Tudloi ang Imong Anak nga Magpaubos

ANG PROBLEMA

• Ang imong anak nga 10 anyos hambogiro na kaayo!

• Gusto niya nga pirme siyang hatagag espesyal nga pagtagad.

Basin nakahunahuna ka, ‘Nganong ingon ana siyag kinaiya? Gusto nako nga maayo siyag panglantaw sa kaugalingon pero dili pod nang maghunahuna siya nga mas maayo siya sa uban!’

Posible bang makakat-on ang imong anak nga magmapainubsanon pero dili pod mobating wala siyay bili?

ANG ANGAY NIMONG MAHIBALOAN

Sa milabayng mga dekada, ang mga ginikanan gidasig nga ihatag ang gusto sa ilang mga anak; pasidunggan sila bisag wala silay maayong nahimo; ug dili tambagan o disiplinahon. Gituohan nga kon ipabati sa mga anak nga espesyal sila, modako sila nga may kompiyansa sa kaugalingon. Pero unsay resulta? Ang librong Generation Me nag-ingon: “Ang mga paningkamot nga makabatog kompiyansa sa kaugalingon ang mga anak nakapahimo hinuon kanila nga mapahitas-on.”

Kadaghanan sa mga bata nga ginadayeg bisag walay maayong nahimo nagdako nga dili modawat ug kapakyasan, tambag, ug sayop. Kon ang ilang gusto ang pirmeng matuman, maglisod sila sa pagbatog maayong relasyon sa uban dihang mohamtong na. Ingong resulta, daghan nila ang mabalak-on ug nag-antos sa depresyon.

Ang mga bata makabatog tinuod nga pagpabili sa kaugalingon, dili pinaagi sa kanunayng pagdayeg kanila, kondili pinaagi sa ilang maayong mga nahimo. Dili lang kompiyansa sa kaugalingon ang gikinahanglan niana. Angay silang makakat-on, magpraktis, ug mahimong hanas sa ilang mga katakos. (Proverbio 22:29) Kinahanglan pod silang mahimong matinabangon sa uban. (1 Corinto 10:24) Kining tanan nagkinahanglag pagkamapainubsanon.

ANG IMONG MAHIMO

Dayega imong anak kon duna siyay mahimong maayo. Kon ang imong anak dakog score sa exam, dayega siya. Kon gamay ra siyag grado, ayaw dayog basola ang titser. Kana dili makatabang sa imong anak nga magmapainubsanon. Tudloi hinuon siya kon unsay iyang buhaton aron mouswag siya sa sunod. Ihatag lang ang pagdayeg kon may maayo na siyang nahimo.

Disiplinaha ang imong anak kon kinahanglan. Kini wala magpasabot nga imong disiplinahon ang imong anak sa kada sayop niya. (Colosas 3:21) Pero ang seryosong mga sayop kinahanglang tul-iron. Ingon ana sab kon bahin sa dili maayong mga batasan. Kay kon pasagdan lang, posibleng madala niya kini inigdako niya.

Pananglitan, namatikdan nimo nga ang imong anak may tendensiya nga manghambog. Kon dili siya tul-iron, mahimo siyang hambogiro ug dili na makighigala sa uban. Busa sultihi ang imong anak nga kon manghambog siya, ang mga tawo dili ganahan niya ug basin maulawan lang siya. (Proverbio 27:2) Sultihi pod siya nga ang tawong balanseg panglantaw sa kaugalingon dili manghambog sa iyang mga abilidad ngadto sa uban. Kon imo siyang disiplinahon sa mahigugmaong paagi, makakat-on siya nga magmapainubsanon pero dili pod mawala ang iyang kompiyansa sa kaugalingon.​—Prinsipyo sa Bibliya: Mateo 23:12.

Tudloi ang imong anak nga mahimong realistiko. Kon imong ihatag ang tanang gusto sa imong anak, basin ma-spoiled siya. Busa kon ang imong anak gusto ug usa ka butang nga mahal ra kaayo, sultihi siya kon nganong kinahanglan mong magbadyet. Kon madismaya ang imong anak kay wala madayon ang inyong lingawlingaw o bakasyon, puwede nimong ipatin-aw nga ang pagkadismaya bahin gyod sa kinabuhi ug sultihi siya kon giunsa nimo pag-atubang ang makapadismaya nga mga kahimtang. Imbes maningkamot nga dili makasinati ang imong anak ug bisan unsang lisod nga situwasyon, andama siya sa pag-atubang sa mga problema sa kinabuhi.​—Prinsipyo sa Bibliya: Proverbio 29:21.

Tudloi ang imong anak nga magmahinatagon. Ipakita sa imong anak nga may “labaw nga kalipay sa paghatag kay sa pagdawat.” (Buhat 20:35) Unsaon kana paghimo? Puwede mong maglistag mga tawo nga nanginahanglag tabang sa pag-grocery, pagbiyahe, o pag-repair sa mga ayohonon. Dayon iuban ang imong anak sa pagtabang kanila. Ipakita sa imong anak ang imong kalipay ug katagbawan sa pagtabang sa uban. Kana ang kinamaayohang paagi sa pagtudlo sa imong anak nga magmapainubsanon​—pinaagi sa imong panig-ingnan.​—Prinsipyo sa Bibliya: Lucas 6:38.