 11:47, 48.

Sa kataposan, gipadala ni Jehova ang iyang Anak, si Jesu-Kristo, nga natawo ingong Hudiyo. Imbes dawaton siya ingong Mesiyas, ang Hudiyohanong nasod nagsalikway kaniya. Ingong resulta, gitapos sa Diyos ang iyang dugay nang pakigsaad sa Israel, ug gikuha ang mahulagwayong paril nga nag-ulang sa mga Hudiyo ug sa mga dili-Hudiyo.a (Efeso 2:13-18; Colosas 2:14) Sa samang higayon, gitukod sa Diyos ang Kristohanong kongregasyon ug gitudlo si Jesus ingong Ulo niini. Dugang pa, sa wala pa matapos ang unang siglo, ang maong kongregasyon gilangkoban sa mga tawo gikan sa daghang kanasoran. “Sa matag nasod ang tawo nga mahadlok kaniya ug magabuhat sa pagkamatarong dalawaton kaniya,” miingon ang Hudiyong apostol nga si Pedro.—Buhat 10:35.

Ang mga Saksi ni Jehova naningkamot sa pagsunod sa panig-ingnan sa unang mga Kristohanon. Busa, ang mga Saksi nailhan tungod sa ilang pagsangyaw ug sa ilang pagkaneyutral sa politika ug sa pisikal nga pagpakiggubat. (Mateo 26:52; Buhat 5:42) Oo, wala nila tugoti ang bisan unsa nga makababag kanila sa pagpahayag sa maayong balita sa Gingharian sa Diyos, ang bugtong gobyerno nga magwagtang sa pagkadaotan ug magpatunghag dumalayong kalinaw sa yuta. Naghunahuna si Pablo nianang bililhong paglaom sa dihang siya misulat: “Ingong mga kapuli ni Kristo kami nagpakiluoy: ‘Magpasig-uli kamo ngadto sa Diyos.’” (2 Corinto 5:20) Ang maong mga pulong mas dinalian karon, kay kita anaa na sa kinatumyang bahin sa “kataposang mga adlaw” niining daotang kalibotan.—2 Timoteo 3:1-5.

[Footnote]

NAKAPAMALANDONG KA BA?

● Unsang talagsaong hiyas ang gipakita sa mga Kristohanon sa usag usa?—Juan 13:34, 35.

● Unsay pangunang “hinagiban” sa matuod nga Kristohanon?—Efeso 6:17.

● Unsang hinungdanong mensahe ang gipahibalo sa mga hawas ni Kristo?—Mateo 24:14; 2 Corinto 5:20.

[Hulagway sa panid 23]

Ang mga Saksi ni Jehova adunay tibuok-kalibotang panag-igsoonay ug neyutral sa paggubatay sa mga nasod