PANGUNANG TOPIKO
Kon Unsaon Pagkontrolar sa Imong mga Nabatasan
DIHANG mitingog ang alarm clock ni Austin, katulgon pa siya. Pero mibangon dayon siya, nagsul-ob ug pang-jogging nga sinina nga iya nang giandam sa gabii pa, ug nag-jogging kadiyot—nga maoy iyang ginahimo tulo ka beses sa usa ka semana sa miaging tuig.
Si Laurie ug ang iyang bana naglalis. Kay nasuko, miadto dayon siya sa kosina, nagkuhag usa ka putos nga chocolate, ug gihurot kinig kaon—nga maoy iyang ginahimo dihang masuko.
Unsay kaamgiran ni Austin ug Laurie? Nahibalo man sila o wala, sila dunay batasan nga awtomatiko nilang ginahimo.
Ikaw, komosta? Duna bay batasan nga maayo nga gusto nimong ugmaron? Tingali gusto nimo nga mag-ehersisyo kanunay, matulog ug sayo, o makigkontak sa imong mga minahal.
Sa laing bahin, tingali gusto nimong undangon ang mga nabatasan nimo nga dili maayo, sama sa pagpanigarilyo, sobrang pagkaog junk food, o paggugol ug daghang oras sa Internet.
Sa tinuod lang, dili sayon ang pag-undang sa mga nabatasan nimo nga dili maayo. Gani, kini samag pagbukot ug habol diha sa kama sa tugnawng panahon; nindot ihigda, lisod ibangon. Ang nabatasan nga dili maayo sayon ugmaron pero lisod undangon.
Busa sa unsang paagi makontrolar nimo ang imong mga nabatasan aron kini makahatag nimog kaayohan imbes nga makadaot? Sayra ang tulo ka sugyot nga base sa mga prinsipyo sa Bibliya.