Unsa nay Nahitabo sa Pagtahod sa Pamilya?

KON NGANONG IMPORTANTE ANG PAGTAHOD SA PAMILYA

• Ang librong The Seven Principles for Making Marriage Work nag-ingon nga dihang ang magtiayon naay pagtahod sa usag usa, makapakita silag pagmahal “dili lang sa dinagkong paagi kondili bisan sa ginagmayng paagi kada adlaw.”

• Gipakita sa research nga ang mga anak nga nakakat-on sa pagtahod sa uban naay mas dakong kompiyansa sa kaugalingon, mas maayog relasyon sa ilang ginikanan, ug dili kaayo makaeksperyensiyag emosyonal ug mental nga problema.

ANG IMONG MAHIMO

Paghimog plano uban sa imong pamilya. Una, seguroa nga ang tanan diha sa inyong pamilya nakasabot kon unsay kahulogan sa “pagtahod.” Ikaduha, isulat kon unsay angayng himoon sa mga membro sa pamilya sa pagpakitag pagtahod ug kon unsa poy angay nilang likayan. Ikatulo, hisgoti ang maong plano uban sa inyong pamilya aron kamong tanan—apil na ang inyong mga anak—mahibalo kon unsaon pagpakita ug pagtahod sa usag usa.

Pagpakitag maayong ehemplo. Ginasaway ba nimo ang imong mga membro sa pamilya kon makahimo silag mga sayop o mosulti sa ilang opinyon? Ginabalewala ba nimo sila dihang makig-estorya sila nimo, o mosagbat ba ka samtang nag-estorya pa sila?

Tip: Hinumdomi nga obligasyon nimo ang pagpakitag pagtahod sa imong kapikas ug mga anak bisan pag mobati tingali ka usahay nga dili sila angayng pakitaag pagtahod.

Pagpakitag pagtahod bisan dihang wala mo magkauyon. Dihang mosulti ka sa imong hunahuna o pagbati, likayi ang pag-ingon ug “ingon ana man gyod ka” o “dili gyod ka.” Kini nga mga sinultihan makapasakit sa imong kapikas o mga anak ug makapadako sa ginagmayng mga problema.

ANG AMONG GINAHIMO

Ang mga Saksi ni Jehova nagdasig sa mga membro sa pamilya nga magpakitag pagtahod sa usag usa. Gani, kini ang kasagarang tema sa among mga artikulo, libro, brosyur, ug video nga libreng mabatonan.

PARA SA MGA MAGTIAYON: Ang serye sa mga artikulo nga Tabang Alang sa Pamilya makatabang sa bana ug asawa nga . . .

• mahimong maayong tigpaminaw

• malikayan ang pagbungolay

• malikayan ang panaglalis

(I-search ang “Tabang Alang sa Pamilya” sa jw.org)

PARA SA MGA GINIKANAN: Ang serye sa mga artikulo nga Tabang Alang sa Pamilya makatabang sa mga ginikanan sa pagbansay sa ilang mga anak nga . . .

• mahimong masinugtanon

• motabang sa mga buluhaton sa balay

• mosultig “palihog” ug “salamat”

(I-search ang “Pagmatuto ug mga Anak” ug “Pagmatuto ug mga Tin-edyer” sa jw.org)

Tan-awa pod ang apendise nga “Mga Ginikanan Nangutana” sa librong Mga Pangutanang Gisukna sa mga Batan-on—Mga Tubag nga Mosaler, Tomo 1. (I-search ang “Mga Ginikanan Nangutana” sa jw.org)

PARA SA MGA BATAN-ON: Ang seksiyon nga Mga Batan-on sa jw.org naay mga artikulo, video, ug worksheet nga makatabang sa mga batan-on nga . . .

• makasinabot ang ilang ginikanan ug mga igsoon

• matinahorong makig-estorya sa ilang ginikanan bahin sa mga balaod sa balay

• mosalig kanila ang ilang ginikanan

(I-search ang “Mga Batan-on” sa jw.org)

Libre ang paggamit sa jw.org nga website. Wala ni bayad, dili ka kinahanglang mo-subscribe o magpamembro, ug dili ka pangayoan ug personal nga impormasyon.