Kon Maglain Nag Puyo ang mga Anak

ANG PROBLEMA

Ang mga magtiayon sagad makaatubang ug dako nga problema dihang ang ilang mga anak managko na ug maglain nag puyo. Dihang ang mga anak mamiya na sa balay, ang mga magtiayon morag dili na magkaila. “Daghan kog natambagan nga mga magtiayon nga dili na makamaong makigkomunikar sa ilang kapikas,” misulat si M. Gary Neuman, nga eksperto bahin sa pamilya. “Karon nga wala na ang mga anak diha sa balay, wala na kaayo silay estoryahan.”a

Susama ba niana ang imong kaminyoon? Kon oo, duna kay mahimo aron moarang-arang ang inyong relasyon. Pero, ato unang hisgotan ang pipila ka hinungdan kon nganong dili na kaayo maayo ang inyong relasyon.

KON NGANONG MAHITABO KINI

Sulod sa daghang tuig, ang mga anak maoy pirmeng unahon. Tungod sa maayong mga intensiyon, unahon sa mga ginikanan ang panginahanglan sa ilang mga anak kay sa panginahanglan sa ilang kapikas. Busa naanad na sila sa ilang responsibilidad ingong amahan ug inahan mao nga wala na nila mahatagig atensiyon ang ilang relasyon ingong bana ug asawa​—ug madayag lang kini dihang ang mga anak mamiya na sa balay. “Maayo pa tong naa pa ang mga bata sa balay kay magkauban pa mi sa mga buluhaton ug mga kalihokan,” miingon ang 59 anyos nga asawa. Pero dihang ang mga anak namiya na, siya miingon, “nag-iyaiya na mi.” Dihay higayon nga iya pa ganing gisultihan ang iyang bana, “Dili na ta puwedeng magkaduol, kay mag-away ra ta.”

Ang ubang magtiayon dili andam niining bag-ong situwasyon. “Para sa daghang magtiayon, mora silag bag-ong minyo,” nag-ingon ang librong Empty Nesting. Morag wala na kaayo silay butang nga gikauyonan, mao nga mag-iyaiya na lang sila, nga mora na lag magkauban sa balay imbes magtiayon.

Pero ayawg kabalaka, kay puwede nimo kining malikayan, ug makabenepisyo ka pa sa mga kaayohan niining bag-ong situwasyon. Ang Bibliya makatabang nimo niining bahina. Ato kining hisgotan.

ANG IMONG MAHIMO

Dawata ang kausaban. Bahin sa mga anak nga nanagko na, ang Bibliya nag-ingon: “Ang lalaki mobiya sa iyang amahan ug sa iyang inahan.” (Genesis 2:24) Kay ginikanan, gusto nimong maandam ang imong mga anak alang nianang panahona ug matudloan silag mga kahanas nga ilang magamit inigkahamtong. Kon kanay imong panglantaw, ang pagkinaugalingon sa imong mga anak maoy butang nga imong ikapasigarbo.​—Prinsipyo sa Bibliya: Marcos 10:7.

Siyempre, bisag wala na sa imong poder ang imong mga anak, ikaw gihapon ang ilang ginikanan. Apan karon, consultant ka na lang, imbes superbisor. Masuod gihapon ka sa imong mga anak bisag ang imong pangunang atensiyon tua na sa imong kapikas.b​—Prinsipyo sa Bibliya: Mateo 19:6.

Isulti ang imong pagbati. Isulti sa imong kapikas kon unsay imong gibati niini nga kausaban, ug paminaw sab sa isulti sa imong kapikas. Magmapailobon ug magmasinabtanon. Dili dihadiha nga molig-on ang inyong relasyon, pero ang inyong paningkamot moresultag kaayohan.​—Prinsipyo sa Bibliya: 1 Corinto 13:4.

Paghunahunag bag-ong mga butang nga puwede ninyong himoon. Pag-estorya mog mga tumong nga gusto ninyong kab-oton ug mga kalihokan nga gusto ninyong buhaton. Kay nakapadako nag mga anak, kamo daghan nag mga kasinatian. Pahimusli kana nga kasinatian sa pagtabang sa uban!​—Prinsipyo sa Bibliya: Job 12:12.

Hinumdomi ang inyong panaad. Hunahunaa kon unsay inyong nagustohan sa usag usa. Hisgoti ang inyong mga kagahapon ug ang mga problema nga inyong nasagubang. Ingong resulta, kining bag-ong situwasyon sa inyong kinabuhi mahimong maayo para ninyo. Gani, kon magtinabangay mo, inyong mapalig-on ang inyong relasyon ug mahaling pag-usab ang inyong gugma sa usag usa.