Unsay Epekto sa Teknolohiya sa Inyong Kaminyoon?

Pero, ang ubang magtiayon nga wala maggamit sa teknolohiya sa hustong paagi . . .

• nawad-ag panahon sa usag usa.

• nagdalag trabaho sa balay bisag wala kinahanglana.

• nawad-ag pagsalig sa usag usa ug wala pa gani magmaunongon.

ANG ANGAY NIMONG MAHIBALOAN

DIHANG MAGKAUBAN

Ang bana nga si Michael miingon: “Usahay dihang magkauban mi sa akong asawa, morag dili gihapon nako siya kauban. Busy kaayo siya sa iyang cellphone, ug moingon siya, ‘Karon pa nako ma-check ang akong cellphone.’” Ang bana nga si Jonathan miingon nga niana nga mga situwasyon, “magkauban ang magtiayon, pero morag lagyo kaayo sila sa usag usa.”

HUNAHUNAA KINI: Kanunay bang mabalda sa tawag, text, o notification ang imong panahon nga para unta sa imong kapikas?—EFESO 5:33.

TRABAHO

Naay mga tawo nga tungod sa ilang trabaho, kinahanglan nilang tubagon ang tawag o e-mail bisag naa na sila sa balay o dili na oras sa trabaho. Ang uban magdala gihapog trabaho sa balay bisag dili ra kinahanglan. “Di ko kapugong nga dili mag-check sa matag tawag o text nga akong madawat bahin sa trabaho sa panahon nga para unta sa akong asawa,” miingon ang bana nga si Lee. Ang asawa nga si Joy miingon: “Kay naa ra man ko sa balay magtrabaho, matental ko nga magsigeg trabaho. Nagkinahanglan gyod ug paningkamot aron mahimong balanse.”

HUNAHUNAA KINI: Maminaw ba kag maayo dihang mag-estorya ang imong kapikas?—LUCAS 8:18.

PAGKAMAUNONGON

Sumala sa usa ka surbi, daghang magtiayon ang mag-away kay nagduda sila sa paggamit sa ilang kapikas sa social media. Diyes porsiyento niadtong gisurbi ang miangkon nga naa silay gi-post sa social media nga dili nila gustong mahibaloan sa ilang kapikas.

Kanay hinungdan nga daghan ang nag-ingon nga peligroso kaayo ang social media, kay sama nig lugar nga daghag gilubong nga bomba ug dali rang makatental sa uban nga manapaw. Dili ikatingala nga ang mga abogado sa diborsiyo miingon nga dakog papel ang social media sa pagkabungkag sa daghang kaminyoon.

HUNAHUNAA KINI: Ginasekreto ba nimo ang imong pagpakig-estorya sa dili nimo kapikas?—PROVERBIO 4:23.

ANG IMONG MAHIMO

PAGHIMOG MGA PRAYORIDAD

Kon ang tawo dili kaayo mokaog tarong, magkaproblema gyod siya sa iyang panglawas. Sa samang paagi, kon ang usa dili kaayo mogahig panahon para sa iyang kapikas, moresulta pod nag mga problema sa ilang kaminyoon.—Efeso 5:28, 29.

Hisgoti uban sa imong kapikas ang mga sugyot sa ubos nga gusto nimong himoon, o isulat ang imong mga ideya kon unsaon nga dili makabalda ang teknolohiya sa inyong kaminyoon.

• Magdungan ug kaon bisag kausa sa usa ka adlaw

• Magtakdag oras nga dili mogamit ug mga gadyet

• Mag-eskedyul nga mag-date o mag-set ug espesyal nga panahon nga magkauban

• Palongon ang mga gadyet kon tingkatulog na ug ipalayo kini sa among higdaanan

• Maggahin ug 15 minutos kada adlaw nga mag-estoryahanay mi, nga walay mga gadyet sa duol

• Palongon ang Internet sa espesipikong oras