KALIBOTAN NGA PUNOG PROBLEMA

3 | Ampingi ang Imong Relasyon sa Uban

KON NGANONG IMPORTANTE

Samtang nabalaka pag-ayo sa mga problema sa kalibotan, napasagdan sa daghan ang ilang relasyon sa uban.

Ang uban nagpalayo sa ilang mga higala.
Ang gugma sa mga magtiayon nag-anam ka bugnaw.
Ang mga ginikanan wala na kaayo o wala na gyod magtagad sa gikabalak-an sa ilang mga anak.

Ang Angay Nimong Mahibaloan

Importante ang mga higala kay makahatag silag kaayohan sa imong panglawas ug emosyon, ilabina sa lisod nga mga panahon.
Ang stress tungod sa mga problema sa kalibotan mahimong makaapektar sa imong pamilya sa wala damhang mga paagi.
Ang dili maayong mga balita posibleng makaapektar pag-ayo sa imong mga anak.

Ang Imong Mahimo Karon

Ang Bibliya nag-ingon: “Ang tinuod nga higala magpakitag gugma sa tanang panahon ug siya igsoon nga masaligan panahon sa kalisdanan.”—Proverbio 17:17.

Paghunahunag higala nga andam motabang ug mohatag ug praktikal nga tambag. Kon nahibalo ka nga naay nagmahal nimo, mas mapalig-on ka nga atubangon ang mga problema sa matag adlaw.

ANG IMONG MAHIMO—Praktikal nga mga Tip

Dihang mag-atubang ug mga problema, ampingi ang imong relasyon sa uban pinaagi niining praktikal nga mga tip

PALIG-ONA ANG INYONG PANAGTIAYON

Palig-ona ang inyong panagtiayon

Ang Bibliya nag-ingon: “Ang duha mas maayo kay sa usa . . . Kay kon ang usa kanila matumba, ang usa makabangon sa iyang kauban.” (Ecclesiastes 4:9, 10) Ang magtiayon angay nga magtinabangay sama sa pilot ug copilot nga usa rag destinasyon, dili ingong duha ka fighter jet nga nag-atakehay.

Paningkamoti nga dili ipahungaw ang inyong stress sa usag usa. Importante kaayo ang pagpailob.
Bisag kas-a sa usa ka semana, estoryahi ang inyong mga problema. Hinumdomi nga ang inyong target mao ang pagsulbad sa problema—dili ang usag usa.
Paggahin ug panahon sa paghimo sa mga butang nga pareho ninyong ganahan.
Estoryahi ang malipayong mga hitabo sa inyong panagtiayon. Puwede ninyong tan-awon ang mga picture sa inyong kasal o hinumdoman ang ubang nindot nga mga hitabo sa inyong kinabuhi.

“Naay mga butang nga dili tingali magkauyon ang magtiayon, pero wala na magpasabot nga dili na sila puwedeng magtinabangay. Ang magtiayon makahimo gihapog desisyon nga magkauban ug dayon magtinabangay aron molampos ang maong desisyon.”—David.

PABILING SUOD SA IMONG MGA HIGALA

Pabiling suod sa imong mga higala

Gawas nga modawat kag tabang gikan sa mga higala, puwede pod kang mangitag paagi nga makahatag ug tabang nila. Kon palig-onon nimo ang uban, mapalig-on pod ka.
Kada adlaw, komostaha ang pipila sa imong mga higala.
Pangutan-a ang imong mga higala kon giunsa nila pag-atubang ang mga problema nga parehas sa imong giatubang karon.

“Kon mag-atubang kag samag bagyo nga mga problema ug wala ka kabalo kon unsay himoon, ang mga higala makatabang ug makagiya nimo. Tingali pahinumdoman ka nila sa mga butang nga imo nang nahibaloan. Gimahal ka sa imong mga higala, ug nahibalo pod sila nga gimahal nimo sila.”—Nicole.

AYAW PASAGDI ANG IMONG MGA ANAK

Ayaw pasagdi ang imong mga anak

Ang Bibliya nag-ingon: “Ang matag usa kinahanglang abtik sa pagpaminaw, hinay sa pagsulti.” (Santiago 1:19) Sa primero, ang imong mga anak basig dili pa mosulti sa ilang gikahadlokan ug gikabalak-an. Pero kon mapailobon kang maminaw nila, matabangan nimo sila nga mosulti sa ilang gibati.

Pangitag paagi nga komportableng mosulti ang imong mga anak sa ilang gibati. Ang ubang bata mas ganahang makig-estorya kon relaks sila, pananglitan dihang naa sila sa sakyanan o naglakaw, imbes nga naglingkod nga nag-atubang sa ilang ginikanan.
Paneguroa nga ang imong mga anak dili pirmeng makakita ug makapatugaw nga mga balita.
Sultihi ang imong mga anak kon unsay imong gihimo aron magpabiling luwas ang inyong pamilya.
Paghimog plano enkasog naay mga emergency, ug praktisa kana uban sa imong mga anak.

“Pakig-estorya sa imong mga anak, ug tugoti sila nga mosulti sa ilang gibati. Basig gitago lang nila ang ilang kahadlok, kabalaka, o kasuko. Sultihi sila nga mibati pod ka ana, ug kon unsay imong gihimo aron dili madaog sa maong mga pagbati.”—Bethany.