Pagkamatinud-anon Moresultag Tinuod nga Kalamposan
“Bisag ang usa ka tawo adunay kadagaya ang iyang kinabuhi wala magagikan sa mga butang nga iyang gipanag-iya.”—Lucas 12:15.
ANG pagpanginabuhi gikinahanglan. May responsibilidad kita sa Diyos sa pagtagana sa atong kaugalingon ug sa atong pamilya.—1 Timoteo 5:8.
Apan komosta kon ang pagpangitag kuwarta ug ang mga butang nga mapalit niana mahimo nang sentro sa imong kinabuhi? Komosta kon mao na lang kini ang imong tumong? Ang tawo kansang pangunang tumong mao ang pagbaton ug bahandi hayan dili managanang manglimbong. Sila makaamgo sa ulahi nga ang pagpanglimbong dili makahatag ug tinuod nga kalamposan. Dugang pa, ang Bibliya nag-ingon nga ang gugma sa salapi makahatag ug daghang kasakitan.—1 Timoteo 6:9, 10.
Tagda kining upat ka panig-ingnan sa mga tawo nga nag-isip nga ang kalamposan wala magdepende sa pagbatog daghang bahandi.
Pagtahod sa Kaugalingon
“Sa miaging katuigan, nakigkita ko sa usa ka kliyente nga gustong mokuhag insyurans nga mokantidad ug usa ka milyong dolyar. Ang akong komisyon moabot ug libolibong dolyar. Iya kong giingnan nga mokuha lang siyag insyurans kon hatagan nako siyag katunga sa akong komisyon. Ang iyang gipangayo dili maayo ug ilegal pa gyod, ug ako siyang giingnan niini.
“Giingnan nako siya kon dili ba siya mahadlok mohatag sa iyang personal ug pinansiyal nga mga impormasyon ngadto sa tawong limbongan. Ako siyang gisultihan pag-usab sa akong baroganan ug giingnan sa pagkontak nako kon modayon siya sa pagkuhag insyurans. Wala na gyod siya mokontak.
“Kon misugot pa ko, madaot unta ang akong pagkamatinud-anon ug reputasyon ingong Kristohanon. Maulipon unta ako niining tawhana nga nangengganyo nako sa pagpanglimbong.”—Don, U.S.A.
Kalinaw sa Hunahuna
Sama sa giasoy sa unang artikulo, si Danny gitanyagan ug dakong kantidad kon mamakak siya bahin sa katakos sa pabrika sa pagsuplay ug materyales. Unsay iyang gihimo?
“Akong gipasalamatan ang manedyer sa iyang pagdapit kanakog panihapon ug akong giuli ang sobre nga dunay kuwarta. Namugos siya ug miingon nga kon akong ipapasar ang iyang pabrika, mohatag siyag dugang padanlog. Wala ko mosugot.
“Kon gidawat nako ang hiphip, pangulbaan unta ko pirme nga mabulgar. Sa ulahi, nadiskobrehan kini sa akong boss. Malipayon ko ug malinawon ug hunahuna nga wala ko manglimbong. Nahinumdoman nako ang Proverbio 15:27: ‘Ang usa nga nagahimog dili-minatarong nga ganansiya nagadalag pagkasinalikway sa kaugalingon niyang balay, apan ang nagadumot sa mga gasa [o hiphip] mao ang magpabiling buhi.’”—Danny, Hong Kong.
Kalipay sa Pamilya
“Duna koy kaugalingong negosyo sa konstruksiyon. Daghan kaayo unta ang higayon sa paglimbong sa mga kustomer o sa dili pagbayad ug buhis. Apan ang akong pamilya nakabenepisyo sa akong tinguha nga magmatinud-anon.
“Ang pagkamatinud-anon angayng ipakita sa tanang panahon, dili lang sa trabaho o sa negosyo. Kon nahibalo ka nga wala ikompromiso sa imong bana o asawa ang mga prinsipyo sa Diyos sa pagkamatinud-anon, modako ang pagsalig sa pamilya. Ang imong kapikas may kompiyansa kay nahibalo nga ang pagkamatinud-anon dili samag besti nga isul-ob ug hukason kon dili na ganahan.
“Bisag tag-iya ka pa sa kinadak-ang kompaniya sa kalibotan, dili nimo mapalit ang kahupayan gikan sa mga problema sa pamilya. Kay Saksi ni Jehova, nahimong balanse ang akong kinabuhi tungod sa pagsunod sa mga prinsipyo sa Bibliya. Duna koy panahon sa pagpakig-uban sa akong pamilya, nga dili magpadala sa agos niining kalibotana nga dolyar ug kahakog lay gipangagpas.”—Durwin, U.S.A.
Maayong Relasyon sa Diyos
“Usa sa akong trabaho ang pagpamalit ug mga suplay sa akong kompaniya. Ang mga ahente usahay mosugyot nga imbes ang kompaniya maoy hatagan sa tibuok nga diskuwento, ila akong hatagag porsiyento sa kantidad sa mga butang nga paliton sa akong kompaniya. Apan usa kini ka matang sa pagpangawat gikan sa akong kompaniya.
“Igo-igo ra ang akong suweldo, ug magamit unta nako ang dugang kita. Apan dili ikabaylo ang hinlo nga konsensiya ug maayong baroganan atubangan kang Jehova nga Diyos. Busa sa matag transaksiyon, ginasunod nako ang prinsipyo sa Bibliya diha sa Hebreohanon 13:18: ‘Buot namong magmaminatud-on sa tanang butang.’”—Raquel, Pilipinas.
[Kahon/Mga hulagway sa panid 9]
Mga Prinsipyo sa Matinud-anong Negosyo
Sa matag dapit, lainlaing mga sukdanan ang gisunod sa mga negosyo. Apan ang mga prinsipyo sa Bibliya makatabang sa paghimog matarong nga desisyon. Ang negosyong walay panglimbong dunay unom ka hiyas:
Dili Bakakon
Prinsipyo: “Ayaw pagbinakakay sa usag usa.”—Colosas 3:9.
Kasaligan
Prinsipyo: “Himoa lang ang inyong pulong nga Oo magkahulogan ug Oo, ang inyong Dili, Dili.”—Mateo 5:37.
Kapiyalan
Prinsipyo: “Ayaw ibutyag ang kompidensiyal nga sulti sa laing tawo.”—Proverbio 25:9.
Matinud-anon
Prinsipyo: “Dili ka magdawat ug hiphip, kay ang hiphip makapabuta sa mga tawong tin-awg panan-aw.”—Exodo 23:8.
Makataronganon
Prinsipyo: “Ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila.”—Mateo 7:12.
Subay sa Balaod
Prinsipyo: “Ibayad ngadto sa tanan ang mga nahiangay kanila, kaniya nga nangayog buhis, ang buhis.”—Roma 13:7.
[Kahon/Mga hulagway sa panid 9]
Kon Unsaon sa Pagpabiling Matinud-anon sa Negosyo
● Tinoa Kon Unsay Importante Kanimo. Pananglitan, mas importante ba kanimo ang bahandi o ang maayong relasyon sa Diyos?
● Desisyon Daan. Dahoma ang mga situwasyon nga magsulay sa imong pagkamatinud-anon, ug planoha kon unsay himoon.
● Ipahibalo ang Imong Baroganan. Sa magsugod ug bag-ong transaksiyon, mataktikanhong ipahibalo sa uban ang imong baroganan.
● Pangayog Tabang sa Uban. Kon makaatubang ug situwasyon nga mahimong makompromiso ang imong prinsipyo, pangayog tambag sa tawo nga sama nimog baroganan.
[Hulagway sa panid 8]
Kon matinud-anon ka, malinawon kag hunahuna