Si Jacob Miadto sa Haran

NAHIBALO ka ba kinsa kining mga lalaki nga gikabildo ni Jacob? Human sa pagpanaw sa daghang adlaw, si Jacob nakatagbo kanila diha sa usa ka atabay. Nangutana siya: ‘Diin man kamo gikan?’

‘Sa Haran,’ sila miingon.

‘Nakaila ba kamo kang Laban?’ nangutana si Jacob.

‘Oo,’ mitubag sila. ‘Tan-awa, ania nagpaingon nganhi ang iyang anak babaye si Raquel, uban sa iyang mga karnero.’ Makita mo ba siya dinhi sa hulagway?

Gikuha ni Jacob ang bato gikan sa atabay aron ang karnero ni Laban makainom. Unya iyang gihagkan si Raquel ug gitug-anan kinsa siya. Nahinangop siya, ug milakaw ug gisuginlan ang iyang amahang si Laban.

Si Laban mitugot kang Jacob nga moestar uban kaniya. Ug gihatag niya ang pagtugot kang Jacob nga mangasawa kang Raquel. Pero, gihangyo niya si Jacob nga motrabaho sa iyang umahan sa pito ka tuig tungod kang Raquel. Apan sa pag-abot sa panahon alang sa kasal, nahibalo ba ikaw unsay nahitabo?

Gihatag ni Laban ang iyang kamagulangang anak babaye si Leah kang Jacob ingong asawa! Kinahanglang uyon si Jacob nga motrabahog dugang pito ka tuig, ug unya ihatag ni Laban kaniya si Raquel. Niadtong mga adlawa gitugotan sa Diyos ang mga lalaki nga makabaton kapin sa usa ka asawa. Karon ang usa ka tawo kinahanglan magbaton lamang sa usa ka asawa.