PAGPANIID SA KALIBOTAN

Spain

Usa ka grupo sa mga siyentista nagtuo nga ang kalihokan sa tawo lagmit maoy nakaingon sa linog niadtong 2011 sa Lorca, sa habagatang Spain, nga nakakalas ug siyam ka tawo ug nakaangol ug daghan. Nakita sa mga geologo nga dunay koneksiyon tali sa kusog nga linog ug sa mga lugar diin daghang tubig sa ilalom sa yuta ang ginabomba para sa irigasyon.

China

Ang mga turista gikan sa China nakagastog $102 bilyones (U.S.) niadtong 2012 sa mga pagbiyahe gawas sa nasod. Sumala sa World Tourism Organization sa UN, kini nga kantidad nagpakita nga sa unang higayon ang China ang kinadak-an ug gasto sa pagbiyahe ngadto sa ubang nasod​—nga nag-una sa Germany ug United States. Ang mga turista gikan sa matag usa niining duha ka nasod nakagastog mga $84 bilyones (U.S.).

Japan

Usa ka pagtuon nga gireport sa medikal nga magasin sa Britain nga BMJ nag-obserbar ug mga 68,000 ka tawo sa Japan sa aberids nga 23 ka tuig. Nakita sa mga tigdukiduki nga ang mga babaye nga natawo sa 1920 hangtod sa 1945 nga nagsugod pagpanigarilyo nga wala pay 20 anyos, sa aberids, mas mubog 10 ka tuig ang ilang kinabuhi kon itandi sa mga babaye nga wala gayod makapanigarilyo; sa mga lalaki, mas mubo ug walo ka tuig.

Mauritania

Ang pag-importar, paggama, ug paggamit ug mga bag nga plastik gidili aron sa pagpanalipod sa mga mananap sa dagat ug sa kamad-an, nga mamatay kon makakaon niini. Ang gobyerno nag-awhag sa paggamit ug madunot nga sudlanan.

Kalibotan

Sa aberids, ang ginabayad sa mga kompaniya sa insyurans sa usa ka tuig gumikan sa mga kalamidad nga gipahinabo sa daot nga klima maoy mga $50 bilyones (U.S.). Kini nga kantidad, nga gipasibo sa pagkunhod sa balor sa kuwarta, misakag kapin sa duha ka pilo matag napulo ka tuig sukad sa 1980.