PAGTAAS SA PRESYO—UNSAY IMONG MAHIMO?

Salig sa Nindot nga Paglaom

Misaka ba ang mga presyo ug galastohan diha sa inyong lugar pero mao ra gihapon ang imong kita? Naghunahuna ba ka nga basig dili na nimo matagan-an ang imong panginahanglan o ang panginahanglan sa imong pamilya? Kon mao, basig mabalaka ka sa inyong kaugmaon. Niini nga mga kahimtang, dako gyod kaayog tabang ang paglaom.

KON NGANONG IMPORTANTE NI

Ang mga tawo nga naglaom nga moarang-arang ang kahimtang dili lang basta maghulat nga naay maayong mahitabo. Ang paglaom makatabang nila nga molihok ug himoon ang ilang maarangan bisan pa sa ilang lisod nga kahimtang ug mga problema. Pananglitan, gipakita sa mga research nga ang mga tawo nga naay gilaoman . . .

mas makalahutay sa lisod nga mga situwasyon
mas daling maka-adjust
mas makahimog maayong mga desisyon bahin sa mga butang nga makaapektar sa ilang panglawas

ANG IMONG MAHIMO

Una, sayra kon sa unsang paagi ang Bibliya makatabang nimo karon. Ang Bibliya naay praktikal nga mga sugyot aron dili kaayo ka maapektohan sa nagkataas nga mga presyo o galastohan. Kini nga mga sugyot makatabang pod nga makapadayon ka bisan pa sa mga problema ug lisod nga mga situwasyon karon o sa umaabot.

“Kon may panabot ka ug kahibalo nga modesisyon ug ensakto, makasalbar kini kanimo.”—Panultihon (Proverbio) 2:11, Ang Pulong Sa Dios.

Ikaduha, sayra kon unsay giingon sa Bibliya bahin sa umaabot. Dihang makita nimo nga dako gyod ug ikatabang ang kaalam sa Bibliya sa imong kinabuhi karon, mas ganahan kang mokat-on ug dugang sa giingon niini bahin sa umaabot. Pananglitan, makakat-on ka nga dili lang “maayong kaugmaon ug paglaom” ang gustong ihatag sa Diyos nimo kondili lig-on pod nga basehanan kon nganong makasalig ka niana nga paglaom. (Jeremias 29:11) Kana nga basehanan mao ang Gingharian sa Diyos.

UNSA ANG GINGHARIAN SA DIYOS, UG UNSAY HIMOON NIINI?

Ang Gingharian sa Diyos maoy usa ka gobyerno nga magmando sa tibuok kalibotan. (Daniel 2:44; Mateo 6:10) Magmando ni gikan sa langit, ug taposon niini ang tanang pag-antos ug kalisod. Ang mga tawo magpuyo na unya nga malinawon ug matagan-an sa tanan nilang panginahanglan, sama sa giingon sa mosunod nga mga teksto.

“Ikaw magmalipayon ug magmalamboon.”—Salmo 128:2.

‘[Ang mga sakop sa Gingharian] dili maghago sa wala lamay kapuslanan.’—Isaias 65:23.

“Duna unyay dagayang lugas sa yuta.”—Salmo 72:16.

Minilyong tawo ang misalig niana nga mga saad kay kombinsido sila nga ang Diyos “dili gyod mamakak.” (Tito 1:2) Di gyod ka magmahay kon susihon nimo ang giingon sa Bibliya. Ang paglaom nga gihisgotan dinhi makatabang nimo nga magpabiling positibo ug mosalig nga naa gyod tay nindot nga kaugmaon.