Si Jose Gibilanggo

SI Jose 17 anyos pa lamang ang kagulangon sa dihang gidala siya ngadto sa Ehipto. Didto gibaligya siya ngadto sa usa ka tawong ginganlan si Potiphar. Si Potiphar nagtrabaho alang sa hari sa Ehipto, kinsa gitawag Paraon.

Si Jose kuging nagtrabaho alang sa iyang agalon. Busa sa dihang si Jose mitubo sa kahingkod, si Potiphar nagtudlo kaniya nga magdudumala sa iyang tibuok balay.

Si Jose nagtubong ambongan kaayong lalaki, ug ang asawa ni Potiphar gustong pahigdaon siya uban kaniya. Apan si Jose nahibalo nga kini maoy daotan ug wala niya buhata kini. Ang asawa ni Potiphar nasuko kaayo. Busa namakak siya ngadto sa iyang bana: ‘Kanang daotang Jose nagtental kanako nga mohigda uban kaniya!’ Si Potiphar mituo sa iyang asawa ug gibalhog si Jose sa bilanggoan.

Tungod kay si Jose usa ka maayong tawo, siya gipiyalan sa pagdumala sa tanang ubang binilanggo. Sa ulahi si Paraon nasuko sa iyang tigdala-sa-kopa ug sa iyang panadero, ug gibilanggo sila. Usa ka gabii ang matag usa kanila may talagsaong damgo. Sa sunod adlaw si Jose miingon: ‘Tug-ani ko sa inyong mga damgo.’ Sa gitug-an nila, si Jose, uban sa tabang sa Diyos, misaysay sa kahulogan sa ilang mga damgo.

Gisultihan ni Jose ang tigdala-sa-kopa nga sa ikatulo ka adlaw siya pagawason sa bilanggoan. Gihangyo niya ang tigdala-sa-kopa nga mahinumdom kaniya kon mahitabo na kana. Apan ngadto sa panadero siya miingon: ‘Sa ikatulo ka adlaw si Paraon magpapunggot sa imong ulo.’

Sa ikatulo ka adlaw natuman kana sumala sa gisulti ni Jose. Si Paraon nagpapunggot sa ulo sa panadero. Apan ang tigdala-sa-kopa gipagawas sa bilanggoan ug misugod sa pag-alagad pag-usab sa hari. Apan siya nakalimot sa tanan bahin kang Jose! Busa si Jose nagpabilin sa bilanggoan.