1. Ang Diyos bay Hinungdan sa Atong Pag-antos?

Kon Nganong Importanteng Mahibalo

Gisalikway sa daghang tawo ang Diyos kay para nila siyay hinungdan sa pag-antos.

Hunahunaa Kini

Daghang lider sa relihiyon ang nagtudlo nga Diyos ang hinungdan sa atong pag-antos. Pananglitan, moingon sila:

• Ang mga kalamidad silot gikan sa Diyos.

• Ang bata namatay kay nagkinahanglan ang Diyos ug dugang anghel sa langit.

• Gisuportahan sa Diyos ang mga gubat​—hinungdan sa grabeng pag-antos.

Pero posible kaha nga sayop ang gitudlo sa mga lider sa relihiyon bahin sa Diyos? Angay ba tang motuo sa ilang gitudlo?

Ang Giingon sa Bibliya

Dili Diyos ang hinungdan sa atong pag-antos.

Sukwahi kaayo nâ sa iyang mga hiyas nga gipakita sa Bibliya. Pananglitan:

“Ang tanan niyang [Diyos] ginahimo hustisya. . . . Matarong ug matul-id siya.”​—DEUTERONOMIO 32:4.

“Ang matuod nga Diyos dili gayod mobuhat ug daotan, ug ang Labing Gamhanan dili gayod mohimog sayop nga binuhatan!”​—JOB 34:10.

“Dili tuison sa Labing Gamhanan ang hustisya.”​—JOB 34:12.

Dili dawaton sa Diyos ang relihiyon nga nagtudlog bakak bahin kaniya.

Apil niini ang mga relihiyon nga nagtudlo nga ang Diyos maoy hinungdan sa atong pag-antos ug nagsuportar sa mga gubat ug kapintasan.

“Ang mga propeta nanagna ug kabakakan sa akong [Diyos] ngalan. Wala ko magpadala o magsugo o makigsulti kanila. Ang ilang gipanagna kaninyo maoy bakak nga panan-awon . . . ug panglimbong sa ilang kaugalingong kasingkasing.”​—JEREMIAS 14:14.

Gisaway ni Jesus ang relihiyon nga nagpakaaron-ingnon.

“Dili ang tanang moingon kanako, ‘Ginoo, Ginoo,’ makasulod sa Gingharian sa langit, kondili kadto lamang nagabuhat sa kabubut-on sa akong Amahan nga anaa sa langit. Nianang adlawa daghan ang moingon kanako: ‘Ginoo, Ginoo, wala ba mi managna pinaagi sa imong ngalan ug magpalayas ug mga demonyo pinaagi sa imong ngalan ug maghimog daghang milagro pinaagi sa imong ngalan?’ Ug ako moingon kanila: ‘Wala gyod ko makaila ninyo! Pahilayo kanako, kamong mamumuhat sa kalapasan!’”​—MATEO 7:21-23.