Ang mga Damgo ni Paraon

DUHA ka tuig ang milabay, ug si Jose anaa gihapon sa bilanggoan. Ang tigdala-sa-kopa wala mahinumdom kaniya. Unya usa ka gabii si Paraon may duha ka talagsaong damgo ug siya nalibog kon unsay ilang kahulogan. Nakita mo ba siyang natulog dinhi? Sa sunod buntag, walay usang makatug-an kaniya sa kahulogan sa iyang mga damgo.

Sa kataposan ang tigdala-sa-kopa nahinumdom kang Jose. Iyang gisultihan si Paraon mahitungod kaniya ug si Paraon misugo sa pagpagawas kang Jose sa bilanggoan dihadiha dayon.

Si Paraon misugilon sa iyang mga damgo kang Jose: ‘Ako nakakita sa pito ka matambok, maanindot nga mga baka. Unya ako nakakita ug pito ka niwang kaayo ug bukogong mga baka. Ug ang niwang mga baka mikaon sa tambok nga mga baka.

‘Sa akong ikaduhang damgo ako nakakita sa pito ka uhay nga bus-ok, hinog nga trigo nga nagtubo sa usa ka uhot. Unya ako nakakita sa pito ka piyasot, laya nga uhay sa trigo. Unya ang piyasot nga mga uhay sa trigo milamoy sa pito ka maayong uhay sa trigo.’

Si Jose misulti kang Paraon: ‘Ang duha ka damgo nagkahulogan sa samang butang. Ang pito ka matambok nga baka ug ang pito ka bus-ok uhay sa trigo nagkahulogan sa pito ka tuig, ug ang pito ka niwang nga baka ug pito ka piyasot nga uhay sa trigo nagkahulogan sa laing pito ka tuig. Adunay pito ka tuig nga daghang pagkaon motubo sa Ehipto. Unya adunay pito ka tuig nga diyotay ra kaayong pagkaon ang motubo.’

Busa si Jose miawhag kang Paraon: ‘Pagpili ug usa ka maalam nga tawo ug ipiyal kaniya ang pagdumala sa pagpanghipos sa pagkaon sulod sa pito ka tuig sa kadagaya. Unya ang mga tawo dili kurawon sulod sa pito ka tinggutom nga tuig.’

Si Paraon nakagusto sa maong ideya. Ug iyang gipili si Jose sa pagpanigom sa pagkaon ug paghipos niini. Sunod kang Paraon, si Jose nahimong ang labing dakong tawo sa Ehipto.

Walo ka tuig sa ulahi, panahon sa gutom, si Jose nakakita sa iyang 10 ka magulang igsoong lalaki. Ang ilang amahan nga si Jacob nagpadala kanila sa Ehipto, tungod kay sila nahutdan sa pagkaon sa ilang pinuy-anan sa Canaan. Ang mga igsoon ni Jose wala makaila kaniya tungod kay siya hingkod na ug nasul-oban sa usa ka lahing matang sa sinina.

Si Jose nahinumdom nga sa bata pa siya nagdamgo siya mahitungod sa iyang mga igsoong lalaki nga miyukbo kaniya. Nahinumdom ka ba niana? Busa nasabtan ni Jose nga ang Diyos mao ang nagpadala kaniya sa Ehipto, ug alang sa usa ka maayong katarongan. Sa hunahuna mo unsay buhaton ni Jose? Tan-awon ta.