Makakolektag Tubig nga Bukobuko sa Bakukang sa Namib

● Mga 900 milyones ka tawo sa tibuok kalibotan walay hinlong tubig. Sa daghang dapit, ang mga babaye ug bata mobaktas pag layo sa pagkalos ug tubig. “Luoy kaayo ang mga kabos nga mobaktas pag daghang oras adlaw-adlaw aron sa pagkuha sa ilang panginahanglan,” miingon si Shreerang Chhatre, inhenyero sa Massachusetts Institute of Technology. Sa pagsulbad sa problema, si Chhatre ug ang iyang mga kauban nanukiduki labot sa pagsawod ug yamog, ug nakakat-on sila sa pamaagi sa bakukang sa Namib.

Hunahunaa: Kada buntag, ang yamog mapadpad paingon sa desyerto sa Namib, Africa. Aron makakolektag yamog, ang bakukang motuwad ug iyang ipabantang sa yamog ang iyang bukobuko.a Ang mga bugdo-bugdo sa bukobuko dunay substansiyang makakolektag yamog. Ang yamog nga masangit mahimong gigming nga tubig ug mag-anam ka dako. Dayon agi sa dili masuphag tubig nga mga kanalkanal sa bukobuko, ang tubig modaligdig paingon sa baba.

Gustong sundogon ni Chhatre ug sa iyang mga kauban ang maong pamaagi sa pagkolektag yamog alang sa tawo. Siyempre, gikinahanglan sa bakukang ang tubig aron mabuhi, pero labaw pa niini ang gikinahanglan sa tawo. Ug dako kaayong problema ang pagtaganag pondo alang niini nga proyekto. Sa pagkakaron, ang pagsawod ug yamog aron magamit sa tawo “maoy usa ka proyekto nga ginatun-an pa,” miingon si Chhatre.

Unsay imong hunahuna? Ang makakolektag tubig nga bukobuko sa bakukang mitungha ba pinaagig ebolusyon? O kini ba gidisenyo?

[Footnote]

[Hulagway sa panid 22]

Gigming nga napondong tubig modaligdig paingon sa baba sa bakukang

[Picture Credit Line sa panid 22]

Photo: Chris Mattison Photography/photographersdirect.com