Ang Mesiyas

Unsaon pag-ila sa Mesiyas?

Sumala sa tagna sa Bibliya, ang Mesiyas, o Kristo, moanhi sa duha ka managlahi nga papel sa lahi nga yugto sa panahon.a Sa iyang unang papel, siya mahimong tawo. Aron siya mailhan, ang mga magsusulat sa Bibliya nagtagna ug daghang bahin sa iyang kinabuhi ug ministeryo. Gani, ang pangunang katuyoan sa tagna sa Bibliya maoy sa “pagpamatuod bahin kang Jesus.”—Pinadayag 19:10.

ANG GIINGON SA BIBLIYA

Ang Mesiyas . . .

• Kaliwat ni Haring David.—Isaias 9:7; Lucas 3:23-31.b

• Matawo sa lungsod sa Betlehem.—Miqueas 5:2; Lucas 2:4-7.

• Usa ka mapaubsanong magwawali sa “maayong balita.”—Isaias 61:1; Lucas 4:43.

• Tamayon ug isipong walay pulos.—Isaias 53:3; Mateo 26:67, 68.

• Budhian baylo sa 30 ka pirasong plata.—Zacarias 11:12, 13; Mateo 26:14, 15.

• Maghilom atubangan sa mga tawong mangakusar kaniya dihang ilang hukman siyag kamatayon bisag walay sala.—Isaias 53:6, 7; Mateo 27:12-14.

• Usa ka “kordero” nga isakripisyo, nga magwala sa sala ug makahatag sa tawo ug hinlong baroganan atubangan sa Diyos.—Isaias 53:7; Juan 1:29, 34, 36.

• Patyon nga walay bukog nga balion.—Salmo 34:20; Juan 19:33, 36.

• Ilubong uban sa mga dato.—Isaias 53:9; Mateo 27:57-60.

• Banhawon sa ikatulong adlaw.—Mateo 16:21; 28:5-7.

Natuman ni Jesus kining tanang tagna ug daghan pang uban. Nag-ayo usab siyag mga masakiton ug nagbanhaw ug mga patay. Busa siya naghatag ug dugang pamatuod nga siya ang Mesiyas ug siya naghatag usab ug lig-ong basehanan sa pagtuo sa mga saad sa Bibliya nga iyang himoon kining mga butanga sa umaabot. (Lucas 7:21-23; Pinadayag 21:3, 4) Human sa pagbanhaw kang Jesus, siya milingkod sa “tuong kamot” sa Diyos nga naghulat sa panahon nga iyang taposon ang iyang buluhaton ingong Mesiyas.—Salmo 110:1-6.

“Sa dihang ang Kristo moabot, himoon ba kaha niya ang mas daghang ilhanan kay sa gihimo niining tawhana?”—Juan 7:31.

Sa unsang paagi taposon sa Mesiyas ang iyang buluhaton?

Ang mga Hudiyo sa panahon ni Jesus naglaom nga ang Mesiyas magpahigawas kanila gikan sa pagmando sa Roma ug maghari sa napasig-uling gingharian sa Israel. (Buhat 1:6) Sa ulahi na lang nakasabot ang Hudiyong mga sumusunod ni Jesus nga didto niya taposon sa langit ang iyang papel ingong gamhanang espiritu nga linalang nga dunay dakong awtoridad.—Mateo 28:18.

ANG GIINGON SA BIBLIYA

Sa iyang ikaduhang papel, ang Mesiyas . . .

• Magmando ingong Hari sa Gingharian sa Diyos, usa ka tibuok kalibotang gobyerno.—Daniel 7:13, 14; Pinadayag 11:15.

• Mahimong panalangin sa tanan nga magpakitag pagtuo kaniya.—Genesis 22:17, 18; Salmo 72:7, 8.

• “Makapakugang sa daghang kanasoran” ug sa ilang magmamando dihang iyang laglagon sila tungod sa pagbatok kaniya.—Isaias 52:15; Pinadayag 19:19, 20.

• Magluwas ug “dakong panon” sa matarong nga katawhan gikan sa lainlaing kanasoran ngadto sa usa ka malinawong bag-ong kalibotan.—Pinadayag 7:9, 10, 13-17.

• Uban kang Jehova nga Diyos, magbanhaw sa mga patay ug magpapuyo kanila sa Paraisong yuta.—Lucas 23:43; Juan 5:21, 28, 29.

• Magtudlo sa iyang mga sakop sa dalan sa matuod nga pakigdait.—Isaias 11:1, 2, 9, 10.

• Magwala sa sala, nga maoy hinungdan sa sakit ug kamatayon.—Juan 1:29; Roma 5:12.

• Magwagtang sa tanang buhat ni Satanas ug maghiusa sa tawhanong pamilya ubos sa pagmando ni Jehova nga Diyos.—1 Corinto 15:25-28; 1 Juan 3:8.

Natuman ni Jesus ang iyang unang papel ingong Mesiyas. Tumanon usab niya ang iyang ikaduhang papel. Busa maalamong magkuha kitag kahibalo bahin kang Jesus, kay siya nag-ingon: “Ako ang dalan ug ang kamatuoran ug ang kinabuhi.”—Juan 14:6.

“Sa iyang mga adlaw molambo ang matarong, ug ang kadagaya sa pakigdait hangtod nga ang bulan mahanaw na. Ug aduna unya siyay mga sakop . . . hangtod sa mga kinatumyan sa yuta.”—Salmo 72:7, 8.