Ang Gituohan sa Uban

Ang mga Hindu

nagtuo nga ang pag-antos maoy resulta sa binuhatan sa usa ka tawo, nga iyang nahimo karon o sa miaging kinabuhi. Makab-ot sa tawo ang moksha​—ang pagkahigawas sa siklo sa pagkatawo pag-usab—​kon ang iyang hunahuna nakasentro lang sa espirituwal nga mga butang.

Ang mga Muslim

nagtuo nga ang pag-antos maoy silot sa sala ug pagsulay sa pagtuo. Ang mga trahedya magpahinumdom nato nga “magpasalamat kanunay sa Diyos sa tanan natong mga panalangin ug nga angay natong tabangan ang mga nanginahanglan,” miingon si Dr. Sayyid Syeed, presidente sa Islamic Society sa North America.

Ang tradisyon sa mga Hudiyo

nagtudlo nga ang pag-antos maoy resulta sa binuhatan sa usa ka tawo. Ang ubang Hudiyo nag-ingon nga duna unyay pagkabanhaw ug human niana ang mga inosente nga nag-antos hatagag hustisya. Ang Kabbalistic (mystical) Judaism nagtudlog reinkarnasyon, nga maghatag sa tawo ug daghang kahigayonan sa pagbayad sa iyang mga sayop.

Ang mga Buddhist

nagtuo nga ang pag-antos padayong maeksperyensiyahan pinaagig balikbalik nga pagkatawo ug matapos lang dihang mawala na ang dili maayong buhat, emosyon, ug tinguha sa usa ka tawo. Pinaagi sa kaalam, maayong mga buhat, ug pagdisiplina sa hunahuna makab-ot sa tawo ang nirvana​—kahimtang nga wala nay pag-antos.

Ang mga Confucianist

nagtuo nga ang sagad nga hinungdan sa pag-antos mao ang “kapakyasan ug sayop sa mga tawo,” nag-ingon ang A Dictionary of Comparative Religion. Ang ilang doktrina nagtudlo nga bisag mamenosan ang pag-antos pinaagig maayong pagkinabuhi, ang kadaghanang pag-antos maoy tungod sa “mga espiritu nga mas gamhanan kay sa mga tawo. Niana nga mga kahimtang, kinahanglang dawaton sa tawo ang iyang Kapalaran.”

Ang mga relihiyon sa pipila ka tribo

nagtudlo nga ang pag-antos konektado sa espiritismo o pagpamarang. Para nila ang mga barangan makahatag ug suwerte o kadaot, ug ang mga ginahimo sa mga barangan mapugngan pinaagig lainlaing rituwal. Busa dihang mag-antos ang tawo sa sakit, ang mga rituwal ug tambal sa mga albularyo maoy magsilbing pangontra sa gihimo sa mga barangan.

Ang mga Kristiyano

nagtuo nga ang pag-antos maoy resulta sa sala sa unang duha ka tawo, sumala sa giingon sa Bibliya sa Genesis. Pero kana nga pagtulon-an gidugangag personal nga mga ideya sa daghang relihiyon. Pananglitan, ang ubang Katoliko nag-ingon nga puwedeng gamiton sa Diyos ang pag-antos sa usa ka tawo aron panalanginan ang simbahan o luwason ang usa ka tawo.