PANGUNANG TOPIKO | KON UNSAON PAGKONTROLAR SA IMONG MGA NABATASAN
2 Dumalahag Maayo ang Imong Situwasyon
Midesisyon ka nga sustansiyadong pagkaon na ang imong kaonon, pero naglaway kang nagtan-aw sa ice cream.
Midesisyon ka nga mohunong na sa pagpanigarilyo, pero gitunolan ka sa imong higala ug sigarilyo bisag nahibalo siya nga naningkamot kang mohunong sa pagpanigarilyo.
Nagplano kang mag-ehersisyo karon, pero ang pagpangita pa lang sa imong sapatos kapoy na kaayo!
Unsay imong namatikdan niini nga mga esena? Napamatud-an nga ang atong situwasyon ug ang mga tawo nga atong gipakig-ubanan dakog epekto sa atong pag-ugmad ug batasan nga maayo ug pagwala sa batasan nga dili maayo.
PRINSIPYO SA BIBLIYA: “Maalamon ang tawo nga nakakita sa katalagman ug nagtago sa iyang kaugalingon, apan ang walay kasinatian moagi ug magaantos sa silot [o, resulta].”—Proverbio 22:3.
Gitambagan kita sa Bibliya sa pagplano daan kon unsay himoon. Sa ingon, makalikay kita sa mga situwasyon nga makababag nato sa pagkab-ot sa atong mga tumong, ug busa mapaarang-arang nato ang atong situwasyon. (2 Timoteo 2:22) Busa, angay natong dumalahog maayo ang atong situwasyon.
Himoang lisod ang pagbuhat ug dili maayo ug himoang sayon ang pagbuhat ug maayo
ANG IMONG MAHIMO
Himoang lisod ang pagbuhat ug dili maayo. Pananglitan, kon gusto ka nga dili na mokaog junk food, ayaw pagpondog pagkaon nga dili maayo para nimo. Nianang paagiha, bisag matental ka nga mokaon, dili ka makakaon kay wala may makaon.
Himoang sayon ang pagbuhat ug maayo. Pananglitan, kon nagplano ka nga mag-ehersisyo sa buntag, andama daan sa gabii pa ang imong isul-ob. Kon dali kang makasugod, dakog posibilidad nga masundan pa kini.
Piliag maayo ang imong mga higala. Kita may tendensiya nga mahisama niadtong kanunay natong ikauban. (1 Corinto 15:33) Busa ayaw kaayo pakig-uban niadtong magdaldal nimo sa pagpadayon sa nabatasan nimo nga dili maayo, ug pakig-uban niadtong makaimpluwensiya nimo sa pag-ugmad ug batasan nga maayo.