KALIBOTAN NGA PUNOG PROBLEMA

1 | Ampingi ang Imong Panglawas

KON NGANONG IMPORTANTE

Ang krisis o kalamidad makaapektar kanato sa lainlaing paagi.

Ang mga problema makapa-stress. Ug kon magdugay ang stress, mas daling masakit ang usa ka tawo.
Panahon sa krisis, posibleng maglisod ang mga ospital sa pag-atiman ug daghang pasyente ug kulang ang suplay sa mga tambal.
Ang mga kalamidad makaapektar sa panginabuhi sa mga tawo maong maglisod silag palit sa ilang panginahanglan, sama sa sustansiyadong pagkaon ug tambal.

Ang Angay Nimong Mahibaloan

Ang grabeng sakit ug stress makaapektar sa imong paghimog maayong desisyon. Tungod ana, posibleng mapasagdan nimo ang imong panglawas ug mosamot ang imong sakit.
Kon pasagdan nimo ang imong sakit, posibleng mograbe kini ug mameligro ang imong kinabuhi.
Kon himsog ka, mas makahimo kag maayong mga desisyon bisag nag-atubang ug daghang problema.
Dato man ka o pobre, naa kay mahimo aron maampingan ang imong panglawas.

Ang Imong Mahimo Karon

Kutob sa mahimo, ang maalamong tawo maghunahuna sa posibleng mga kapeligrohan ug mohimog mga paagi aron malikayan kana. Ingon ana sab sa atong panglawas. Sagad, malikayan nato nga masakit o mograbe kini kon pirmeng hinlo ang atong lawas ug balay. Mas maayong mag-amping aron dili ta masakit.

“Kon pirmeng hinlo ang atong lawas ug balay, dili ta makagastog dako sa pagpa-check up sa doktor ug sa mga tambal.”—Andreas.a

a Ang ubang ngalan giilisan.

ANG IMONG MAHIMO—Praktikal nga mga Tip

Dihang mag-atubang ug mga problema, ampingi ang imong panglawas pinaagi niining praktikal nga mga tip

MENTINAHA ANG KAHINLO

Mentinaha ang kahinlo

Ang Bibliya nag-ingon: “Ang tawong maalamon makakita sa kapeligrohan ug molikay niana.” (Proverbio 22:3) Hunahunaa daan kon unsay posibleng magpameligro sa imong panglawas ug likayi kana.

Panghunaw pirme gamit ang sabon ug tubig, ilabina sa dili pa mogunit ug pagkaon o human mag-CR.
Regular nga manghinlo ug mag-disinfect sa balay, ilabina sa mga lugar ug butang nga pirmeng magunitan.
Kon posible, likayi nga moduol niadtong naay makatakod nga sakit.

KAON UG SUSTANSIYADONG PAGKAON

Kaon ug sustansiyadong pagkaon

Ang Bibliya nag-ingon: “Wala gyoy tawo nga nagdumot sa iyang lawas, apan nagpakaon ug nagpangga niini.” (Efeso 5:29) Atong gipakita nga gimahal nato ang atong lawas kon mag-amping ta sa atong ginakaon ug ginainom.

Inom ug daghang tubig.
Kaon ug lainlaing klase sa prutas ug gulay.
Ayaw palabig kaon ug parat, tam-is, ug mantikaon nga pagkaon.
Ayaw panigarilyo, pagdroga, o pagpalabig inom.

“Aron dili masakit, pirme ming mokaon ug sustansiyadong pagkaon; kay kon dili, ang among gamay nga kita mahurot lang sa pagpatambal. Mas maayo pag mopalit mig sustansiyadong pagkaon.”—Carlos.

PAG-EXERCISE UG PAHULAY UG SAKTO

Pag-exercise

Ang Bibliya nag-ingon: “Mas maayo pa ang usa ka hakop nga pahulay kay sa duha ka hakop nga kahago ug paggukod sa hangin.” (Ecclesiastes 4:6) Kinahanglan tang motrabaho pero kinahanglan pod tang mopahulay.

Magmaaktibo sa pisikal. Puwede nimo ning sugdan pinaagi sa regular nga paglakawlakaw. Ang paglihoklihok makaayo sa imong panglawas bisan pag edaran na ka, baldado, o nalimitahan tungod sa sakit.
Pahulay

Pahulay ug sakto. Kon kulang kag tulog, mosamot ang imong stress ug dili kaayo ka maka-concentrate. Ug sa ngadtongadto, puwede ning moresultag grabeng mga sakit.
Pagtakdag realistikong oras sa pagtulog ug sunda kana. Paningkamot nga matulog ug momata sa parehong oras kada adlaw.
Likayi ang pagtan-awg TV o ang paggamit ug gadyet sa higdaanan.
Likayi ang caffeine, alkoholikong ilimnon, ug ang pagkaon ug daghan sa dili pa matulog.

“Nakita nako nga dakog epekto sa akong panglawas ang tulog. Kon kulang kog tulog, usahay maglabad ang akong ulo ug sakit akong lawas. Pero kon sakto akong tulog, gaan akong pamati ug ganahan kong motrabaho! Lagsik kaayo ko ug panagsa ra kaayo kong masakit.”—Justin.