PAGTAAS SA PRESYO—UNSAY IMONG MAHIMO?

Mahimong Mahinatagon

Kon nagkalisod ka tungod sa nagkataas nga mga presyo, maghunahuna tingali ka nga morag imposible nga makapanghatag pa ka sa uban. Pero sa tinuod lang, ang pagkamahinatagon makatabang nimo nga makaya ang kalisod sa kinabuhi karon. Puwede gihapon kang makapanghatag sa uban bisag nagdaginot ka.

KON NGANONG IMPORTANTE NI

Kon mahinatagon ta—bisan sa ginagmayng paagi—mahimo tang malipayon ug mogaan ang atong pamati. Gani, ang ubang doktor nag-ingon nga makahatag nig kaayohan sa atong panglawas. Pananglitan, makapamenos ni sa kabalaka, stress, mga sakitsakit sa lawas, ug makapaubos sa blood pressure. Makatabang pod gani ni nga mahimong mas maayo ang pagkatulog.

“Dunay labaw nga kalipay sa paghatag kay sa pagdawat.”—Buhat 20:35.

Kon mahinatagon ta sa uban, sa kuwarta man o sa laing mga paagi, mas dili ta malisdan nga modawat ug tabang kon kita nay manginahanglan. Si Howard, nga taga-England, miingon: “Nangita mig mga paagi nga makapanghatag ug makatabang sa uban. Mao nga dihang kami na sa akong asawa ang nanginahanglag tabang, wala na kaayo mi mobati nga nakapabug-at mi sa uban.” Siyempre, ang mga tawo nga tinuod gyong mahinatagon dili magdahom nga balosan silag kaayo sa uban. Pero segurado nga tungod sa ilang pagkamahinatagon, makakita silag tinuod nga mga higala nga motabang gyod nila panahon sa kalisdanan.

“Batasana ang paghatag, ug hatagan mo sa mga tawo.”—Lucas 6:38.

ANG IMONG MAHIMO

Panghatag sa kon unsay naa nimo. Bisag gamay ra kag nabatonan, puwede gihapon kang makapanghatag sa uban, bisan ganig simpleng pagkaon lang. Si Duncan ug ang iyang pamilya, nga taga-Uganda, mahinatagon bisag pobre lang sila. Si Duncan miingon: “Kada Dominggo, naa mi imbitahon sa akong asawa sa balay aron mangaon. Malipay gyod mi kon naa mi bisita.”

Siyempre, kinahanglang balanse pod ka dihang manghatag ka sa uban, kay dili pod maayo kon mapasagdan na hinuon nimo ang panginahanglan sa imong pamilya.—Job 17:5.

Sulayi ni: Paghunahuna kon kinsay puwede nimong imbitahon para sa simpleng pagpangaon o librehon ug mainom. Kon naa pod kay mga gamit nga wala na nimo gamita, puwede nimo ning ipanghatag sa imong mga higala o silingan nga nanginahanglan ani.

Panghatag sa ubang mga paagi. Usahay, dili ta kinahanglang mogasto aron makapanghatag. Pananglitan, mahatag nato ang atong panahon ug kusog aron tabangan ang uban. Bisan gani ang atong buotan ug maayo nga sinultihan dako kaayog mahimo. Maong sultihi ang uban nga imo silang giapresyar ug gimahal.

Sulayi ni: Tabangi ang uban sa ilang mga buluhaton o ayohonon sa balay. Paghimog card o pag-message sa imong higala, bisag mangomosta lang ka niya.

Kon mangita kag mga paagi nga makapanghatag sa uban, daghan gyod kag makuhang kaayohan ug mahimo kang mas malipayon.

“Ayawg kalimti ang pagbuhat ug maayo ug ang pagpaambit sa imong mga nabatonan.”—Hebreohanon 13:16.

Magtiayon nga mitabang sa edarang babaye sa pagpanglimpiyo sa iyang nataran. Gihatagan sa edarang babaye ang magtiayon ug init nga mainom samtang nanglimpiyo sila.